Bɑndun Gɑri I 11

1 Isirelibɑ kpuro bɑ mɛnnɑ bɑ nɑ Dɑfidin mi Heboroniɔ. Mɑ bɑ nùn sɔ̃ɔwɑ bɑ nɛɛ, bɛsɛ kɑ wunɛ, sɑ sɑ̃ɑwɑ yɛm tem. 2 Bɑɑ yellun di, sɑɑ ye Sɔɔlu u sɑ̃ɑ bɛsɛn sunɔ, wunɑ ɑ rɑ sun mɛnnɛ ɑ sun kpɑrɑ ɑ kɑ tɑbu dɑ, kpɑ ɑ kɑ mɑɑ sun wurɑmɑ. Gusunɔ wunɛn Yinni u mɑɑ nun sɔ̃ɔwɑ u nɛɛ, wunɑ kɑɑ ko bɛsɛn wirugii kpɑ ɑ bɛsɛ win tɔmbu kpɑrɑ.

3 Yerɑ Isirelibɑn guro gurobu kpuro bɑ nɑ Dɑfidi sinɑ bokon mi Heboroniɔ. Mɑ u kɑ bu ɑrukɑwɑni bɔkuɑ Yinni Gusunɔn wuswɑɑɔ Heboroni mi. Yerɑ bɑ nùn gum tɑ̃re wirɔ, bɑ nùn kuɑ be, Isirelibɑn sunɔ nge mɛ Yinni Gusunɔ u geruɑ sɑɑ Sɑmuɛlin nɔɔn di.

Dɑfidi u Yerusɑlɛmu wɔri

u mwɑ

(I mɑɑ mɛɛrio Sɑmuɛli II, 5:6-10)

4 Sɔ̃ɔ teeru, Dɑfidi kɑ Isirelibɑ kpuro bɑ Yerusɑlɛmu wɔri. Yerusɑlɛmu yerɑ bɑ mɑɑ sokumɔ Yebusi. Miyɑ Yebusibɑ bɑ wɑ̃ɑ. 5 Yerɑ bɑ Dɑfidi sɔ̃ɔwɑ bɑ bɛɛ, n ǹ koorɔ u duumɑ wuu ge sɔɔ.

Adɑmɑ Dɑfidi u bu wɔri u ben wuu gbɑ̃rɑruguu ge mwɑ. N deemɑ gerɑ bɑ mɑɑ sokumɔ Siɔni. Yen biru bɑ gu sokɑ Dɑfidin wuu. 6 N deemɑ Dɑfidi u rɑɑ win tɑbu kowobu sɔ̃ɔwɑ u nɛɛ, wi u gbiɑ u Yebusibɑ wɔri u kɑmiɑ, yɛ̃rowɑ u koo ko tɑbu kowobun wirugii. Mɑ Yoɑbu, Seruyɑn bii u gbiɑ u bu wɔri u kɑmiɑ. Mɑ u kuɑ wirugii.

7 Dɑfidi u dɑ u sinɑ wuu gbɑ̃rɑruguu gen mi. Yen sɔ̃nɑ bɑ gu sokɑ Dɑfidin wuu. 8 Mɑ u bɑni kuɑ u kɑ gu sikerenɑ. U bɑnɑwɑ sɑɑ Milon di u kɑ sikerenɑ. Mɑ Yoɑbu u mɑɑ gen mi n tie sɔnwɑ.

9 Mɑ Dɑfidin dɑm mu sosimɔ. Domi Gusunɔ wɔllu kɑ tem Yinni u wɑ̃ɑ kɑ wi.

Dɑfidin tɑbu kowobu

(I mɑɑ mɛɛrio Sɑmuɛli II, 23:8-39)

10 Wee be bɑ sɑ̃ɑ Dɑfidin tɑbu kowobun wirugibu. Be kɑ Isirelibɑ kpurowɑ bɑ nùn kuɑ sinɑ boko nge mɛ Yinni Gusunɔ u geruɑ win tɔmbun sɔ̃. Bɑ nùn mɛm nɔɔwɑwɑ mɑm mɑm win bɑndun wɑɑti ye kpuro sɔɔ.

11 Yɑsobeɑmu, Hɑkumɔnin bii u sɑ̃ɑ tɑbu kowobun wirugii ben turo. Wiyɑ u tɔmbu goobɑ wunɔbu (300) go kɑ yɑɑsɑ nɔn teerun tɑbu sɔɔ.

12 Yen biru Eleɑsɑɑ, Dodon bii, Akosigii, u sɑ̃ɑwɑ tɑbu kowobu itɑ yen turo. 13 U wɑ̃ɑ kɑ Dɑfidi Pɑsi Dɑmimuɔ, sɑnɑm mɛ Filisitibɑ bɑ mɛnnɑ bu kɑ bu tɑbu wɔri. Mɑ Isirelibɑ bɑ duki Filisitibɑn wuswɑɑn di. N deemɑ gberu gɑrɑ wɑ̃ɑ mi, tè sɔɔ bɑ ɔɔsu duurɑ. 14 Yerɑ Eleɑsɑɑ kɑ win tɔmbu bɑ yɔ̃rɑ gbee ten suunu sɔɔ bɑ kɑ tu yinɑ. Mɑ bɑ kɑ Filisitibɑ tɑbu kuɑ bɑ bu go. Yinni Gusunɔ u bu nɑsɑrɑ bɑkɑ wɛ̃ dɔmɑ te.

