5 Sinɑ boko wi u wɑ̃ɑ sɔ̃ɔ yɛ̃sɑn nɔm dwɑru giɑn bɑndɑ ko n dɑm mɔ. Adɑmɑ win sinɑ ɑsɑkpɔ turo u koo nùn dɑm kerɑ kpɑ u nùn tɑɑre. Win dɑm mɛ, mu ko n kpɑ̃. 6 Wɔ̃su gɑsun biru, bɑ koo ɑrukɑwɑni bɔkunɑ kpɑ sinɑ boko wi u wɑ̃ɑ sɔ̃ɔ yɛ̃sɑn nɔm dwɑru giɑn bii wɔndiɑ u nɑ sɔ̃ɔ yɛ̃sɑn nɔm geu giɑn sunɔn mi bu kɑ ɑrukɑwɑni bɔke, bu suɑnɑ. Adɑmɑ wɔndiɑ win dɑm mu koo kpe. Durɔ win tii u koo gbi, wi kɑ win bibun bweseru. Bɑ koo mɑm wɔndiɑ win tii go kɑ be bɑ nùn yɔ̃sirimɑ kɑ win tundo kɑ tɔn be bɑ kɑ nùn yɔ̃rɑ wɑɑti ye sɔɔ kpuro gesi. 7 Goo u koo se nge kpii pɔturɑ kurɔ win bweserun di u win tundon bɑndu di. Kpɑ u nɑ u sinɑ boko wi u wɑ̃ɑ sɔ̃ɔ yɛ̃sɑn nɔm geu giɑ mi wɔri gbɑ̃rɑnu sɔɔ u ko ye u kĩ. Yɛ̃ro u koo dɑm ko. 8 U koo ben bũnun bwɑ̃ɑrokunu gurɑ ni bɑ kuɑ kɑ sii gɑndu kɑ ben gɑ̃ɑ gee ni bɑ kɑ wurɑ kɑ sii geesu kuɑ u kɑ dɑ Egibitiɔ. Kpɑ u kɑ sinɑ boko wi u wɑ̃ɑ sɔ̃ɔ yɛ̃sɑn nɔm geu giɑ mi tondɑ sɑɑ fiiko. 9 Yen biru, sunɔ wi u wɑ̃ɑ sɔ̃ɔ yɛ̃sɑn nɔm geu giɑ u koo dɑ u sɔ̃ɔ yɛ̃sɑn nɔm dwɑrugii tɑbu wɔri kpɑ u gɔsirɑmɑ win temɔ.
10 Sɑɑ ye sɔɔrɑ win bibu bɑ koo tɑbun sɔɔru ko kpɑ bu tɑbu kowobu mɛnnɑ bɑ n dɑbi too too. Bii ben turo u koo tɑbu se wi kɑ win tɑbu kowobu gɑbu, kpɑ u win tem nɔɔ burɑ yeru sɑrɑ nge dɑɑ te tɑ nim yibɑ tɑ bɔ̃ɔ sɑrɑmɔ. U koo sɔ̃ɔ yɛ̃sɑn nɔm dwɑru giɑn sunɔn gbɑ̃rɑru wɔri kpɑ u gɔsirɑ u wurɑmɑ. 11 Sɑɑ ye sɔɔ, sinɑ boko wi u wɑ̃ɑ sɔ̃ɔ yɛ̃sɑn nɔm dwɑru giɑ mi, u koo mɔru se kpɑ u nɔm geugii wi, tɑbu wɔri. Nɔm geugii wi, u koo mɑɑ tɑbu kowo dɑbi dɑbinu mɛnnɑ bu wiɔnɔ wɔri. Adɑmɑ bɑ koo nɔm geugii win tɑbu kowo be kɑmiɑ. 12 Sɔ̃ɔ yɛ̃sɑn nɔm dwɑrugii wi, u koo tii suɑ win nɑsɑrɑ yen sɔ̃. U koo tɑbu kowo dɑbinu go. Adɑmɑ kɑ mɛ, u ǹ nɑsɑrɑ wɑsi mɑm mɑm. 13 Yenibɑn biru, sinɑ boko wi u wɑ̃ɑ sɔ̃ɔ yɛ̃sɑn nɔm geu giɑ mi, u koo mɑɑ tɑbu kowo dɑbi dɑbinu mɛnnɑ n kere be u rɑɑ mɛnnɑ yellu. Wɔ̃su gɑsun biru, u koo wurɑmɑ kɑ tɑbu kowo be, kɑ tɑbu yɑ̃ɑ geenu u nɔm dwɑrugii wi wɔri. 14 Sɑɑ ye sɔɔ, tɔn dɑbinu nu koo sinɑ boko wi u wɑ̃ɑ sɔ̃ɔ yɛ̃sɑn nɔm dwɑru giɑ seesi. Tɔn kɔ̃sobu bɑ koo mɑɑ nùn seesi wunɛ Dɑniɛlin tɔmbun suunu sɔɔn di wunɛn kɑ̃si ten gɑri yi kɑ koorɑ. Adɑmɑ bɑ koo ben tii kɑmiɑ. 