1 TƐSALONIKADENƆ 5

1 Ma gbɛ̃nↄ, yã pì kɛna ke a kɛgↄrↄ oárɛna zɛ́ vĩro, 2 zaakũ á dↄ̃ sãnsãn lákũ kpãni dì su gwãani nà. Lɛn anigↄ̃ de Dikiri sugↄrↄ zĩ lɛ. 3 Tó gbɛ̃nↄ tɛn pi, ó aafia, ó kun ó laakariia, kakatɛna ni suḿma kãnto lákũ nɛ́'iwãwã dì su nↄ̀sindarea nà, oni boro. 4 Ákↄ̃nↄ sↄ̃ ó gbɛ̃nↄ, á kú gusiranlo, gↄrↄ pì ni suáwa lán kpãni bàro, 5 zaakũ gupura gbɛ̃nↄn á ũ, fãnantɛ̃ gbɛ̃nↄn á ũ á pínki. Gwãani ke gusira gbɛ̃nↄn ó ũro. 6 Abire yãi òsun i o lán dakenↄ bàro. Ò itɛ̃ kɛ ògↄ̃ kú ó laakariia. 7 I'orinↄ dì i o gwãani, wɛ̃dɛrinↄ sↄ̃ òdi wɛ̃dɛ kɛ gwãani. 8 Ókↄ̃nↄ sↄ̃, zaakũ fãnantɛ̃ gbɛ̃nↄn ó ũ, ògↄ̃ kú kũ laakariio, ò ludanaanikɛna kũ yenyĩo da mↄ̀ uta ũ, ò surabana tãmaa kú mↄ̀ fùra ũ. 9 Zaakũ Luda dí ó ditɛ à pↄfɛ̃ kipawáro. À ó dítɛ à ó sura ba ó Dikiri Yesu Kirisi gãimɛ. 10 Àkũ mɛ́ à gà ó yãi de ògↄ̃ kú kãao, tó ó bɛ̃nɛ ke o andunia tòn yá. 11 Abire yãi à lɛ́ dakↄ̃a, à kↄ̃ gba gbãna, lákũ átɛn kɛ nà.

Pↄlu yãditɛna Tɛsalonikadenↄnɛ

12 Ma gbɛ̃nↄ, o wɛ́ kɛ̀áwa, à bɛ̀ɛrɛ lí gbɛ̃ kũ òdi zĩ kɛ á tɛ́nↄnɛ, kũ ò iko vĩáwa Dikiri gũn, òtɛni á da zɛ́anↄ. 13 À ń gakuri dↄ̃ńnɛ manamana yenyĩ gũn zĩ kũ òtɛn kɛ yãi. Àgↄ̃ nna kũ kↄ̃o. 14 Ma gbɛ̃nↄ, o lɛ́ dàáwa, à fayasaridenↄ da zɛ́n, à gbɛ̃ yĩdanↄ gba swɛ̃̀ɛ, à laakari dↄ gbãnasaridenↄa, à mɛna kũ gbɛ̃ sĩnda pínkio. 15 À laakari kɛ, á gbɛ̃ke sún a vãni fĩna bo kũ a vãnioro. À zɛ́ wɛtɛ àgↄ̃ a mana kɛkↄ̃nɛ kũ gbɛ̃ sĩnda pínkio gↄrↄ sĩnda pínki.

16 Àgↄ̃ kú kũ pↄnnao gↄrↄ sĩnda pínki. 17 Àgↄ̃ adua kɛ lakanaa sari. 18 Àgↄ̃ Luda sáabu kpá yã sĩnda pínki musu. Abire mɛ́ à deárɛ a pↄyenyĩna ũ Kirisi Yesu gũn. 19 Àsun Luda Nini tɛ́ kũ àdi káńgu dɛdɛro, 20 àsun annabikɛyã gya boro. 21 À yã sĩnda pínki tàasi ká, àgↄ̃ a mana kũna, 22 à mì kɛ̃ vãnikɛna buri sĩnda pínkia.

23 Luda Aafiade tó á kunna gↄ̃ kú adona yã sĩnda pínki gũn, à á nini kũ á wɛ̃̀ndiio kũ á mɛ̀ɛo dãkpãárɛ aafia taari sari ari ó Dikiri Yesu Kirisi sugↄrↄ. 24 Luda kũ à á sísi à á sɛ́ náani vĩ, ani yã pì kɛárɛ.

25 Ma gbɛ̃nↄ, à adua kɛwɛrɛ. 26 À fↄ kpá ó gbɛ̃nↄa ń pínki kũ Luda gbɛ̃nↄ lɛ́pɛmmanaao. 27 Ma naárɛ Dikirii, à takada dí kyó kɛ ó gbɛ̃nↄnɛ ń pínki. 28 Ó Dikiri Yesu Kirisi gbɛ̃kɛ kɛárɛ.

<- 1 TƐSALONIKADENƆ 4