1 Abire yãi lákũ Luda zĩ bire dàwɛrɛ a sùruu gũn nà, odì kpasaoro. 2 O ↄ gbàrɛ asiri wé'isariyãnↄi, odì yã kɛ kũ manafikioro, akũsↄ̃ odì Luda yã kotiro. Odì yãpura ońnɛ súsu, de ò ó zĩda mↄ gbɛ̃ sĩnda pínkinɛ Luda arɛ. 3 Tó baaru nna kũ ótɛn kpá utɛnamɛ, gbɛ̃ kũ ò sãtɛnanↄn à utɛnańnɛ. 4 Zaakũ andunia díkĩna dikiri Yesusaridenↄ wɛ́ vĩ̀na kũ̀ńnɛ, de òsun baaru nna sí, Kirisi kũ à de Luda taka ũ gakuri gu puńnɛro yãimɛ. 5 Ó zĩda kpàkpan ótɛn kɛro, Yesu Kirisi dikirikɛ kpàkpan ótɛn kɛ, akũsↄ̃ ótɛn zↄ̀ bleárɛ a yãi. 6 Luda pì, gu pu gusiran, akũ à gu pù ó swɛ̃̀n lɛ dↄ. Gupura pì de a gakuri kũ àtɛn tɛ́ kɛ Kirisi ãnnwa dↄ̃na ũ.

7 Ó aruzɛkɛ bire vĩ ó mɛ̀ kũ ò de lán ɛ̃ oro bànↄ gũn, de ò le ò dↄ̃ kũ gbãna zↄ̃kↄ̃ↄ pìi bò Luda kĩnaamɛ, adi kɛ ó kĩnaanlo. 8 Òdigↄ̃ wari dↄwá kpa sĩnda pínkia, bee kũ abireo odì fuaro. Òdi bídi kɛ, ama ó tãmaa dì lákaro. 9 Òdi wɛ́ tãwá, ama Luda dì ó tónlo. Òdi ó pãtɛ, ama odì garo. 10 Gↄrↄ sĩnda pínki ó kú Yesu ga taka buri lɛ́i, de a kunna le à pisi ó mɛ̀ɛa yãi. 11 Zaakũ ókↄ̃nↄ kũ ó bɛ̃nɛnↄ odìgↄ̃ kú ga lɛ́i Yesu yãi, de a kunna le à pisi ó mɛ̀ kũ ani gaa yãi. 12 Lɛn ga pì tɛn zĩ kɛ ó gũn lɛ, akũsↄ̃ wɛ̃̀ndi tɛn zĩ kɛ á gũn. 13 À kɛ̃na Luda takadan ò pì: Má Luda náani vĩ, akũ ma yã ò. Ókↄ̃nↄ sↄ̃, o Luda náani dokↄ̃nↄ pìi kɛ̀, akũ ótɛn yã o a yãi. 14 Zaakũ ó dↄ̃ kũ lákũ Luda Dikiri Yesu vù gan nà, ani ó vu kãao gan se, ani ó kátɛ a arɛ lɛɛlɛ kũ ákↄ̃nↄ. 15 Yã dínↄ pínki tɛni ó lé á yãi, de Luda gbɛ̃kɛ kũ àtɛn li gbɛ̃nↄi dasi le a sáabukpana kara a tↄ́bona yãi.

16 Abire yãi odì kpasaro. Bee tó ó mɛ̀ tɛn kakatɛ, ó nini dìgↄ̃ dufu kũ lákũ gu dìgↄ̃ dↄ nà. 17 Ó wɛ́tãmma gↄrↄ do lɛɛkɛɛnle díkĩna tɛn gakuri zↄ̃kↄ̃ kũ àdi lákaro iwɛrɛ, kũ adi sí lɛkↄ̃aro. 18 Ó wɛ́ pɛ́ pↄ́ kũ òdi wɛ́ sialɛaro, sé pↄ́ kũ òdi wɛ́ sialɛro. Zaakũ pↄ́ kũ òdi wɛ́ sialɛ bi gↄrↄ pla pↄ́mɛ. Pↄ́ kũ òdi wɛ́ sialɛro sↄ̃, àdigↄ̃ kun gↄrↄ sĩnda pínki.

<- 2 KƆRINTIDENƆ 32 KƆRINTIDENƆ 5 ->