1 KINANƆ 18

Iliasu kũ Obadiao

1 À gↄrↄ pla kɛ̀, akũ Dikiri yã sù Iliasua legũmanasari wɛ̃̀ aakↄ̃de gũn à pì: Ǹ gɛ́ ǹ n zĩda mↄ Ahabunɛ, mani tó legũ ma a bùsun. 2 Akũ Iliasu fùtɛ àtɛn gɛ́ a zĩda mↄ Ahabunɛ.

Kũ nàa kɛ̀ gbãna Samaria, 3 akũ Ahabu a bɛgwari Obadia sìsi. Obadia pì sↄ̃ à Dikiri vĩna vĩ manamana. 4 Gↄrↄ kũ Yɛzɛbɛli tɛn Dikiri annabinↄ dɛdɛ yã, akũ Obadia ń gbɛ̃ kenↄ sɛ̀tɛ gbɛ̃nↄn basↄↄro à ń útɛ gbɛ̀wɛɛnↄ gũn gbɛ̃nↄn bupla akurikuri, akũ à ń gwá kũ pↄ́bleo kũ ío. 5 Akũ Ahabu pì Obadianɛ: Ò dodo gunↄi ò gɛ́ ísɛ̃bokinↄ kũ swawɛɛnↄn pínki. Òdigↄ̃ dↄ̃ro ke óni sɛ̃̀ le ò kpá ó sↄ̃nↄa kũ ó baragbãsↄ̃nↄ. 6 Akũ ò gu kpàatɛ, ń baadi a zɛ́ sɛ̀. 7 Kũ Obadia tɛna, akũ ò kpàkũ kũ Iliasuo. À a dↄ̃̀, akũ à wùtɛ a nɛ̀sɛlɛ kutɛna à pì: Ma dikiri Iliasu, mↄkↄ̃mmɛn gwe yá? 8 Iliasu wèa à pì: Makũmɛ! Ǹ gɛ́ o n dikiriinɛ má kú la. 9 Akũ Obadia pì: Bↄ́ taarin ma kɛ̀, kũ ntɛn makũ n zↄ̀bleri na Ahabunɛ a ↄĩ à ma dɛɛ? 10 Ma sì kũ Dikiri n Ludao buri ke bùsu ke kun kũ ma dikiri gì gbɛ̃nↄ zĩḿma ò n wɛtɛnyĩro. Tó ò pì ń kú gwero, àdi tó ò la damɛ. 11 Akũ ntɛn omɛnɛ dↄ mà gɛ́ mà o ma dikiri Ahabunɛ kũ ń kú la yá? 12 Tó ma da zɛ́n, manigↄ̃ dↄ̃ gu kũ Dikiri Nini ni n sɛ́ à tá kũnworo. Tó ma gɛ ma ò Ahabunɛ, tó à sù adi n ero, ani ma dɛmɛ. Makũ n zↄ̀bleri sↄ̃ má Dikiri vĩna vĩ zaa ma kɛfɛnnakɛgↄrↄa. 13 Ma dikiri Iliasu, kũ Yɛzɛbɛli tɛn Dikiri annabinↄ dɛdɛ, ńdi yã kũ ma kɛ̀ maroo? Makũ mɛ́ ma ń gbɛ̃kenↄ sɛ̀tɛ gbɛ̃nↄn basↄↄro, ma ń útɛ gbɛ̀wɛɛnↄ gũn gbɛ̃nↄn bupla akurikuri, ma ń gwá kũ pↄ́bleo kũ ío. 14 Akũ n pìmɛnɛ dↄ mà gɛ́ mà o ma dikiri Ahabunɛ ń kú la yá? Ani ma dɛmɛ. 15 Akũ Iliasu pì: Ma sì kũ Dikiri Zĩ̀karide kũ matɛn doiio, mani ma zĩda mↄnɛ gbãra sà.

