1 YUHANA 2

1 Ma nɛ́ yenyĩdenↄ, matɛn yã bire oárɛ de àsun durunna kɛro yãimɛ. Ama tó á gbɛ̃ke durunna kɛ̀, ó Zɛkũnwode vĩ De Luda kĩnaa, àkũmɛ taarisaride Yesu Kirisi ũ. 2 Àkũmɛ ó durunnanↄ kútɛkɛbↄ ũ. Adi kɛ ó durunnanↄn adoro, kũ andunia pínki gbɛ̃nↄ pↄ́oomɛ.

3 Tó ó yã kũ à dìtɛnↄ kũna, abirekũ mↄ̀wɛrɛ yãpura kũ ó a dↄ̃. 4 Tó gbɛ̃ pì á a dↄ̃, akũ à a yã kũ à dìtɛnↄ kũnaro, ɛ́kɛdemɛ, yãpura kú a swɛ̃̀ɛ gũnlo. 5 Gbɛ̃ kũ à a yã kũna sↄ̃, Luda yenyĩ papana a gũn yãpura. Pↄ́ kũ ani tó ò dↄ̃ kũ ó kú a gũnn dí: 6 Gbɛ̃ kũ à pì á kú a gũn, séde àgↄ̃ kun lákũ Kirisi kun nà yã.

Yã dufu ditɛnaa

7 Ma gbɛ̃ yenyĩdenↄ, adi kɛ yã dufun matɛn oárɛro, yã zĩ kũ ò dìtɛárɛ zaa káakumɛ. Yã zĩ pìimɛ yã kũ a mà ũ. 8 Bee kũ abireo yã kũ matɛn oárɛ dufumɛ dↄ, òdi a yãpura e a kĩnaa kũ á kĩnaao, zaakũ gusira tɛn gɛ̃tɛ, akũ gupura yãpura tɛn pu sà.

9 Gbɛ̃ kũ à pì a kú gupuran, akũ à zã a gbɛ̃dakegu, ade kú gusira gũmmɛ ari tera. 10 Gbɛ̃ kũ à ye a gbɛ̃dakei kú gupuran, a yãke dì tó gbɛ̃ke furo. 11 Gbɛ̃ kũ à zã a gbɛ̃dakegu kú gusiran, à tɛ́ gusiran, à dↄ̃ gu kũ àtɛn gɛ́nlo, kũ gusira a vĩ̀na kũ̀ yãi.

12 Ma nɛ́ yenyĩdenↄ, matɛni abirekũ oárɛ

kũ á durunnanↄ kɛ̃̀áwa a tↄ́ gãi yãimɛ.

13 Marenↄ, matɛni abirekũ oárɛ

kũ á gbɛ̃ kũ à kun zaa káaku dↄ̃ yãimɛ.

Kɛfɛnnanↄ, matɛni abirekũ oárɛ

kũ a zĩ̀i blè Setanwa yãimɛ.

Ma nɛ́ yenyĩdenↄ, ma òárɛ

kũ á De Luda dↄ̃ yãimɛ.

14 Marenↄ, ma òárɛ

kũ á gbɛ̃ kũ à kun zaa káaku dↄ̃ yãimɛ.

Kɛfɛnnanↄ, ma òárɛ

kũ á gbãna vĩ, Luda yã kú á swɛ̃̀ɛ gũn dↄ,

akũsↄ̃ a zĩ̀i blè Setanwa yãimɛ.

15 Àsungↄ̃ ye anduniairo, kesↄ̃ pↄ́ kũ ò kú a gũnnↄ. Tó gbɛ̃ ye anduniai, à ye De Ludairo. 16 Zaakũ yã kũ à kú andunia gũn pínki, mɛ̀ pↄ́nidɛna kũ wɛ́pio kũ aruzɛkɛ ĩadãnaao, adi bo De Luda kĩnaaro, à bò andunia kĩnaamɛ. 17 Andunia tɛn gɛ̃tɛ kũ a pↄ́nidɛnaao, ama ludapↄyenyĩnakɛri nigↄ̃ kun gↄrↄ sĩnda pínkimɛ.

Kirisi ibɛrɛɛ

18 Ma nɛ́ yenyĩdenↄ, gↄrↄ kpɛden ó kun dí. Lákũ a mà kũ Kirisi ibɛrɛ tɛn su nà, a ibɛrɛnↄ gĩnakɛ ò kɛ̀ dasi. Abirekũ mↄ̀wɛrɛ kũ ó kú gↄrↄ kpɛde gũn. 19 Gbɛ̃ pìnↄ bò ó kĩnaamɛ, ama ó gbɛ̃nↄnlo. Tó ó gbɛ̃nↄmɛ yã de ò kú kũoo. Ò bò de ò dↄ̃ kũ ń gbɛ̃ke de ó gbɛ̃ ũro yãimɛ.

20 Ákↄ̃nↄ sↄ̃, Luda a Nini dìárɛ, akũ á yãpura dↄ̃ á pínki. 21 Ma abire òárɛ, kũ á yãpura dↄ̃ yãimɛ, adi kɛ kũ á dↄ̃ro yãinlo. Á dↄ̃ kũ ɛ́kɛ ke dì bo yãpura gũnlo. 22 Dín ɛ́kɛde ũu? Gbɛ̃ kũ à gì Yesu Arumasihukɛnaaimɛ. Gbɛ̃ bire takan Kirisi ibɛrɛ ũ, à gì De Ludai kũ a Nɛ́omɛ. 23 Gbɛ̃ kũ à gì Luda Nɛ́i De Luda vĩro. Gbɛ̃ kũ à zɛ̀ kũ Luda Nɛ́o mɛ́ à De Luda vĩ dↄ.

24 À tó yã kũ a mà zaa káaku gↄ̃ kú á swɛ̃̀ɛ gũn. Tó yã kũ a mà zaa káaku pì kú á swɛ̃̀ɛ gũn, ákↄ̃nↄ sↄ̃, anigↄ̃ kú Luda Nɛ́ gũn kũ a Deo. 25 Pↄ́ kũ Kirisi a lɛ́ sɛ̀wɛrɛn wɛ̃̀ndi kũ àdi lákaro ũ.

26 Ma yã bire òárɛ gbɛ̃ kũ òtɛni á sãtɛnↄ yã musu. 27 Ákↄ̃nↄ sↄ̃, Nini kũ a lè Kirisia kú á gũn. Á bàka kú kũ gbɛ̃ke yã dadanaárɛoro, zaakũ a Nini tɛn yã sĩnda pínki dadaárɛ, à yãpura vĩ, ɛ́kɛ kú a gũnlo. Lákũ àtɛn dadaárɛ nà, àgↄ̃ kú Kirisi gũn lɛ.

28 Tera sà ma nɛ́ yenyĩdenↄ, àgↄ̃ kú a gũn, de gↄrↄ kũ à bò gupuraa, ó swɛ̃̀ gↄ̃ ditɛna, wé'i sún ó kũ a sugↄrↄ zĩro.

29 Zaakũ á dↄ̃ kũ Luda mana, àgↄ̃ dↄ̃ kũ yãmanakɛri sĩnda pínki bi a nɛ́mɛ.

<- 1 YUHANA 1 1 YUHANA 3 ->