1 Ó gbɛ̃nↄ, ó ye àgↄ̃ gbɛ̃kɛ kũ Luda kɛ̀ Masedonia bùsu sↄsinↄ gbɛ̃nↄnɛ dↄ̃. 2 Ń yↄ̃ogwanaa kũ wɛ́tãmma pãsĩo gũn, ń pↄ kɛ̀ nna manamana, akũ bee kũ ń takaside búgubugukɛo ò gba dàńnɛ à gɛ̃̀ ↄla. 3 Ma òárɛ ò gba dà kũ nɛ̀sɛ mɛ̀n doo ń gbãna lɛ́n, à de ń gbãnala se. 4 Ò wɛ́ kɛ̀wá ń zĩda, ò kútɛ kɛ̀wɛrɛ manamana, ò ń gba zɛ́ ń ↄ le àgↄ̃ kú Luda gbɛ̃nↄ kámazakɛnaa gũn. 5 Ò kɛ̀ de pↄ́ kũ ó wɛ́ dↄila, ò ń zĩda kpà Dikiria gĩa kũ ókↄ̃nↄ dↄ Luda pↄyenyĩnaa gũn. 6 Abire yãi o wɛ́ kɛ̀ Titua à gɛ́ kámaza yã kũ à nàa á tɛ́ lakiti kɛ. 7 Zaakũ á gbãna yã sĩnda pínki gũn, ludanaanikɛnaa kũ yã'onaao kũ dↄ̃naao kũ yã sĩnda pínki aniao kũ yenyĩ kũ á vĩ kũooo, àgↄ̃ gbãna kámaza pì kɛnaa gũn dↄ.

8 Adi kɛ matɛn yã ditɛárɛnlo, ania kũ gbɛ̃ pãndenↄ kɛ̀ɛn matɛn oárɛ, de mà á yenyĩ yãpura dↄ̃. 9 Á ó Dikiri Yesu Kirisi gbɛ̃kɛ dↄ̃. Pↄ́de inaa gↄ̃̀ pↄ́saride ũ á yãi, akũ a pↄ́saridekɛ gũn à á kɛ́ pↄ́denↄ ũ. 10 Lákũ ma è nà yã pìi musun dí: À kũ̀ ákↄ̃nↄ kũ a zɛ kũ yã pìio zaa muniyã akũsↄ̃ átɛn kɛnↄ, 11 à yã pì lakiti kɛ sà. Zaakũ á soru kɛ̀ kũ a kɛnaao, à kɛ á gbãna lɛ́n. 12 Tó gbɛ̃ gba dà kũ nɛ̀sɛ mɛ̀n doo pↄ́ kũ à vĩ lɛ́n, adi kɛ kũ pↄ́ kũ à vĩronlo, abire mɛ́ àdi ká. 13 Adi kɛ matɛn aso lago gbɛ̃ pãndenↄnɛ, matɛn diárɛnlo, de à kɛ lɛɛlɛmɛ. 14 Tera lán dí bà zaakũ pↄ́ dìái, à kpá gbɛ̃ kũ pↄ́ àdi kĩammanↄa, de zĩkea tó pↄ́ dìńyĩ, akũsↄ̃ pↄ́ kĩ̀aáwa, ò kpááwa. Lán abire bà ánigↄ̃ lɛɛlɛ. 15 Lákũ à kɛ̃na Luda yãn nà ò pì:

16 Ma sáabu kɛ̀ kũ Ludao, kũ à tò á yã kú Titu swɛ̃̀n lákũ à kú ma swɛ̃̀n nà se. 17 À ó yã mà, a mɛ̀ɛ wã̀ à su á gwa, lákũ a pↄ yei nà. 18 Ó gbɛ̃ do kũ a tↄ́ dàgula sↄsinↄ gbɛ̃nↄ tɛ́ ń pínki baarunnakpanaa musun o dànɛ. 19 Abire gbɛra dↄ sↄsinↄ gbɛ̃nↄ a dà à gɛ́ kũoo kámaza zĩ kũ ótɛn kɛ kɛ. Ótɛn zĩ pì kɛ Dikiri tↄ́bona yãimɛ kũ ania kũ ó vĩo. 20 Ó ye gbɛ̃ke ó taari e lákũ ótɛn kɛ nà kũ gba zↄ̃kↄ̃ kũ à na ó ↄĩ yãoro. 21 Adi kɛ yã kũ à mana Dikirinɛɛn ótɛn pɛ́a adoro, yã kũ à mana bisãsirinↄnɛmɛ se. 22 O ó gbɛ̃ndo pãnde dàńnɛ dↄ. O a laakarii gwà a lɛ́ vĩro, o è à ania vĩ yã sĩnda pínki gũn, akũsↄ̃ a ania ɛ̀ra à kàra tera, kũ à á náanikɛna yãi. 23 Titu dake sↄ̃, ma zĩkɛri dake kũ odì á mana wɛtɛ lɛɛlɛn a ũ. Ó gbɛ̃ kparanↄ sↄ̃, sↄsinↄ gbɛ̃nↄ zĩ̀rinↄmɛ, mↄ́kↄ̃nↄmɛ Kirisi tↄ́borinↄ ũ. 24 Abire yãi à mↄńnɛ kũ á yeńyĩ, de sↄsi gbɛ̃ pìnↄ gↄ̃ dↄ̃ kũ lɛ́ kũ ótɛn gbɛ̃ á yã musu bi yãpuramɛ.

<- 2 KƆRINTIDENƆ 72 KƆRINTIDENƆ 9 ->