1 Kũ Solu nɛ́ Isibosɛ mà Abana gà Ɛblↄnu, a kã gà, akũ Isarailanↄ gↄ̃̀ bídi gũn ń pínki. 2 Solu nɛ́ pìi zĩ̀kari gbɛ̃ zↄ̃kↄ̃nↄ vĩ gbɛ̃nↄn pla, a do tↄ́n Baana, a do sↄ̃ Rekabu. Bero gbɛ̃ Rimↄ, Biliaminu buri nɛ́nↄmɛ. Ò Bero dìtɛ Biliaminu bùsu pↄ́ ũ yãmɛ, 3 zaakũ Berodenↄ bàa lɛ̀ ò tà Gitaimu ò kú gwe ari kũ a gbãrao. 4 Solu nɛ́ Yonatã sↄ̃ à nɛ́ vĩ ɛrɛ ũ. Gↄrↄ kũ nɛ́ pìi kà wɛ̃̀ sↄↄro, akũ Solu kũ Yonatão gana Yɛzɛrili baaruu sù. Kũ a gwàri a sɛ̀ àtɛn bàa lɛ́ kãao, a wãnaa gũnn nɛ́ pìi pìtia à lɛ̀tɛ. Abire mɛ́ à tò à ɛrɛ kũ̀. A tↄ́n Mɛfibosɛ.

5 Bero gbɛ̃ Rimↄ nɛ́ pìnↄ Rekabu kũ Baanao fùtɛ, ifãntɛ̃ gbãnai ò kà Isibosɛ bɛa, gↄrↄ kũ àtɛn i fãnantɛ̃ o. 6 Akũ Rekabu kũ a dakũna Baanao gɛ̃̀ kpɛ́n ò kɛ̀ lándↄ̃ òtɛn gɛ́ pↄ́blewɛ dã bà. 7 Kũ ò gɛ̃̀ kpɛ́n, Isibosɛ wutɛna a gádoa, akũ ò gɛ̃̀i kpɛ́nɛ gũn ò a zↄ̃̀ ò dɛ̀. Akũ ò a mìi zↄ̃̀ ò sɛ̀ ò tào. Ò pɛ̀tɛ Yoda sɛ̃̀n, akũ ò táa ò ari gu gɛ̀ɛ à dↄ̀o. 8 Ò sù Dauda kĩnaa Ɛblↄnu kũ Isibosɛ mìio ò pìnɛ: Ǹ gwa, n ibɛrɛ Solu kũ à wɛ̀tɛ à n dɛ nɛ́ Isibosɛ mìin dí. Ó dikiri kína, Dikiri fĩnaa bònnɛ Solu kũ a burinↄa gbãra. 9 Dauda wèḿma à pì: Dikiri kun! À ma bo ma warikɛnaa gũn pínki. 10 Kũ gbɛ̃ke sù ma kĩnaa Zikilaga yã à pì Solu gà, àtɛn da baaru nnan átɛn kpá, akũ ma a kũ̀ ma dɛ̀. A baaru àreen gwe. 11 Dí deńla lákũ ákↄ̃nↄ gbɛ̃ vãninↄ a taarisaride dɛ̀ a gádoa a kpɛ́n nà. Mani a dɛna fĩna boáwa mà á wɛ̃̀ndi bo se. 12 Akũ Dauda yã ò a gbɛ̃nↄnɛ, akũ ò ń dɛdɛ. Ò ń ↄla kũ ń gbálanↄ zↄ̃̀zↄ̃, akũ ò ń gɛ̀nↄ lòko Ɛblↄnu ítↄki sarɛ. Akũ ò Isibosɛ mìi sɛ̀ ò vĩ̀ Abana miran zaa Ɛblↄnu.

<- 2 SAMUƐLI 32 SAMUƐLI 5 ->