1 KINANƆ 2

Dauda lɛ́ditɛna Sulemanunɛ

1 Kũ Dauda gagↄrↄ kà kãni, à lɛ́ dìtɛ a nɛ́ Sulemanunɛ à pì: 2 Matɛn gɛ́ andunia gbɛ̃ sĩnda pínki gɛ́kia. Ǹ zɛ gbãna, ń n zĩda mↄ kũ nɛ́gↄ̃gbɛ̃mɛ n ũ! 3 Ǹgↄ̃ Dikiri n Luda yãnↄ kũna, ńgↄ̃ tɛ́ a zɛ́i, ńgↄ̃ a ↄdↄki gwa, ńgↄ̃ a yãditɛnanↄ kũna kũ a dokayãnↄ kũ a yã'onnɛnanↄ, lákũ à kú Musa doka takadan nà, yã kũ ntɛn kɛ sĩnda pínki nigↄ̃ bo mana, n tá pínki nigↄ̃ nna. 4 Lɛn Dikiri ni yã kũ à òmɛnɛ papa lɛ à pì, tó ma nɛ́nↄ ń zĩda kũna dↄ̃ akũsↄ̃ ò tɛ́ ma zɛ́i kũ nɛ̀sɛ mɛ̀n doo kũ ń pↄyeinaao pínki, ma burinↄ nigↄ̃ vutɛna Isarailanↄ kín gↄrↄ sĩnda pínki.

5 Ń yã kũ Zeruya nɛ́ Yoabu kɛ̀mɛnɛ dↄ̃, lákũ à Isaraila zĩ̀kari don'arɛde gbɛ̃nↄn planↄ dɛ̀dɛ nà, Nɛrɛ nɛ́ Abana kũ Yɛta nɛ́ Amasao. À gbɛ̃ pìnↄ dɛ̀dɛ, adi kɛ sↄ̃ zĩ̀ gↄrↄnlo. Ń aru gↄ̃̀ a musu, à kù a asaaa kũ a kyatenↄ. 6 Ǹ yã kɛnɛ n ↄ̃ndↄ̃na lɛ́n. Ǹsun tó a mìkã pura kũ gbasa à ta miran yĩdaro. 7 Ǹ gbɛ̃kɛ kɛ Giliada gbɛ̃ Bazilai nɛ́gↄ̃gbɛ̃nↄnɛ. Ǹ ń ditɛ gbɛ̃ kũ ánigↄ̃ pↄ́ ble lɛɛlɛnↄ tɛ́, zaakũ mↄ́kↄ̃nↄ mɛ́ ò zɛ̀ kũmao gↄrↄ kũ matɛn bàa sí n vĩ̀ni Abusalomunɛ. 8 Biliaminu buri Gera nɛ́ Simɛi, Bahurimu gbɛ̃ kú kũnwo dↄ. À ma ka pãsĩpãsĩ gↄrↄ kũ matɛn gɛ́ Manaimu. Kũ à sù à ma le Yodai, ma la dànɛ ma pì kũ Dikirio mani a dɛro. 9 Bee kũ abireo ǹsun a tó gwe wɛ́tãmmanaa sariro. Ń ↄ̃ndↄ̃, ń dↄ̃ deran ĩni kɛnɛ nà à ga kpã̀m à gɛ̃ miran.

10 Akũ Dauda gà. Yurusalɛmu fárandi kũ ò a vĩ̀n òdi pi Dauda wɛ̃tɛ. 11 À kɛ̀ Isarailanↄ kína ũ ari wɛ̃̀ bupla, Ɛblↄnu wɛ̃̀ suppla, Yurusalɛmu wɛ̃̀ baraakuri awɛɛ'aakↄ̃. 12 Sulemanu vùtɛ a de gbàn akũsↄ̃ à kpata zĩni pɛtɛna.

