1 À kũ̀ tilasi mà lɛ́ gbɛ̃. Bee kũ à àre vĩro, mani lɛ́ pá wɛ́gupu'enanↄa kũ yã kũ Dikiri mↄ̀mɛnɛnↄo sà. 2 Má gbɛ̃ke dↄ̃ Kirisi gũn, ò a sɛ̀ ò gɛ̀ɛ kãao ari ludambɛ aakↄ̃den, a wɛ̃̀ gɛ̃ro donsarin dí. À gɛ̀ɛ kũ mɛ̀ɛon yá, mɛ̀ɛ sarin yá, má dↄ̃ro, sé Luda. 3 Má dↄ̃ kũ ò ade pìi sɛ̀ ò gɛ̀ɛ kãao aruzennammɛ. À gɛ̀ɛ kũ mɛ̀ɛon yá, mɛ̀ɛ sarin yá, Luda mɛ́ à dↄ̃. 4 À yã kũ àdi sí oro mà, kũ bisãsiri ni fↄ̃ à babaro. 5 Mani lɛ́ gbɛ̃ ade yã musu, mani gbɛ̃ ma zĩda yã musuro, sé ma gbãnasarikɛ yã. 6 Bee tó mani lɛ́ gbɛ̃, adi kɛ má yↄ̃nkↄnlo, zaakũ yãpuran mani o. Ama mani lɛ́ gbɛ̃ro, de gbɛ̃ke sún ma ditɛ de pↄ́ kũ à èma ke yã kũ à mà ma lɛ́nlaro. 7 De màsun ĩa dã yã zↄ̃kↄ̃ kũ Luda mↄ̀mɛnɛnↄ musuro yãi, à pↄ́ sↄ̀tↄ ma mɛ̀ɛ gũn Setan zĩ̀ri ũ, àgↄ̃ wɛ́ tãma, de màsun ĩa dãro yãi. 8 Ma wɛ́ kɛ̀ Dikiria gɛ̃̀n aakↄ̃ yã pìi musu de à pↄ́ pì bo ma mɛ̀n, 9 akũ à pìmɛnɛ, a gbɛ̃kɛ kũ adì kɛmɛnɛ mↄ̀ma. Gbãnasarikɛ gũnn a gbãna papana dì bon. Abire yãi mani lɛ́ gbɛ̃ kũ pↄnnao ma gbãnasarikɛ musu, de Kirisi gbãna gↄ̃ kú ma gũn. 10 Abire yã mɛ́ à tò madì pↄnna kɛ kũ gbãnasarikɛo kũ wé'idammanaao kũ wario kũ takasio kũ wɛ́tãmmanaao Kirisi yãi, zaakũ gↄrↄ kũ gbãna kĩ̀aman madìgↄ̃ gbãna.

11 Ma yↄ̃nkↄyã kɛ̀, ákↄ̃nↄ mɛ́ a ma dan. Ákↄ̃nↄmɛ à de yã à ma sáabu kpá. Bee tó má kun pↄ́ke ũro, má kĩana zĩ̀ri kũ a ń dítɛ zↄ̃kↄ̃ↄ kũ̀nↄi yãke gũnlo. 12 Ma a kunna zĩ̀ri ũ mↄ̀árɛ kũ mɛnao manamana sèedakɛnanↄ kũ yãbonsarɛnↄ kũ daboyãnↄ gũn. 13 Bↄ́ mɛ́ à á kĩa sↄsinↄ gbɛ̃ kparanↄaa? Ke kũ mádi gↄ̃ á gbɛ̃kenɛ aso ũro yãii? À sùru kɛ kũmao kũ taari dio! 14 Tera sà ma soru kɛ̀ mà su á kĩnaa a gɛ̃̀n aakↄ̃deo, akũsↄ̃ mani gↄ̃ á gbɛ̃kenɛ aso ũro. Ákↄ̃nↄ matɛni á wɛtɛ, adi kɛ á pↄ́nↄn matɛn wɛtɛro. Zaakũ denↄ mɛ́ òdi aruzɛkɛ ditɛ ń nɛ́nↄnɛ, adi kɛ nɛ́nↄ mɛ́ òdi ditɛńnɛro. 15 Mani fↄ̃ mà pↄ́ kũ má vĩ deárɛ pínki, mà a zĩda kpááwa kũ pↄnnao. Tó ma yenaái tɛn kara, á yenamai ni lagon yá? 16 Bee kũ a we kũ mádi gↄ̃árɛ aso ũro, gbɛ̃nↄ dì pi, wɛ́zɛ̃rin ma ũ, ma pↄ́ sìáwa kũ ↄ̃ndↄ̃o. 17 Ma á blé gbɛ̃ kũ ma ń zĩáwanↄ ke gãi yá? 18 Ma kútɛ kɛ̀ Titunɛ à gɛ́ á kĩnaa, akũ ma ó gbɛ̃ndo dànɛ. Titu á blén yá? Ó nɛ̀sɛ dokↄ̃nↄnloo? Ó ágba dokↄ̃nↄnloo?

19 Átɛn da yã ótɛn boki wɛtɛn yá? Lɛnlo! Ótɛn yã o kũ Luda dↄ̃naao kunna Kirisi gũmmɛ. Ma gbɛ̃ yenyĩdenↄ, ma abire òárɛ pínki á zĩni pɛtɛna yãimɛ. 20 Vĩna tɛni ma kũ kũ tó ma su á kĩnaa, mani á le lákũ má ye nàro, akũsↄ̃ áni ma e lákũ á ye nàro. Matɛn vĩna kɛ fìtiinɛ kũ nɛ̀sɛgↄ̃baao kũ pↄfɛ̃o kũ ania pãsĩo kũ kↄ̃yakanaao kũ kↄ̃pinaao kũ ĩadãnaao kũ zukakanaao. 21 Vĩna tɛni ma kũ kũ tó ma ɛra ma su á kĩnaa, ma Luda ni tó wé'i ma kũ á arɛ. Gbɛ̃ kũ ò durunna kɛ̀ yã, ò gbãsĩ kɛ̀, ò pãpã kɛ̀, ò wé'isariyã kɛ̀nↄ, tó odi nɛ̀sɛ litɛ ò mìi kɛ̃̀ yã pìnↄaro, mani pↄsira kɛ kũńwo.

<- 2 KƆRINTIDENƆ 112 KƆRINTIDENƆ 13 ->