15 Sɔ̃ɔ yɛ̃sɑn nɔm geugii wi, u koo tem tɑkɑnu ko kpɑ u wuu gbɑ̃rɑrugisu mwɛɛri. Sɑɑ ye sɔɔ, bɑ koo sɔ̃ɔ yɛ̃sɑn nɔm dwɑrugii wi, kɑ win tɑbu kowo dɑmgibu kɑmiɑ. Domi bɑ ǹ dɑm wɑsi bu kɑ tɑbu ko. 16 Wi u gesi seewɑ u nɔm geugii wi wɔri kpuro, yɛ̃ro u koo kowɑ ye u kĩ. Goo kun kpɛ̃ u nùn yinɑri. Yɛ̃ro u koo mɑm dɑ tem mɛn mi n burɑm bo sɔɔ, kpɑ u go ye u nɔmɑ turɑ. 17 Yen biru, u koo gɔ̃ru doke u nɑ kɑ win tɑbu kowobu kpuro kpɑ u kɑ nɔm dwɑrugii wi bɔri yɛndun ɑrukɑwɑni bɔke u nùn win bii wɔndiɑ wɛ̃ u suɑ kurɔ, kpɑ u kɑ swɑɑ wɑ u win tem kɑm koosiɑ. Adɑmɑ win bwisi yi, yi ǹ nùn yɑrɑmɔ. 18 Yen biru, u koo sĩirɑ wuu si su wɑ̃ɑ nim wɔ̃kun bɔkuɔ kpɑ u sin dɑbinu mwɛɛri. Adɑmɑ tɑbu sunɔ goo u koo win dɑm mɛ buɑ sere u kpɑnɑ u mɔru kɔsiɑ. 19 Sɑɑ ye sɔɔrɑ u koo gɔsirɑmɑ win temɔ u kɑ kuke win wuu gbɑ̃rɑrugisu sɔɔ, ɑdɑmɑ u koo wɔrumɑ u gbi, bɑ ǹ mɑɑ win yirɑ wɑsi. 20 Wi u koo nùn kɔsire ko, u koo dɑm dio doke tem mɛn mi n burɑm bo sɔɔ. Adɑmɑ ɑmɛn biru, dɑm dio wi, u koo bɔɔkirɑ, n ǹ mɔ mɔrun sɔ̃, n ǹ mɑɑ mɔ tɑbu sɔɔ.
21 Wi bɑ gɛmɑ, wiyɑ bɑ koo bɑndu kɔsire ko. Bɑ ǹ nùn sinɑ yɑ̃nu wɛ̃ɛmɔ. Bɔri yɛndu sɔɔrɑ u koo nɑ u bɑndu di kɑ tɑki. 22 Tɑbu kowo be bɑ koo yɑri bu nùn wɔrimɑ nge nim, u koo bu kɔsukuwɑ u kpeerɑsiɑ, bɑɑ kɑ mɑm be bɑ ɑrukɑwɑni bɔkuɑn wirugii turo. 23 U koo tɔn be u kɑ ɑrukɑwɑni bɔkuɑ nɔni wɔ̃ke. U koo bɑndu di kpɑ u dɑm wɑ kɑ tɔmbu fiiko. 24 U koo dɑ berɑ mi tem gem wɑ̃ɑ kɑ bɔri yɛndu kpɑ u ko ye win bɑɑbɑbɑ kɑ win sikɑdobɑ bɑ ǹ dɑɑ koore. U koo tem mɛn dukiɑ gurɑ kpɑ u win bɔrɔbɑ bɔnu kuɑ. U koo mɑm bwisiku u gbɑ̃rɑnu wɔri. Adɑmɑ u ǹ yeni mɔ̀ n kɑ tɛ.