Adonia ganaa

13 Agi nɛ́ Adonia gɛ̀ɛ à Sulemanu da Basɛba lè, akũ Basɛba a là à pì: Aafian n su yá? À wèa à pì: Aafiamɛ! 14 Adonia ɛ̀ra à pì: Má yã vĩ mà onnɛ. Basɛba pì: Ǹ o! 15 Akũ Adonia pì: Ń dↄ̃ kũ kpata de ma pↄ́ ũ yã. Isarailanↄ wɛ́ kúma ń pínki mà kɛ ń kína ũ, akũ yã lìtɛ, ma dakũna mɛ́ à kpataa blè, zaakũ Dikiri mɛ́ à a kà. 16 Tera sà yã mɛ̀n don matɛn wɛ́ kɛmma, ǹsun gí kɛmɛnɛiro. Basɛba pì: Ǹ o! 17 Akũ à pì: Ǹ wɛ́ kɛmɛnɛ kína Sulemanua à Sunɛmu nↄgbɛ̃ Abisaga kpáma nↄ ũ, zaakũ ani gínnɛ kãaoro. 18 Basɛba pìnɛ: Tↄ̀, mani onɛnnɛ.

19 Kũ Basɛba gɛ̀ɛ à kína Sulemanu lè Adonia yã pìi musu, akũ kína pìi fùtɛ à gɛ̀ɛ à dàalɛ à kùtɛnɛ, akũ à ɛ̀ra à sù à vùtɛ a kíblegban. Akũ ò sù Basɛbanɛ kũ kíblegba pãndeo, akũ à vùtɛ kína ↄplai. 20 Basɛba pì: Pↄ́ken má yei mà wɛ́ kɛmma, ǹsun ma tɛ̃ro. Akũ kína pì: Ǹ wɛ́ kɛ Naa, mani n tɛ̃ro. 21 Akũ Basɛba pì: Ǹ tó ò Sunɛmu nↄgbɛ̃ Abisaga kpá n vĩ̀ni Adoniaa à a sɛ́ nↄ ũ. 22 Akũ kína Sulemanu a da là à pì: Bↄ́yãin ntɛn Sunɛmu nↄgbɛ̃ Abisaga wɛ́ kɛ Adonianɛɛ? Ǹ kpata wɛ́ kɛnɛ gↄ̃̀nↄ sàee! Zaakũ ma vĩ̀nimɛ. Ntɛn kpata wɛ́ kɛnɛ kũ sa'ori Abiatao kũ Zeruya nɛ́ Yoabuomɛ. 23 Akũ kína Sulemanu la dà à pì: Ma sì kũ Dikirio, tó Adonia dí kura a wɛ̃̀ndiii yã kũ à wɛ́ kɛ̀ dí yãiro, Luda yã kɛmɛnɛ pãsĩpãsĩ. 24 Zaakũ Dikiri ma ka kín, à ma ditɛ ma de Dauda gɛ̃nɛ ũ, à ma buri gbà gbãna lákũ à a lɛ́ sɛ̀ nà, ma sì kũ Dikirio Adonia ni ga gbãramɛ. 25 Akũ kína Sulemanu Yoyada nɛ́ Bɛnaya dà, à gɛ̀ɛ à Adonia lɛ̀ à dɛ̀.

Sulemanu pɛna Abiataa kũ Yoabu ganaao

26 Kína pì sa'ori Abiatanɛ: Ǹ ɛra ǹ tá n gun Anato. À kũ̀ ǹ gamɛ, ama mani n dɛ teraro, zaakũ mↄkↄ̃n mɛ́ n Dikiri Luda àkpatii sɛ̀ n doo ma de Daudanɛ arɛ, akũsↄ̃ n zɛ kãao a wari sĩnda pínki gũn. 27 Lɛn Sulemanu pɛ̀ Abiataa lɛ, à a bò Dikiri gbagbana zĩn, de yã kũ Dikiri ò Ɛli bedenↄ musu zaa Silo le à papa yãi.

