1 Kũ Samuɛli zĩ kũ̀, à a nɛ́nↄ dìtɛ Isarailanↄnɛ don'arɛdenↄ ũ. 2 A daudu tↄ́n Yoɛli, a plade Abia. Mↄ́kↄ̃nↄ mɛ́ òdi yã gↄ̃gↄ̃ńnɛ Bɛsɛba. 3 Ama a nɛ́ pìnↄ dí tɛ́ a ágbairo. Ɔgↄyã ń swɛ̃̀ɛ blè, òdi gusarɛgba sí, òdi yã gↄ̃gↄ̃ a zɛ́aro. 4 Akũ Isaraila gbɛ̃ zↄ̃kↄ̃nↄ kↄ̃ kàkara, ò gɛ̀ɛ ò Samuɛli lè Rama 5 ò pì: Ǹ gwa, n zĩ kũ̀, akũ n nɛ́nↄn tɛ́ n ágbairo. Ǹ kína ditɛwɛrɛ sà de àgↄ̃ de ó don'arɛde ũ, lán buri sĩnda pínki a pↄ́ vĩ nà. 6 Kũ ò pì à kína káńnɛ àgↄ̃ de ń don'arɛde ũ, yã pì dí kɛ Samuɛlinɛ nnaro, akũ à wɛ́ kɛ̀ Dikiria. 7 Akũ Dikiri pì Samuɛlinɛ: Ǹ gbɛ̃ pìnↄ yã ma, zaakũ mↄkↄ̃mmɛ ò gìnyĩro. Makũmɛ ò gìmai de màsun kí bleḿmaro yãi. 8 Lákũ òtɛn kɛ nà zaa gↄrↄ kũ ma ń bↄtɛ Misila ari gbãra, ò pã kpàmai ò dò tãnanↄi, lɛn òtɛn kɛnnɛ lɛ dↄ. 9 Ǹ ń yã ma sà, ǹ lɛ́ daḿma ǹ tó ògↄ̃ dↄ̃ lákũ gbɛ̃ kũ ani kí bleḿma yãnↄ nigↄ̃ de nà.

10 Akũ Samuɛli Dikiri yã pìi bàba gbɛ̃ kũ òtɛn kína gbɛkaanↄnɛ pínki 11 à pì: Lákũ gbɛ̃ kũ ani kí bleáwa yãnↄ nigↄ̃ de nàn dí. Ani á nɛ́gↄ̃gbɛ̃nↄ sí à ń ditɛ a sↄ̃godenↄ kũ a sↄ̃denↄ ũmɛ. Onigↄ̃ táa o a sↄ̃go arɛ kũ bàao. 12 Ani ń ditɛ gbɛ̃nↄn wàa sↄsↄↄro ke gbɛ̃nↄn bupla akurikurinↄ gbɛ̃ zↄ̃kↄ̃nↄ ũ. Onigↄ̃ a bú wínɛ, onigↄ̃ a pↄ́nↄ kɛkɛnɛ, onigↄ̃ a zĩ̀kabↄnↄ pinɛ kũ a sↄ̃go pↄ́nↄ. 13 Ani á nɛ́nↄgbɛ̃nↄ sí à ń ditɛ nísigbĩnnakɛrinↄ kũ pↄ́blekɛrinↄ kũ burodikɛrinↄ ũ. 14 Ani á buranↄ kũ á geepi búnↄ kũ á kùkpɛ mananↄ síáwa à kpá a ìbanↄa. 15 Ani á pↄ́wɛnↄ kũ á geepi nɛ́nↄ lɛu kuride síáwa à kpá a bɛgwarinↄ kũ a ìbanↄa. 16 Ani á zↄ̀gↄ̃gbɛ̃nↄ kũ nↄgbɛ̃nↄ sí kũ á zù mananↄ kũ á zaakinↄ àgↄ̃ a zĩda zĩ kɛo. 17 Ani á pↄ́kãdenↄ lɛu kuride síáwa, ákↄ̃nↄ áni gↄ̃ a zↄ̀nↄ ũ. 18 Gↄrↄ birea sà áni wiki lɛ́ Dikiria gbɛ̃ kũ a sɛ̀ á kína ũ pì yãi, ama ani weáwa gↄrↄ birea doro.

19 Akũ ò gì Samuɛli yã mai ò pì: Oi! Ó ye ògↄ̃ kína vĩmɛ, 20 ónigↄ̃ de lán buri kparanↄ bà se. Ó kína mɛ́ anigↄ̃ yã gↄ̃gↄ̃wɛrɛ, anigↄ̃ dowɛrɛ arɛ zĩ̀i gũn. 21 Kũ Samuɛli ń yã mà pínki, à gɛ̀ɛ à dà Dikirinɛ a sãn. 22 Akũ Dikiri pìnɛ: Ǹ ń yã ma, ǹ kína káńnɛ. Akũ Samuɛli pì Isaraila pìnↄnɛ: Á baadi tá a wɛ̃tɛa.

<- 1 SAMUƐLI 71 SAMUƐLI 9 ->