1 Isarailanↄ fùtɛ Ɛlimu ń pínki, akũ ò kà Sini gbáranna kũ à kú Ɛlimu kũ Sinaio dagura ń bona Misila mↄ plade gũn gↄrↄ gɛ̃rode zĩ. 2 Akũ ò zuka kà Musai kũ Harunao gbárannan gwe ń pínki 3 ò pìńnɛ: Bↄ́ yã mɛ́ à tò Dikiri dí ó dɛdɛ Misilaroo? Gwe odì vutɛ ò pↄ́ ble kũ nↄ̀bↄↄo ari ò kã, akũ a su kũoo gbárannan kũ à ó dɛdɛ kũ nàao.

4 Dikiri pì Musanɛ: Bona musu mani pↄ́ble fãárɛ. Gbɛ̃nↄ ni bↄtɛ ò gↄrↄ do pↄ́ sɛ́tɛ lákũ gu dìgↄ̃ dↄ nà ń blena lɛ́n, de mà ń yↄ̃ mà gwa tó ò ma doka kũna. 5 Gↄrↄ suddode zĩ gↄrↄ pla pↄ́n oni sɛ́tɛ ò a pↄ́ble kɛ. 6 Akũ Musa kũ Harunao pìńnɛ ń pínki: Ɔkↄsiala áni dↄ̃ kũ Dikiri mɛ́ à á bↄ́tɛ Misila, 7 zia kↄnkↄ áni Dikiri gakuri e. À zuka kũ a kàai mà. Bↄ́n ó ũ kũ áni gbasa a zuka kàwáii? 8 Musa ɛ̀ra à pì: Dikiri ni á gba nↄ̀bↄↄ à só ↄkↄsiala, zia kↄnkↄ ani pↄ́ble kpááwa á blena lɛ́n, kũ à zuka kũ á kàai mà yãi. Pↄ́ken ó ũro. Adi kɛ ókↄ̃nↄ a zuka kàwáiro, Dikirimɛ.

9 Akũ Musa pì Harunanɛ: Ǹ o Isarailanↄnɛ ń pínki ò na Dikirii, zaakũ à ń zukakanaa mà. 10 Kũ Haruna tɛn yã ońnɛ, ò arɛ dↄ̀ gbáranna kpa, akũ ò è Dikiri gakuri bò à sùḿma tɛ́luku gũn. 11 Akũ Dikiri yã ò Musanɛ à pì: 12 Ma Isarailanↄ zukakanaa mà. Ǹ ońnɛ ↄkↄsiala oni nↄ̀bↄ só, zia kↄnkↄ oni pↄ́ ble ò kã, oni dↄ̃ kũ makũmɛ Dikiri ń Luda ũ.

13 Ɔkↄsi kpɛkpɛrɛwinↄ sù ò dà ń bùrala. Kũ gu dↄ̀ plí kpà à lìkańyĩ. 14 Kũ plí kɛ̃̀, akũ pↄ́ gↄ̃̀ katɛna zĩtɛ púu ketekete lán pↄ́ koto bà. 15 Kũ Isarailanↄ è, ò pìkↄ̃nɛ: Bↄ́n díi? Zaakũ odi dↄ̃ pↄ́ kũ à de a ũro. Musa pìńnɛ: Pↄ́ kũ Dikiri kpàáwa à blen gwe. 16 Yã kũ Dikiri dìtɛárɛn dí: Á baadi sɛ́tɛ a blena lɛ́n. À sɛ́tɛ á baadi zaka lɛ́ dodo á ↄndenↄ dasi lɛ́n. 17 Isarailanↄ kɛ̀ lɛ. Ò sɛ̀tɛ, gbɛ̃kenↄ pↄ́ zↄ̃kↄ̃, gbɛ̃kenↄ pↄ́ fíti. 18 Kũ ò zakaa dàn, gbɛ̃ kũ à sɛ̀tɛ zↄ̃kↄ̃ pↄ́ dí dialaro, gbɛ̃ kũ à sɛ̀tɛ fíti pↄ́ dí kĩaaro. 19 Musa pìńnɛ: Gbɛ̃ke sún a kpara tó ari gudↄoro. 20 Gbɛ̃kenↄ dí Musa yã maro, ò a kpara tò ari gu dↄ̀, akũ à kↄ̀kↄↄ kà à vã̀, akũ Musa pↄ fɛ̃̀ gbɛ̃ pìnↄi.

