2 À tó ó yã gↄ̃ kú á swɛ̃̀n. Ódi taari kɛ gbɛ̃kenɛro, ódi gbɛ̃ke sãtɛro, ódi gbɛ̃ke taki kɛro. 3 Mádi abire o mà yã daálanlo. Ma ò yã kↄ̀ kũ á yã kú ó swɛ̃̀n ò ga lɛɛlɛ ke ògↄ̃ kun lɛɛlɛmɛ. 4 Má á náanikɛna manamana, madì lɛ́ gbɛ̃ á yã musu manamana. Ó warikɛnaa gũn pínki ma laakari kpatɛna mɛ́tɛmɛtɛ, ma pↄ kɛ̀ nna à gɛ̃̀ ↄla. 5 Bee kũ o ka Masedonia bùsun, ó mɛ̀ dí kpátɛro. Wari lìkawái kpa sĩnda pínkia, ò fùtɛwái kũ fìtio, vĩna ó kũ. 6 Akũ Luda kũ àdi gbɛ̃ kũ ò bùsanↄ sɛ́ lei ó sɛ́ lei Titu sunaa gũn. 7 Adi kɛ a sunan adoro, kũ a a sɛ̀ lei yãimɛ dↄ. À pìwɛrɛ átɛni ma bɛgɛ kɛ, á kú díndↄ̃mɛnɛ gũn, ma yã á kũna gbãna sà, akũ ma pↄnna kàra.

8 Bee kũ takada kũ ma kɛ̃̀árɛ á nɛ̀sɛɛ yàka, mádi nɛ̀sɛ litɛro. Kũ ma è takada pì á nɛ̀sɛɛ yàkaárɛ gↄrↄ pla, de ma nɛ̀sɛ lìtɛ yã, 9 ama ma pↄ kɛ̀ nna sà. Adi kɛ kũ ma á pↄ yàkaárɛ yãinlo, kũ á pↄsira tò a nɛ̀sɛɛ lìtɛ yãimɛ. Á nɛ̀sɛyakanaa pìi bò Luda kĩnaamɛ. Abire yãi ódi ásaru kɛárɛro. 10 Pↄsira kũ à bò Luda kĩnaa, àdi tó gbɛ̃ nɛ̀sɛ litɛ à surabana le, ani díndↄ̃mɛnɛ kɛro. Andunia pↄsira mɛ́ àdi ga ińnɛ. 11 À gwa pↄ́ kũ pↄsira kũ à bò Luda kĩnaa pì ìárɛ. Á mɛ̀ɛ wã̀ sà, a gi kũ á zĩdao, á laakarii fùtɛ, vĩna á kũ, a ma bɛgɛ kɛ̀, a wɛ́ tã̀, a ń sã gà. Yã pìi gũn pínki a á zĩda mↄ̀ńnɛ kũ á taari vĩ yã pìi gũnlo.

12 Bee kũ ma takada pìi kɛ̃̀árɛ, adi kɛ gbɛ̃ kũ à taari kɛ̀ ke gbɛ̃ kũ ò taari kɛ̀nɛ yãinlo, ma kɛ̃̀ Luda dↄ̃naa gũmmɛ, de á yenawái le à boárɛ gupuraa. 13 Abire yãi ó laakari kpatɛna. Ó laakari kpatɛnaa pìi gbɛra, ó pↄnna kàra manamana Titu pↄnna yã musu, kũ á pínki a tò a nini sù yãi. 14 Ma lɛ́ gbɛ̃̀nɛ kũ á yão yã, ádi tó wé'i ma kũro. Lákũ o yãpura òárɛ yã sĩnda pínki gũn nà, lɛn ó lɛ́gbɛ̃na Titunɛ kɛ̀ yãpura ũ lɛ. 15 Lákũ a bɛ̀ɛrɛɛ lìnɛ nà, a a kpe tà, akũsↄ̃ a a yã mà á pínki, tó à dↄ̀ á yã pìin, a yenaái dì karamɛ. 16 Ma pↄ dìgↄ̃ nna, kũ má á náanikɛna yã sĩnda pínki gũn yãi.

<- 2 KƆRINTIDENƆ 62 KƆRINTIDENƆ 8 ->