25 U koo win dɑm kɑ win wɔrugɔru kɑ win tɑbu kowobu dendi u kɑ sɔ̃ɔ yɛ̃sɑn nɔm dwɑrugii wi wɔri. Nɔm dwɑrugii wi, u koo mɑɑ se kɑ tɑbu kowo dɑmgii dɑbinu, ɑdɑmɑ u ǹ kɑmiɑmɔ. Domi bɑ koo nùn murɑfitiru kuɑwɑ. 26 Be bɑ kɑ nùn dimɔ, beyɑ bɑ koo nùn kɑm koosiɑ. Bɑ koo win tɑbu kowobu yɑrinɑsiɑ nge dɑɑ torɑn nim kpɑ bu gbisuku dɑbi dɑbinu. 27 Sinɑmbu yiru ye, bɑ koo kɑsu bu kɔ̃sɑ ko, kpɑ mi bɑ dimɔ mi, bu weesu kuɑnɑ. Adɑmɑ yen gɑɑ kun dimɔ. Domi kɑm koo bi, bu koo nɑwɑ sɑɑ ye bɑ yi mi, yɑ̀ n turɑ. 28 Sinɑ boko wi u wɑ̃ɑ sɔ̃ɔ yɛ̃sɑn nɔm geu giɑ, u koo gɔsirɑ win temɔ kɑ dukiɑ bɑkɑ. Swɑɑ sɔɔ, u koo Isireli be Gusunɔ u kɑ ɑrukɑwɑni bɔkuɑ seesi. Yen biru, u koo gɔsirɑ u dɑ win temɔ.
29 Sɑɑ ye bɑ yi yɑ̀ n tunumɑ, nɔm geugii wi, u koo sɔ̃ɔ yɛ̃sɑn nɔm dwɑrugii wi seesi kpɑm. Adɑmɑ u ǹ nɑsɑrɑ wɑsi nge mɛ u rɑɑ wɑ yellu. 30 Domi tɔmbɑ koo nɑ sɑɑ Kitimun di kɑ goo nimkusu bu nùn wɔri. Sɑɑ ye sɔɔ, win kɑbiɑ yɑ koo bɔɔrɑ, kpɑ u gɔsirɑ u wurɑ. U koo Isireli be Gusunɔ u kɑ ɑrukɑwɑni bɔkuɑ mi, mɔru seesi kpɑ u n kɑ be bɑ ɑrukɑwɑni ye deri nɔɔ tiɑ sɑ̃ɑ. 31 U koo tɑbu kowobu sure bu Yinni Gusunɔn sɑ̃ɑ yeru kɑ ten ɑgbɑrɑ disi doke. Kpɑ bu tɔ̃ɔ bɑɑteren yɑ̃kunu kpeesiɑ. Kpɑ bu kɑm koosion bwɑ̃ɑroku kɔ̃su girɑ yɑ̃ku yeru mi. 32 U koo tɔmbu nɔni wɔ̃ke be bɑ Yinni Gusunɔn ɑrukɑwɑni ye deri. Adɑmɑ tɔn be bɑ Yinni Gusunɔ yɛ̃, bɑ ko n yɔ̃wɑ dim dim ben dɑɑ geɑ sɔɔ. 33 Be bɑ bwisi mɔ, bɑ koo dɑbinu keu ko. Sɑɑ fiiko sɔɔ, bɑ koo gɑbu go tɑbu sɔɔ, kpɑ bu gɑbu dɔ̃ɔ mɛni, kpɑ bu gɑbu yoru mwɛɛri, kpɑ bu gɑbun yɑ̃nu gurɑ. 34 Sɑɑ ye sɔɔ, bɑ koo somiru fiiko wɑ. Tɔn dɑbirɑ bɑ koo kɑ bu nɔɔ tiɑ ko kɑ murɑfitiru. 35 Bwisigii ben gɑbɑ koo gbi bu kɑ bu sɔwɑ bu dɛɛrɑ mɑm mɑm sere kpeerun tɔ̃ru tu kɑ tunumɑ. Domi yeni yɑ koo koorɑwɑ sɑɑ ye bɑ yii sɔɔ.