Iliasu kũ Baali tãnagbagbarinↄ Kaamɛli kpi musu

16 Akũ Obadia gɛ̀ɛ à dà Ahabulɛ à yã pìi ònɛ, akũ Ahabu gɛ̀ɛ da Iliasulɛ. 17 Kũ Ahabu Iliasu è, à pìnɛ: Isarailanↄ bùsudɛri, mↄkↄ̃mmɛn gwe yá? 18 Akũ Iliasu pì: Adi kɛ makũ mɛ́ ma Isarailanↄ bùsuu dɛ̀ro, mↄkↄ̃n kũ n de bedenↄ ákↄ̃nↄ mɛ́ a dɛ̀, zaakũ a pã kpà Dikiri yãditɛnanↄi a tɛ Baalii. 19 Ǹ Isarailanↄ sísi ń pínki, ò dakarɛ Kaamɛli kpi musu lɛɛlɛ kũ Baali tãnagbagbari gbɛ̃nↄn wàa pla kũ bupla akurio kũ Asɛra tãnade gbɛ̃nↄn wàa pla kũ òdi pↄ́ ble kũ Yɛzɛbɛlionↄ.

20 Ahabu Isarailanↄ sìsi ń pínki, akũ à tãnade pìnↄ kàkara Kaamɛli kpi musu. 21 Akũ Iliasu nà gbɛ̃nↄi à ń lá à pì: Á laasun nigↄ̃ kpaatɛna ari bↄrɛmɛɛ? Tó Dikiri bi Ludamɛ, à tɛ́i. Tó Baalimɛ sↄ̃, à tɛ́i. Odi yãke wearo, 22 akũ Iliasu pìńnɛ: Dikiri annabinↄ tɛ́ makũ mɛ́ ma gↄ̃ mado. Baali tãnagbagbarinↄ sↄ̃, gbɛ̃nↄn wàa pla kũ bupla akuriomɛ. 23 À zùsanↄ kpáwá mɛ̀n pla, tãnade pìnↄ à mɛ̀n do sɛ́ ò zↄ̃zↄ̃kↄ̃rɛ ò ká yàkala, òsun tɛ́ naaro. Makũ se mani a do kɛkɛ mà ká yàkala, mani tɛ́ naa sero. 24 Mↄ́kↄ̃nↄ sↄ̃ ò Baali sísi, makũ sↄ̃ mani Dikiri sísi. Ń gbɛ̃ kũ à mà, akũ à sù kũ tɛ́o, àkũmɛ Luda ũ. Akũ gbɛ̃ sĩnda pínki pì: Yã manamɛ! 25 Akũ Iliasu pì tãnade pìnↄnɛ: À zùsa mɛ̀n do sɛ́ à kɛkɛ káaku, zaakũ ákↄ̃nↄ mɛ́ á dasi. À á tãna sísi, ama àsun tɛ́ naaro. 26 Akũ ò zùsa kũ ò kpàḿma sì ò kɛ̀kɛ, akũ òtɛn Baali sísi zaa kↄnkↄ ari ifãntɛ̃ gɛ̀ɛ káo mìdangura. Òtɛn ũ wã, òtɛn lika sa'oki kũ ò bòoi, òtɛn pi: Baali, ǹ yã mawá! Bee kũ abireo odi yãke maro, adi yã maḿmaro. 27 Kũ ifãntɛ̃ kà mìdangura, akũ Iliasu tɛni ń lalandi kɛ à pì: À wiki lɛ́ gbãna à kara, àkũmɛ dikiri ũroo? Ke a laasun tà kpadomɛ. Ke à gɛ̀ɛ bĩnikpɛ kɛmɛ. Ke à gɛ̀ɛ wɛ̃tɛamɛ. Ke àtɛn i omɛ, akũ ádi a vuroo? 28 Akũ òtɛn wiki lɛ́ kũ kòto gbãnao, òtɛni ń zĩda líli kũ fɛ̃nɛdao kũ sário lákũ òdi kɛ nà, ari aru tɛn pla ń mɛ̀ɛa. 29 Kũ ifãntɛ̃ gò mìia, akũ òtɛn yã ya ari sa ↄkↄsi ogↄrↄ gɛ̀ɛ à kào. Bee kũ abireo adi yãke weḿmaro, adi yã maḿmaro, adi sã kpáńyĩro.