28 Kũ Yoabu a baaruu mà, akũ à bàa sì à gɛ̀ɛ Dikiri bizakuta kĩnaa, à nà Dikiri gbagbakii à a bɛ̃nɛnↄ kũ̀. Yoabu zɛ̀ kũ Adoniaomɛ yã, ama adi zɛ kũ Abusalomuoro. 29 Ò ò kína Sulemanunɛ kũ Yoabu bàa lɛ̀ à gɛ̀ɛ Dikiri bizakuta kĩnaa, à kú sa'oki pìi sarɛ, akũ Sulemanu pì Yoyada nɛ́ Bɛnayanɛ à gɛ́ à láka kãao gwe. 30 Kũ Bɛnaya kà Dikiri bizakuta kĩnaa, à pìnɛ: Kína pì ǹ bo gwe! Akũ Yoabu pì: Oi! Gu dín mani gan. Akũ Bɛnaya gbɛ̃nↄ zĩ̀ kínaa à pì: Lákũ Yoabu yã wèma nàn dí. 31 Akũ kína pìnɛ: Ǹ kɛnɛ lákũ à ò nà. Ǹ a dɛ, ń a vĩ, de a gbɛ̃dɛna pã yã sún wí makũ kũ ma de bedenↄ musuro. 32 Dikiri ni tó a gbɛ̃dɛna yã wí a musu, zaakũ à lɛ̀tɛ taarisaride gbɛ̃nↄn pla kũ ń mana dealanↄa. À Nɛrɛ nɛ́ Abana, Isaraila zĩ̀karinↄ don'arɛde kũ Yɛta nɛ́ Amasa, Yuda zĩ̀karinↄ don'arɛdeoo dɛ̀dɛ ma de lɛ́ sari. 33 Ń dɛna yã nigↄ̃ wí Yoabu kũ a burinↄ musu gↄrↄ sĩnda pínki, ama Dikiri nigↄ̃ Dauda kũ a burinↄ kũ a ↄnnwo kũ a kpataao gba aafia gↄrↄ sĩnda pínki. 34 Akũ Yoyada nɛ́ Bɛnaya gɛ̀ɛ à Yoabu lɛ̀ à dɛ̀, akũ ò a vĩ̀ a bɛa zaa gbárannan. 35 Akũ kína Yoyada nɛ́ Bɛnaya dìtɛ zĩ̀karinↄ don'arɛde ũ Yoabu gɛ̃nɛ ũ, sa'ori Zadↄki sↄ̃, Abiata gɛ̃nɛ ũ.

Simɛi ganaa

36 Kína gbɛ̃nↄ zĩ̀ ò Simɛi sìsi, akũ à pìnɛ: Ǹ bɛ bo Yurusalɛmu la ǹgↄ̃ kún. Ǹsun bo bɛra la ǹ gɛ́ gukearo. 37 Ǹgↄ̃ dↄ̃ sãnsãn gↄrↄ kũ n bikũ̀ Kidironua, n gan gwe. Ama n n zĩda dɛ̀. 38 Akũ Simɛi pì kínanɛ: Yã manamɛ ma dikiri kí. Makũ n zↄ̀bleri mani kɛ lákũ n ò nà. Akũ à kú Yurusalɛmu lɛ ari à gìi kɛ̀.

39 Wɛ̃̀ aakↄ̃ gbɛra Simɛi zↄ̀ gbɛ̃nↄn planↄ bàa sì ò tà Maaka nɛ́ Akisi, Gata kína kĩnaa, akũ ò pì Simɛinɛ: N zↄ̀nↄn kú Gata. 40 Akũ Simɛi fùtɛ à gàarii yĩ̀ a zaakinɛ, à gɛ̀ɛ Akisi kĩnaa Gata a zↄ̀ↄ pìnↄ wɛtɛ. Kũ à ń lé, akũ à ń sɛ́tɛ Gata à sù kũńwo. 41 Akũ ò ò Sulemanunɛ, Simɛi bò Yurusalɛmu à gɛ̀ɛ Gata à ɛ̀ra à sù. 42 Akũ kína gbɛ̃nↄ zĩ̀ ò Simɛi sìsiarɛ, akũ à pìnɛ: Ma tò n la dà n pì n sì kũ Dikirio, akũ ma lɛ́ dàmma ma pì, zĩ kũ n bo la n gɛ gukea, ǹgↄ̃ dↄ̃ kũ n gamɛ. Akũ n pìmɛnɛ, yã manamɛ, n mà. 43 Bↄ́yãin n bo ladana kũ n sì kũ Dikiri tↄ́o kpɛ kũ yã kũ ma dànnɛoo? 44 Akũ kína ɛ̀ra à pìnɛ dↄ: Yã vãni kũ n kɛ̀ ma de Daudanɛ dↄngu pínki. Dikiri mɛ́ ani tó a vãni pì wí n musu sà, 45 ama ani arubarika damagu à tó Dauda kpata zĩni gↄ̃ pɛtɛna ari gↄrↄ sĩnda pínki. 46 Kína Yoyada nɛ́ Bɛnaya dà, akũ à gɛ̀ɛ à Simɛi lɛ̀ à dɛ̀. Lɛn Sulemanu kpata zĩni pɛ̀tɛ lɛ.

<- 1 KINANƆ 1 1 KINANƆ 3 ->