KƆLƆSEDENƆ 2

1 Má ye àgↄ̃ kokari zↄ̃kↄ̃ kũ matɛn kɛárɛ dↄ̃, ákↄ̃nↄ kũ Laodiseadenↄ kũ gbɛ̃ kũ ódi wɛ́ sikↄ̃lɛronↄ pínki, 2 de ń swɛ̃̀ le à kpátɛ, ò lɛ́dokↄ̃nↄ kɛ kũ yenyĩo, de ń wɛ́ kɛ̃ swáswa, ògↄ̃ Luda asiriyã kũ à de Kirisi pì ũ dↄ̃. 3 A kĩnaan ↄ̃ndↄ̃ kũ dↄ̃naao aruzɛkɛ sĩnda pínki ùtɛn. 4 Matɛni abire oárɛ, de gbɛ̃ke sún á sãtɛ kũ lɛ́nna lɛ́kpakↄ̃anaaoro yãi. 5 Bee tó má kú kãáoro, ma nini kú kãáo, ma è átɛn yã kɛ a zɛ́a, akũsↄ̃ á Kirisi náanikɛna gbãna, akũ ma pↄ kɛ̀ nna.

Pↄ́ sĩnda pínki pɛkɛrɛmmana Kirisi gũn

6 Lákũ a Kirisi Yesu sì á Dikiri ũ nà, àgↄ̃ kú a gũn lɛ, 7 á zĩni gↄ̃ pɛtɛna a gũn. À kara a gũn, àgↄ̃ gbãna a náanikɛnaa gũn lákũ ò dàárɛ nà. Àgↄ̃ kú kũ sáabukpanaao manamana. 8 À laakari kɛ de gbɛ̃ke sún dↄ̃na gbãna kasaárɛ à á sãtɛ kũ bisãsiri ↄ̃ndↄ̃ pã korioro. Yã birenↄ dì bo futɛokarayãnↄ kũ andunia yãkɛnanↄ kĩnaamɛ, adi kɛ Kirisi kĩnaanlo. 9 Zaakũ Luda kíkɛ sĩnda pínki pɛ̀kɛrɛ Kirisia a bisãsirikɛmɛɛ gũn. 10 Kunna gbɛ̃ kũ à de gbãna sĩnda pínki kũ iko sĩnda pínkioo mìde ũ pìi gũn, a sĩnda pínki pɛ̀kɛrɛáwa. 11 A gũn a tↄ̃̀ↄ zↄ̃̀ à bò á dà zĩn. Adi kɛ tↄ̃̀ kũ bisãsiri dì zↄ̃ńnɛnlo, kũ Kirisi dì zↄ̃ńnɛmɛ. 12 Zaakũ da'itɛkɛnaa gũn ò á vĩ kãao, akũ a futɛ kãao, kũ a gbãna kũ Luda a fùtɛo bona gan náani kɛ̀ yãi. 13 Á de gɛ̀nↄ ũ yã Luda kĩnaa á taarinↄ kũ á dà zĩnↄ yãi, akũ Luda á gbá wɛ̃̀ndi dufu lɛɛlɛ kũ Kirisio, à sùruu kɛ̀ kũoo kũ ó taarinↄ pínki. 14 Luda ó taari takada kũ à ó dá yãn gògo, à sɛ̀ à pà lía. 15 Kirisi gana lía gbãna sì dikirinↄ kũ gbãnadenↄooa, à bò kũńwo sarapuraa à ń kpe bò, à ń kpan'arɛ kɛ̀ zĩ̀zↄnↄ ũ.

16 Abire yãi àsun tó gbɛ̃ke á taari e pↄ́blena ke pↄ́mina ke dikpɛ ke mↄ dufu bona ke kámmabogↄrↄ yã musuro. 17 Yã birenↄ pínki bi yã kũ ò pì ani su takamɛ, yã pìnↄ bↄkↄtɛnan Kirisi ũ. 18 Àsun tó gbɛ̃ kũ àdi a zĩda busa ɛ́kɛ pↄ́ ũ kũ àdi donyĩ kɛ malaikanↄnɛ á sãtɛ à á bo pↄ́ kũ á wɛ́ pɛ́anlo. Wɛ́gupu'ena yã mɛ́ àdigↄ̃ gbãna gbɛ̃ bire takanɛ, akũ àdi a zĩda bi pã a bisãsirikɛda laasunnↄ yãi. 19 À pɛna Kirisi kũ à de mì ũaro. Kirisi gũn mɛ̀gu sĩnda pínki dì kↄ̃ kũ, ò nàkↄ̃a kũ tĩnↄ gbãnao, mɛ̀ɛ pìi dìgↄ̃ gbã lákũ Luda ye à gbã nà.

20 Zaakũ a ga kũ Kirisio andunia yãkɛnanↄ musu, bↄ́yãin adì ń yãditɛnnɛnanↄ ma lán andunia gbɛ̃nↄ bàa? 21 Òdi pi, ǹsun adikĩna na n ↄĩro, ǹsun adikĩna í kɛro, ǹsun ↄ na adiaro. 22 Pↄ́ birenↄ pínki dì láka kũ ń anfãnikɛnaaomɛ. Bisãsiri yãdannɛnan abirenↄ ũ. 23 Yã birenↄ de lán ↄ̃ndↄ̃ yã bàmɛ, zaakũ òdi donyĩ yã tilasi dańnɛ kũ zĩdabusanaao kũ waridↄna ń zĩda mɛ̀ɛao. Bee kũ abireo àdi kpá ó dànↄnɛro.

<- KƆLƆSEDENƆ 1 KƆLƆSEDENƆ 3 ->