ƐSITA 2

Ɛsita gↄ̃na kína nanↄ ũ

1 Yã birenↄ gbɛra kũ kína Asueru pↄ kpàtɛ, yã kũ Vasati kɛ̀nɛ kũ yã kũ à dìtɛ a yã musuo dí sãaguro. 2 Akũ kína ìbanↄ pìnɛ: Kí, ǹ tó ò nↄkpare mananↄ wɛtɛnnɛ. 3 Ǹ gbɛ̃ zↄ̃kↄ̃nↄ ditɛ n bùsunↄ gũn pínki ò nↄkpare mananↄ kakara ò su ò ń ká n nↄgbɛ̃nↄ tɛ́ Susa la. N nↄgbɛ̃nↄ gwàri Egai kũ ò a fɛ̀rɛɛ kɛ̀ ni ń gwa kũ n nↄnↄ, oni ń kɛkɛ kũ nísidↄkↄnanↄ swáswa. 4 Nↄgbɛ̃ kũ à kàngu ni gↄ̃ n nanↄ ũ Vasati gɛ̃nɛ ũ. Yã pìi kɛ̀ kínanɛ nna, akũ à zɛ̀o lɛ.

5 Yuda ke kú Susa Biliaminu burimɛ, a tↄ́n Mↄdekai, Yairi nɛ́mɛ. Simɛi kũ Kisio kú a dizinↄ tɛ́. 6 À kú zĩ̀zↄnↄ tɛ́ kũ Babilↄnu kína Nɛbukanɛza ń kũkũ Yurusalɛmu kũ Yudanↄ kína Yɛkↄniao à tà kũńwo. 7 Àtɛni a disɛ̃ nɛ́ Adasa kũ òdi pinɛ dↄ Ɛsita gwa, zaakũ a de kũ a dao kunlo. Nↄkpare pì kakana mana akũsↄ̃ à mana. Kũ a de kũ a dao gà, Mↄdekai a sɛ̀ a nɛ́ ũ. 8 Kũ ò yã kũ kína dìtɛ pìi mà, akũ ò gɛ̀ɛ kũ nↄkparenↄ dasidasi Susa ò ń ná Egainɛ a ↄĩ. Akũ ò Ɛsita sɛ̀ ò gɛ̀ɛ kãao kínabɛa kína nↄgbɛ̃nↄ gwàrii pìinɛ. 9 Nↄkpare pìi kɛ̀nɛ mana, akũ à gbɛ̃kɛ kɛ̀nɛ à pì ò a kɛkɛ kũ nísidↄkↄnanↄ swáswa gↄ̃̀nↄ, ò pↄ́ble mana kpáa. À kínabɛa nↄkpare kũ a sɛ̀ gbɛ̃nↄn supplanↄ kpàa, akũ à kpɛ́ mana kpàa kína nↄgbɛ̃nↄ bɛa. 10 Ɛsita dí a buri ke a bɛ bùsu o gbɛ̃kenɛro, zaakũ Mↄdekai pìnɛ àsun tó gbɛ̃ke dↄ̃ro. 11 Lákũ gu dìgↄ̃ dↄ nà Mↄdekai dìgↄ̃ kína nↄgbɛ̃nↄ bɛ gãnulɛ zɛ́ sↄ, de à le àgↄ̃ Ɛsita kunna dↄ̃ kũ yã kũ àtɛni a leo.

12 Ari nↄkparenↄ zɛ́ e ògↄ̃ gɛ́ i kũ kína Asueruo, séto ò yã kũ ò dìtɛńnɛ kɛ gĩa ari mↄ kuri awɛɛpla. Òdigↄ̃ nísi kũ ò kɛ̀ kũ lí'ↄ gbĩ nnao dↄkↄḿma ari mↄ suddo, akũ òdigↄ̃ ń kɛkɛ kũ nísi gbĩ nnanↄ kũ nↄgbɛ̃ mɛ̀kɛkɛbↄnↄ ari mↄ suddo. 13 Nↄkpare kũ kína pì ina kàa, kína nↄnↄ bɛ pↄ́ kũ à gbɛ̀ka pínki òdi kpáa à gɛ́omɛ. 14 Àdi gɛ́ ↄkↄsi à su kína nↄnↄ bɛa kↄnkↄ gwàri kũ òdi pinɛ Sasagaza kũ ò a fɛ̀rɛɛ kɛ̀ fárandi. Àkũ mɛ́ àdi ↄ lika kína nↄ yìgisaride pìnↄi. Àdi le à ɛra à gɛ́ kína kĩnaa doro, séto a yã kà kína pìn à a sìsi dↄ baasiro. 15 Kũ inaa kà Abihaili nɛ́ Ɛsita kũ a disɛ̃ Mↄdekai a sɛ̀ nɛ́ ũ pìia, adi pↄ́ke gbɛkaro, séde pↄ́ kũ kína nↄgbɛ̃nↄ gwàri Egai pìi ònɛ baasiro. Ɛsita yã kà gbɛ̃ kũ ò a ènↄgu ń pínki. 16 Kína kíblena wɛ̃̀ supplade gũn ò gɛ̀ɛ kãao a bɛa mↄ kuride Tɛbɛ gũn. 17 Kína ye Ɛsitai de a nↄ kparanↄla ń pínki. A yã kàagu, à kɛ̀nɛ mana de nↄkpare kparanↄla ń pínki, akũ à kína nanↄ fùraa kùnɛ à a dìtɛ a nↄ Vasati gɛ̃nɛ ũ. 18 Akũ kína pì dikpɛ pↄ́ble kàkara gbãnadenↄnɛ kũ a ìbanↄ Ɛsita sɛna yã musu. À dìtɛ kũ ò dikpɛ zↄ̃kↄ̃ kɛ, akũ ò a kpàkpaa kɛ̀ bùsu kũ bùsuuo, akũ à gba dà gbɛ̃nↄnɛ à gɛ̃̀ ↄla.

Mↄdekai kũ Amanao

19 Nↄkparenↄ kakarana gɛ̃̀n pladen Mↄdekai vutɛna kínabɛ gãnu gũn. 20 Ɛsita dí a bɛ bùsu ke a buriyã o gbɛ̃ke màro lákũ Mↄdekai ònɛ nà. À tɛ̀ Mↄdekai yãi lákũ àdigↄ̃ kɛ nà zaa gↄrↄ kũ àtɛni a gwa. 21 Kũ Mↄdekai vutɛna kínabɛ gãnu gũn lɛ, kína Asueru dogari zɛ́dãkpãri gbɛ̃nↄn planↄ pↄ fɛ̃̀ kínai, akũ ò lɛ́ kpàkũsũi ò a dɛ. Ń tↄ́n dí: Bigitana kũ Tɛrɛsio. 22 Kũ Mↄdekai yã pìi mà kpãni, à ò kína nanↄ Ɛsitanɛ, akũ Ɛsita ò kínanɛ kũ Mↄdekai tↄ́o. 23 Ò yã pìi gwàgwa ò è yãpuramɛ, akũ ò gbɛ̃nↄn pla pìnↄ lòko lía ò gà. Ò yã pìi kɛ̃̀ bùsu gĩayãkɛna takadan kína wára.

<- ƐSITA 1 ƐSITA 3 ->