21 Lákũ gu dìgↄ̃ dↄ nà baadi dì sɛ́tɛ a blena lɛ́n. Tó ifãntɛ̃ gbã̀, pↄ́ kũ à gↄ̃̀ zĩtɛ dì yↄ́mɛ. 22 Gↄrↄ suddode zĩ ò pↄ́ble sɛ̀tɛ lɛu pla, baadi zaka lɛ́ plapla. Akũ ń gbɛ̃ zↄ̃kↄ̃nↄ gɛ̀ɛ ò ò Musanɛ ń pínki. 23 À pìńnɛ: Lɛn Dikiri dìtɛ lɛ. Zia bi kámmabogↄrↄ zĩmɛ, Dikiri gↄrↄmɛ. À pↄ́ kũ á ye à kpá tɛ́a kpá tɛ́a. À pↄ́ kũ á ye à disa disa, à a kpara kũ à gↄ̃̀ ditɛ ari gu dↄ̀. 24 Ò dìtɛ ari gu dↄ̀ lákũ Musa ò nà. Adikũ dí vãro adi kↄ̀kↄ káro. 25 Akũ Musa pìńnɛ: À ble gbãra, zaakũ kámmabogↄrↄ zĩmɛ, áni e gukea gbãraro. 26 Àgↄ̃ sɛ́tɛ ari gↄrↄ suddo. A gↄrↄ supplade bi kámmabogↄrↄ zĩmɛ, anigↄ̃ kun zĩ kũ̀aro.

27 Gↄrↄ supplade zĩ gbɛ̃kenↄ bò ò gɛ̀ɛ sɛ́tɛ, akũ odi lero. 28 Akũ Dikiri pì Musanɛ: Ánigↄ̃ kú kũ doka kũ ma dìtɛnↄ manaa sario ari bↄrɛmɛɛ? 29 Àgↄ̃ dↄ̃ kũ makũ Dikiri ma kámmabogↄrↄ dìtɛárɛ. A yã mɛ́ à tò gↄrↄ suddode zĩ madì gↄrↄ pla pↄ́ble kpááwa. Baadi gↄ̃ kú a gbɛ̀n, gbɛ̃ke sún bo gu kũ à kun gↄrↄ supplade pì zĩro. 30 Akũ ò kámma bò gↄrↄ supplade zĩ. 31 Isarailanↄ tↄ́ kpà pↄ́ble pìinɛ mana. À de lán pↄ́wɛ pura keteketenↄ bàmɛ. A í nna lán kàra zↄ́de bà.

32 Musa pì: Yã kũ Dikiri dìtɛn dí: Ò mana zaka lɛ́ do ditɛ ó burinↄnɛ, de ò pↄ́ble kũ à kpàwá o blè gbárannan ó bona Misila gbɛra e se. 33 Akũ Musa pì Harunanɛ: Ǹ lo sɛ́ ǹ mana zaka lɛ́ do kán ǹ ditɛ Dikiri arɛ, de àgↄ̃ ditɛna ó burinↄnɛ. 34 Akũ Haruna dìtɛ gbɛ̀ anlonↄ sarɛ de àgↄ̃ ditɛna lákũ Dikiri ò Musanɛ nà. 35 Isarailanↄ mana blè wɛ̃̀ bupla ari ò gɛ̀ɛ ò kào bùsu kũ gbɛ̃nↄn kún. Ò mana pìi blè ari ò gɛ̀ɛ ò kào Kanaanↄ bùsu lɛ́a. 36 Zaka lɛ́ do bi lita plamɛ.

<- BONAA 15BONAA 17 ->