1 SAMUƐLI 28

Solu kũ nↄgbɛ̃ wedekũnnade gɛ̀sisiriio

1 Gↄrↄ birenↄa Filisitininↄ ń zĩ̀karinↄ kàkara, ò ye ò gɛ́ ò zĩ̀ ká kũ Isarailanↄ. Akũ Akisi pì Daudanɛ: Asa ń dↄ̃ kũ mↄkↄ̃n kũ n gbɛ̃nↄ áni gɛ́ kũmao zĩ̀ ká kó? 2 Akũ Dauda pìnɛ: Tↄ̀, ĩni e sà lákũ makũ n zↄ̀bleri mani kɛ nà. Akũ Akisi pìnɛ: Tó lɛmɛ, mani n kɛ ma dãkpãri ũ ari gↄrↄ sĩnda pínki.

3 À sù à lè Samuɛli gà, Isarailanↄ kàkara ń pínki, ò ↄ́ↄ dↄ̀ a ga yã musu, akũ ò a vĩ̀ a bɛ wɛ̃tɛn Rama. Solu pɛ̀ wedekũnnadenↄa kũ gɛ̀sisirinↄ Isarailanↄ bùsun. 4 Kũ Filisitininↄ kↄ̃ kàkara, ò sù ò bùraa kàtɛ Sunɛmu. Akũ Solu Isarailanↄ kàkara ń pínki, ò bùraa kàtɛ Giliboa. 5 Kũ Solu Filisitini zĩ̀karinↄ è, vĩna a kũ̀, swɛ̃̀ɛ kɛ̃̀agu manamana. 6 À gbɛ̀ka Dikiria, akũ Dikiri dí wea nana gũn ke kũ Urimuo ke annabinↄ gãiro. 7 Akũ Solu pì a ìbanↄnɛ: À nↄgbɛ̃ wedekũnnade gɛ̀sisiri ke wɛtɛmɛnɛ, de mà gɛ́ mà yã gbɛkaa. Akũ ò pìnɛ: Nↄgbɛ̃ wedekũnnade gɛ̀sisiri ke kú Ɛndↄ.

8 Akũ Solu a zĩda lìtɛ à pↄ́kasa pãndenↄ dà, akũ à gɛ̀ɛ à nↄgbɛ̃ pìi lè gwãani, a gbɛ̃nↄn planↄ tɛ̀i. À pìnɛ: Ǹ tó n tãna su ǹ gɛ̀ kũ mani a tↄ́ onnɛ sísimɛnɛ. 9 Akũ nↄgbɛ̃ pìi pìnɛ: Ń dↄ̃ sãnsãn yã kũ Solu kɛ̀. À a bùsu zɛ́ zↄ̃̀ wedekũnnadenↄnɛ kũ gɛ̀sisirinↄo. Bↄ́ yã mɛ́ à tò ntɛn tankutɛ kpákpamɛnɛ de ò ma dɛɛ? 10 Akũ Solu la dànɛ kũ Dikirio à pì: Ma sì kũ Dikirio oni wari dↄmma yã dí musuro. 11 Akũ nↄgbɛ̃ pìi pì: Gɛ̀ kpaten mà sísinnɛɛ? À pì: Samuɛli gɛ̀ɛmɛ. 12 Kũ nↄgbɛ̃ pì Samuɛli è, à wiki pũ̀tã à pì Solunɛ: Mↄkↄ̃mmɛ Solu ũu? Bↄ́yãin n ↄ̃ndↄ̃ kɛ̀mɛnɛɛ? 13 Akũ kína pìnɛ: Ǹsun tó vĩna n kũro. Bↄ́n n èe? À pìnɛ: Gyãwãnden ma è, àtɛn bo zĩtɛn. 14 Solu a là à pì: À kɛ̀ deramɛɛ? À pìnɛ: Mare zĩ ke mɛ́ àtɛn su, à arukĩmba dana. Akũ Solu dↄ̃̀ kũ Samuɛlimɛ, akũ à kùtɛ à wùtɛ a gbɛrɛa. 15 Akũ Samuɛli a là à pì: Bↄ́yãin n wari dↄ̀ma, kũ n ma sisii? À wèa à pì: Ma warikɛna zↄ̃kↄ̃ↄ èmɛ. Filisitininↄ mɛ́ ò sù zĩ̀ ká kũmao, akũ Luda kpɛ lìmɛnɛ. Àdi wema annabi gãi ke nana gũn doro. Abire yãin ma n sisi. Ǹ omɛnɛ lákũ mani kɛ nà. 16 Samuɛli pìnɛ: Dikiri kpɛ lìnnɛ à gↄ̃̀ n ibɛrɛ ũ, akũ n su ntɛn yã gbɛkama sↄ̃ bi? 17 Dikiri kɛ̀nnɛ lákũ à dàmɛnɛ ma ònnɛ nà. À n bo kpatan à n gbɛ̃dake Dauda kàn. 18 Dikiri abirekũ kɛ̀nnɛ gbãra, kũ ńdi a yã maro yãimɛ. Ńdi pↄfɛ̃ pãsĩ kipanɛ Amalɛkinↄaro. 19 Dikiri ni Isarailanↄ kũ mↄkↄ̃nwo kpá Filisitininↄamɛ. Mↄkↄ̃n kũ n nɛ́gↄ̃gbɛ̃nↄ nigↄ̃ kú kũmao la zia. Dikiri ni Isaraila zĩ̀karinↄ kpá Filisitininↄa. 20 Samuɛli yã pìi tò vĩna Solu kũ̀ manamana, akũ à lɛ̀tɛ a gbɛrɛa sↄ̀rↄrↄ gↄ̃̀nↄ. A gbãna làka, zaakũ adi pↄ́ke ble gↄrↄ birea ke gwãani kũ̀aro.

21 Kũ nↄgbɛ̃ pìi sù Solu kĩnaa, à è swɛ̃̀ɛ kɛ̃̀agu manamana, akũ à pìnɛ: Makũ n zↄ̀bleri ma n yã mà, ma a zĩda kari kɛ̀, ma yã kũ n òmɛnɛ kɛ̀. 22 Ǹ n zↄ̀bleri yã ma sà. Ǹ tó mà pↄ́ble ditɛnnɛ ǹ ble, de ǹ gbãna kũ ǹ da zɛ́n. 23 Akũ Solu gì à pì: Mani pↄ́ blero. Kũ a ìbanↄ nàkaraa lɛɛlɛ kũ nↄgbɛ̃ pìio, akũ à ń yã mà. Akũ à fùtɛ zĩtɛ à vùtɛ gádoa. 24 Nↄgbɛ̃ pìi zù bↄ̀rↄ mɛ̀kpana vĩ bàdↄna a bɛa. À gɛ̀ɛ à dɛ̀ gↄ̃̀nↄ, akũ à flawa sɛ̀ à dɛ̀, à burodi futɛnasari kɛ̀o. 25 À dìtɛ Solunɛ kũ a ìbanↄ. Ò blè, akũ ò fùtɛ ò tà gwãani birea gↄ̃̀nↄ.

<- 1 SAMUƐLI 27 1 SAMUƐLI 29 ->