36 Sinɑ boko wi, u koo ko ye u kĩ. U koo tii suɑ u nɛɛ, wiyɑ u bũnu kpuro kere. Kpɑ u Gusunɔ wi u kpuro kere wɔmɛ. Wɔmbu te, tɑ ǹ kɑ nɔɔ gerurɔ. Tɔmbu bɑ koo nùn nɑɑnɛ ko sere Gusunɔn mɔru yu kɑ sɔ̃ɔsirɑ. Domi ye wi, Gusunɔ u geruɑ, yɑ koo koorɑwɑ. 37 U ǹ win sikɑdobɑn bũnu gɑsirimɔ, u ǹ mɑɑ bũu wi tɔn kurɔbɑ kĩ gɑsirimɔ, bũnu kpuro gesi. Domi u koo tii suɑ n kpuro kere. 38 Adɑmɑ u koo bũu sɑ̃ wi u rɑ n gbɑ̃rɑnu kɔ̃su wi win sikɑdobɑ bɑ ǹ yɛ̃. U koo nùn sɑ̃ kɑ wurɑ kɑ sii geesu kɑ kpee gobiginu, kɑ sere gɑ̃ɑ ni nu gobi mɔ. 39 U koo wuu si su gbɑ̃rɑru mɔ tɑbu wɔri kɑ win bũu wi u wɑ tem tukum di. U koo be bɑ bũu wi wurɑ bɛɛrɛ wɛ̃, kpɑ u de bu bɑndu di tɔn dɑbinun wɔllɔ, kpɑ u bu tem bɔnu kuɑ mu n sɑ̃ɑ ben ɑre.
40 Kpeerun sɑɑ sɔɔ, sinɑ boko wi u wɑ̃ɑ sɔ̃ɔ yɛ̃sɑn nɔm dwɑru giɑ u koo kɑ mɑɑ nùn sɑnnɑ. Adɑmɑ sɔ̃ɔ yɛ̃sɑn nɔm geugii wi, u koo nɔm dwɑrugii wi wukiri nge woo bɔkɔ kɑ tɑbu kɛkɛ ye dumi gɑwe kɑ mɑɑsɔbu kɑ goo nimkuu dɑbiru. Kpɑ u win tem wɔri u sɑrɑ nge mɛ nim mu rɑ dɑɑru yibu mu sɑre. 41 Kpɑ u mɑɑ wɔri tem mɛn mi n burɑm bo sɔɔ. Adɑmɑ Edɔmubɑ kɑ Mɔɑbubɑ kɑ sere Amɔnibɑn wirugibu bɑ koo nùn kisirɑri. 42 U koo tem dɑbinu nɔmɑ sikerenɑ. Egibitigibu bɑ ǹ mɑm kisirɑmɔ win nɔmɑn di. 43 Sunɔ wi, u koo Egibitigibun wurɑbɑ kɑ ben sii geesu kɑ ben yɑ̃ɑ gobiginu gurɑ. Libigibu kɑ Etiopigibu bɑ koo nùn sɑ̃. 44 Lɑbɑɑri yɑ koo nɑ sɑɑ sɔ̃ɔ yɑri yeru giɑn di kɑ sɔ̃ɔ yɛ̃sɑn nɔm geu giɑn di yu nùn nɑndɑsiɑ. Sɑɑ ye sɔɔrɑ u koo mɔru bɑkɑ se u tɔn dɑbinu go. 45 U koo win sinɑ kunu girɑ nim wɔ̃ku kɑ Yinni Gusunɔn guu dɛɛrɑ ten bɑɑ sɔɔ. Sɑɑ yerɑ gɔɔ u koo nùn deemɑ subɑru bɑ kun nùn somi.
<- Dɑniɛli 10Dɑniɛli 12 ->