BONAA 2

Musa inaa

1 Levi buri gↄ̃gbɛ̃ Levi buri nↄgbɛ̃ sɛ̀. 2 Nↄ pìi nↄ̀ↄ sì à nɛ́ ì gↄ̃gbɛ̃ ũ. Kũ à è nɛ́ pì mana, akũ à a ùtɛ mↄ aakↄ̃. 3 Kũ adi fↄ̃ à a ùtɛ doro, à kepu tãnko sɛ̀ à ↄ̀daa lɛ̀a de í sún gɛ̃ a gũnlo yãi. Akũ à nɛ́ pìi dàn à gɛ̀ɛ à dìtɛ Nili í lɛ́a kanda gũn. 4 Nɛ́ pì dãre zɛ zã̀ dire, àtɛn gwa yã kũ ani a le.

5 Akũ Firi'auna nɛ́nↄgbɛ̃ gɛ̀ɛ zú o swai, a gbɛ̃nↄ tɛn kure swa pì lɛ́a. À tãnko è ditɛna kandan, akũ à a zↄ̀nↄkpare zĩ̀ à gɛ̀ɛ à a sɛ̀. 6 Kũ à wɛ̃̀, à è nɛ́ mɛ́ à dan, àtɛn ↄ́ↄ dↄ. À kɛ̀nɛ wɛ̃nda à pì: Eberu nɛ́gↄ̃gbɛ̃mɛ. 7 Akũ nɛ́ pì dãre sù à pì Firi'auna nɛ́ pìinɛ: Ń ye mà gɛ́ mà Eberu nↄgbɛ̃ sísinnɛ àgↄ̃ yↄ̃ kpánnɛ nɛ́ pìian yá? 8 À wèa à pì: Ǹ gɛ́! Akũ nɛ́nↄgbɛ̃ pìi gɛ̀ɛ à nɛ́ pì da sìsi. 9 Firi'auna nɛ́nↄgbɛ̃ pìi pìnɛ: Ǹ nɛ́ pì sɛ́ ǹ tá kãao ǹgↄ̃ a gwamɛnɛ, manigↄ̃ fĩna bonnɛ. Akũ à nɛ́ pìi sɛ̀ à tà kãao, àtɛni a gwa. 10 Kũ nɛ́ pì zↄ̃kↄ̃ kũ̀, à a sɛ̀ à gɛ̀ɛ kãao Firi'auna nɛ́nↄgbɛ̃ pìinɛ, akũ à a sì a nɛ́ ũ. À tↄ́ kpànɛ Musa, zaakũ à pì, a a bò í gũmmɛ.

Musa bàa lɛ́ à tana Midiã bùsun

11 Zĩkea kũ Musa zↄ̃kↄ̃ kũ̀, à gɛ̀ɛ a buri Eberunↄ gwa, akũ à zĩ gbãna kũ òtɛn kɛ è. À è Misila gbɛ̃ tɛni a buri dake gbɛ̃. 12 Kũ à gu gwàgwa, adi gbɛ̃ke ero, akũ à Misila gbɛ̃ pìi dɛ̀ à a ùtɛ bùsu'atɛ̃n.

13 Kũ gu dↄ̀, à bò à Eberunↄ è gbɛ̃nↄn pla, òtɛn fìti kɛ. Akũ à gbɛ̃ kũ a yã nnaro là à pì: Bↄ́yãi ntɛni n gbɛ̃ndo gbɛ̃ɛ? 14 À wèa à pì: Dí mɛ́ à n ditɛ kína yãgↄ̃gↄ̃ri ũwɛrɛɛ? Ń ye ǹ ma dɛ lákũ n Misila gbɛ̃ dɛ̀ nàn yá? Akũ vĩna Musa kũ̀ à pì: Ò yã kũ ma kɛ̀ɛ dↄ̃̀ fá!

15 Kũ Firi'auna yã pìi mà, àtɛn wɛtɛ à Musa dɛ, akũ à bàa lɛ̀nɛ à tà Midiã bùsun, akũ à vùtɛ lↄ̀gↄↄ sarɛ gwe. 16 Midiã sa'ori kun à nɛ́nↄgbɛ̃nↄ vĩ gbɛ̃nↄn suppla, akũ ò sù ò í tↄ̀ ò kà pↄ́kãdenↄ gó ímikin ń de pↄ́kãdenↄnɛ. 17 Kũ sãdãri kenↄ sù òtɛn pɛ́ḿma, akũ Musa fùtɛ à yã sì kũńwo, akũ à í kpàńnɛ ń pↄ́kãdenↄa. 18 Kũ ò tà ń de Ruɛli kĩnaa, à ń lá à pì: À kɛ̀ dera a su káaku lɛ gbãraa? 19 Ò wèa ò pì: Misila gↄ̃gbɛ̃ ke mɛ́ à ó sí sãdãrinↄa. Àkũ mɛ́ se à í tↄ̀ à kpàwɛrɛ ó pↄ́kãdenↄa. 20 Akũ à ń lá à pì: Ade pì kú máa? Bↄ́ yã mɛ́ à tò a gↄ̃gbɛ̃ pìi tò gwee? À a sísi à su à pↄ́ ble kũoo. 21 Musa sù, akũ à wè à vùtɛ kũ gↄ̃gbɛ̃ pìio, akũ gↄ̃gbɛ̃ pì a nɛ́nↄgbɛ̃ Zipora kpàa nↄ ũ. 22 Akũ Zipora nɛ́ ì gↄ̃gbɛ̃ ũ, akũ Musa tↄ́ kpànɛ Gɛsↄmu, à pì: Buri zĩ̀tↄↄn ma ũ gbɛ̃ pãndenↄ bùsun la.

23 Kũ à gìi kɛ̀, akũ Misilanↄ kína gà. Isarailanↄ tɛni nda zↄ̀zĩ kũ òtɛn kɛ yãi, òtɛn wiki lɛ́, akũ ń wiki pìi kà Luda kĩnaa. 24 À ń ndanaa mà, a bàka kũ à kú kũ Ibrahĩo kũ Isaakuo kũ Yakubuo dí sãaguro. 25 Luda Isarailanↄ gwà, akũ ò kɛ̀nɛ wɛ̃nda.

<- BONAA 1 BONAA 3 ->