30 Akũ Iliasu pì parinɛ: À namai la! Kũ ò nài ń pínki, akũ à Dikiri gbagbaki kũ à gbòroo kɛ̀kɛ àtɛn bo. 31 À gbɛ̀ɛ sɛ̀sɛ mɛ̀n kuri awɛɛpla Yakubu burinↄ dasi lɛ́n. Yakubun Dikiri yã ònɛ yã à pì ògↄ̃ pinɛ sà Isaraila. 32 Kũ à Dikiri gbagbaki pìi bò, akũ à wɛ̀ɛɛ yↄ̃̀ à lìkai. Wɛ̀ɛɛ pìi kà à í sí lita gɛ̃ro. 33 À yàkaa kà sa'oki pìla, à zùu pìi zↄ̃̀zↄ̃kↄ̃rɛ à kà yàkaa pìia à pì: À í tↄ́ lo siikↄ̃, à ká sa'opↄ pìia kũ yàkaa pìio. 34 Kũ ò tↄ̀, akũ à pì: À ɛra à tↄ́ dↄ. Kũ ò tↄ̀, akũ à pì: À ɛra à tↄ́ à kɛ gɛ̃̀n aakↄ̃. Akũ ò tↄ̀ ari gɛ̃̀n aakↄ̃. 35 Í pìi bàa lɛ̀ à lìka sa'oki pìii ari wɛ̀ɛɛ pìi pà. 36 Sa ↄkↄsi ogↄrↄ akũ annabi Iliasu nài à pì: Dikiri, Ibrahĩ kũ Isaakuo kũ Isarailao Luda, ǹ tó ò dↄ̃ gbãra kũ mↄkↄ̃mmɛ Isarailanↄ Luda ũ akũsↄ̃ n zↄ̀bleriimɛ ma ũ, matɛn yã dí kɛ kũ mↄkↄ̃n mɛ́ n ma dan yãi. 37 Ǹ yã mama Dikiri! Ǹ yã mama, de gbɛ̃ dínↄ le ò dↄ̃ kũ Dikiri, mↄkↄ̃mmɛ ń Luda ũ akũsↄ̃ ntɛni ń nɛ̀sɛ litɛńnɛ de ò ɛra ò summa. 38 Akũ Dikiri tɛ́ sù sa'obↄↄ pìia kũ yàkaao kũ gbɛ̀nↄ kũ bùsuuo, ò tɛ́ kũ̀, akũ í kũ à kú wɛ̀ɛɛ pìn bàba. 39 Kũ gbɛ̃nↄ è, akũ ò wùtɛ ń nɛ̀sɛlɛ kutɛna ò pì: Dikirimɛ Luda ũ! Dikirimɛ Luda ũ! 40 Akũ Iliasu dàńnɛ à pì: À Baali tãnagbagbarii pìnↄ kũkũ, ń gbɛ̃ke sún pitiáwaro. Kũ ò ń kũkũ, akũ Iliasu gɛ̀ɛ kũńwo Kisↄ̃ guvutɛn à ń dɛdɛ gwe.

41 Iliasu pì Ahabunɛ: Ǹ gɛ́ pↄ́ ble ǹ í mi, zaakũ ma legũ kĩnii mà dↄ. 42 Akũ Ahabu gɛ̀ɛ pↄ́ ble à í mi. Akũ Iliasu dìdi à gɛ̀ɛ Kaamɛli mìsↄ̃ntɛa à vùtɛ à mìi kà tún. 43 À pì a zĩkɛriinɛ: Ǹ gɛ́ gu gwa ísira kpa. Akũ à gɛ̀ɛ à gwà. Kũ à sù à pì: Pↄ́ke kú gwero. Akũ Iliasu pìnɛ à ɛra à gɛ́ gwa dↄ, akũ à gɛ̀ɛ lɛ ari gɛ̃̀n suppla. 44 A gɛ̃̀n suppladeo zĩkɛrii pìi pì: Ma legũ è lokona sɛrɛrɛ lán ↄla bà, àtɛn futɛ ísira musu. Akũ Iliasu pìnɛ: Ǹ gɛ́ ǹ o Ahabunɛ à sↄ̃go dↄ sↄ̃nↄa à gɛ̃n à kipa kpia ari legũ gↄ̃ gɛ́ a dãdã. 45 Legũ tɛn sísi busɛbusɛ, zàga'ĩa fùtɛ, akũ legũ mà manamana. Ahabu kú sↄ̃gon, àtɛn tá Yɛzɛrili. 46 Dikiri gbãna sù Iliasua, akũ à a uta zↄ̃kↄ̃ↄ kàkara à kũ̀, à bàa lɛ̀ à Ahabu kɛ̃̀ ari à gɛ̀ɛ káo Yɛzɛrili.

<- 1 KINANƆ 17 1 KINANƆ 19 ->