1 À gwa lákũ De Luda yewái à kɛ̀ zↄ̃kↄ̃ nà ari àdi ó sísi a nɛ́nↄ. Ó a ũ sↄ̃! Andunia ó dↄ̃ro, kũ adi a dↄ̃ro yãi. 2 Ma gbɛ̃ yenyĩdenↄ, Luda nɛ́nↄn ó ũ tera, lákũ ónigↄ̃ de nà dí bo gupuraa kↄ̀ro. Ó dↄ̃ kũ gↄrↄ kũ ani bo gupuraa, ónigↄ̃ de lán a bà, zaakũ óni a e lákũ à de nà. 3 Gbɛ̃ kũ à wɛ́ dↄi lɛ dì a swɛ̃̀ pu, lákũ Kirisi swɛ̃̀ punaa nà.

4 Gbɛ̃ kũ à durunna kɛ̀ɛ bò doka kpɛmɛ, zaakũ durunnakɛna bi bona doka kpɛmɛ. 5 Á dↄ̃ kũ Kirisi sù durunnakɛ̃mmana yãimɛ, durunna sↄ̃ à kú a swɛ̃̀ɛ gũnlo. 6 Gbɛ̃ kũ à kú a gũn dìgↄ̃ kpɛ́ àgↄ̃ durunna kɛro. Durunnakɛri ke dí a ero, adi a dↄ̃ro.

7 Ma nɛ́nↄ, àsun tó gbɛ̃ke á sãtɛro, yãmanakɛri mɛ́ à mana, lákũ Kirisi mana nà. 8 Gbɛ̃ kũ àdi durunna kɛ bi Ibilisi pↄ́mɛ, zaakũ Ibilisi durunna kɛ̀ zaa káakumɛ. Ibilisi yãnↄ kakatɛna yãimɛ Luda Nɛ́ sù. 9 Gbɛ̃ kũ Luda a ì dìgↄ̃ kpɛ́ àgↄ̃ durunna kɛro, zaakũ Luda buri mɛ́ à kú a gũn. Ani fↄ̃ àgↄ̃ kpɛ́ gↄ̃ durunna kɛro, kũ Luda a ì yãi. 10 Lákũ ó Luda nɛ́nↄ dↄ̃kↄ̃nɛ kũ Ibilisi nɛ́nↄon dí: Gbɛ̃ kũ àdi yã mana kɛro kesↄ̃ gbɛ̃ kũ à ye a gbɛ̃dakeiro bi Luda nɛ́nlo.

11 Yã kũ a mà zaa káakun dí: Ògↄ̃ yekↄ̃i. 12 Àsungↄ̃ de lán Kainu bàro. À de Setan pↄ́ ũmɛ, akũ à a dakũna dɛ̀. Bↄ́ yã mɛ́ à tò à a dɛ̀ɛ? Kũ a yãkɛna bɛ̃̀nɛ, akũsↄ̃ a dakũna pↄ́ mana yãimɛ. 13 Ma gbɛ̃nↄ, tó andunia zã̀águ, àsun tó à bo á sarɛro. 14 Ó dↄ̃ kũ o bo gan o gɛ̃ wɛ̃̀ndii gũn, kũ ó ye ó Yesude dakenↄi yãi. Gbɛ̃ kũ à ye gbɛ̃iro bi gɛ̀ɛmɛ ari tera. 15 Gbɛ̃ kũ à zã̀ a gbɛ̃dakegu bi gbɛ̃dɛriimɛ. Á dↄ̃ kũ gbɛ̃dɛri ke dìgↄ̃ wɛ̃̀ndi kũ àdi lákaro vĩ a gũnlo.

16 Yã kũ ó yenyĩ pì dↄ̃̀aan dí: Kirisi a zĩda kpà ó yãi. Ókↄ̃nↄ sↄ̃, séde ò ó zĩda kpá ó Yesude dakenↄa. 17 Tó gbɛ̃ andunia pↄ́ vĩ, akũ à è a Yesude dake kú pↄ́nidɛnaa gũn, tó adi a wɛ̃nda gwaro, Luda yenyĩ kú a swɛ̃̀ɛ gũn yá? 18 Ma nɛ́ yenyĩdenↄ, òsungↄ̃ yekↄ̃i kũ lɛ́oro. Ògↄ̃ yekↄ̃i yãpura gũn kũ ó yãkɛnaao. 19 Abire mↄ̀wɛrɛ kũ yãpura gbɛ̃nↄn ó ũ, gbasa ó swɛ̃̀ le àgↄ̃ ditɛna Luda arɛ. 20 Tó ó laasun tɛni ó kù vĩ sↄ̃, ó dↄ̃ kũ Luda zↄ̃kↄ̃ de ó laasunla, à yã sĩnda pínki dↄ̃.

21 Ma gbɛ̃ yenyĩdenↄ, tó ó laasun tɛni ó kù vĩro, ó swɛ̃̀ nigↄ̃ ditɛna Luda arɛ, 22 kũ ó yã kũ à dìtɛnↄ kũna, akũ ótɛn yã kũ àdi kɛnɛ nna kɛ yãi, óni pↄ́ kũ o gbɛ̀kaa e. 23 Yã kũ à dìtɛwɛrɛn dí: Ò a Nɛ́ Yesu Kirisi náani kɛ, ógↄ̃ yekↄ̃i lákũ à dìtɛwɛrɛ nà. 24 Gbɛ̃ kũ à yã kũ à dìtɛnↄ kũna kú a gũn, Luda pì kú ade gũn se. Ó dↄ̃ kũ à kú ó gũn a Nini kũ à kpàwá yãi.

<- 1 YUHANA 21 YUHANA 4 ->