15 Sɔ̃ɔ teeru Dɑfidin tɑbu sinɑmbu tɛnɑ ye sɔɔ, ben itɑ bɑ dɑ bɑ nùn deemɑ Adulɑmun kpee wɔruɔ, sɑnɑm mɛ Filisitibɑn tɑbu kowobun wuuru gɑru tɑ nɑ tɑ ten sɑnsɑni girɑ Refɑbɑn wɔwɑɔ. 16 Sɑɑ ye sɔɔ, Dɑfidi u wɑ̃ɑ kpee wɔru ge sɔɔ, mɑ Filisitibɑn sɑnsɑni yɑ mɑɑ gire Bɛtelehɛmuɔ. 17 Mɑ Dɑfidi u Bɛtelehɛmun bɛkɛ kuɑ u nɛɛ, wɑrɑ u koo kɑ mɑn Bɛtelehɛmun gbɑ̃rɑ kɔnnɔn dɔkɔn nim nɑɑwɑ n nɔ.

18 Yerɑ win tɑbu durɔbu itɑ be, bɑ dɑ bɑ Filisitibɑn sɑnsɑni ye wɔri kɑ dɑm bɑ Dɑfidi nim mɛ tɑkɑmɑ bɑ kɑ nɑ. Adɑmɑ u ǹ mu nɔrɑ. U kɑ mu yɑ̃kuru kuɑwɑ, u Yinni Gusunɔ yɑriɑ. 19 U nɛɛ, Gusunɔ u mɑn gbɑrɑ bu nɛɛ, nɛnɑ nɑ nim mɛ nɔrɑ. Domi mɛn sɔ̃nɑ tɔn beni bɑ ben wɑ̃ɑru kɑri bɔrie. Nim mɛ, mu sɑ̃ɑwɑ nge ben yɛm mɛ mu koo rɑɑ yɑri.

Yen sɔ̃nɑ u yinɑ u mu nɔ.

Yenibɑ kpurowɑ Dɑfidin tɑbu kowobu itɑ be, bɑ kuɑ.

20 Abisɑi, Yoɑbun wɔnɔwɑ u sɑ̃ɑ tɑbu sinɑmbu tɛnɑ yen wirugii. Tɔmbu goobɑ wunɔbuwɑ (300) u go kɑ win yɑɑsɑ. Mɑ u yĩsiru yɑrɑ wigibun suunu sɔɔ. 21 Bɑ nùn bɛɛrɛ wɛ̃ too. Adɑmɑ u ǹ tɑbu durɔbu itɑ be turɑ.

22 Bɛnɑyɑ, Kɑbisɛɛligii, Yehoyɑdɑn bii, u sɑ̃ɑwɑ tɑbu durɔ wɔrugɔ. Mɑ u yĩsiru yɑrɑ nɑsɑrɑ dɑbi te u wɑn sɔ̃. Wiyɑ u Mɔɑbubɑn tɔmbu yiru gɑbu go, be bɑ sɛ̃ nge gbee sinɑnsu. Wiyɑ u mɑɑ duɑ dɔkɔ kpiriru sɔɔ u gbee sunɔ kɑ̃ɑsi mi, u go purɑn sɑɑ sɔɔ. 23 Mɑ u Egibitin tɑbu durɔ dɑmgii goo go. Win gunum mu sɑ̃ɑwɑ gɔm soonu nɔɔbu. Mɑ u yɑɑsɑ nɛni. Yen buru tɑ sɑ̃ɑwɑ nge weson dɛkɑ ye u rɑ beku yɑsɑ tɛ̃ke. Sɑɑ yè sɔɔ u nùn wɔrim dɔɔ, bokurɑ u nɛni. Ye u turɑ mi, mɑ u durɔ win yɑɑsɑ ye u nɛni mi wɔrɑ u kɑ nùn sɔkɑ u go. 24 Yenibɑ kpurowɑ Bɛnɑyɑ Yehoyɑdɑn bii u kuɑ. Mɑ u yĩsiru yɑrɑ tɑbu kowobu tɛnɑ ye sɔɔ. 25 U bɛɛrɛ bɑkɑ wɑ Dɑfidin tɑbu durɔbu tɛnɑ ye sɔɔ. Adɑmɑ yɑ ǹ tɑbu durɔ gbiikobu itɑ begiɑ turɑ. Mɑ Dɑfidi u nùn kuɑ win tiin kɔ̃sobun wirugii.

26 Dɑfidin tɑbu kowo ben gɑbun yĩsɑ wee, Asɑɛli, Yoɑbun wɔnɔ, kɑ Ɛlikɑnɑni, Dodon bii, Bɛtelehɛmugii, 27 kɑ Sɑmɔti, Hɑrorigii, kɑ Helɛsi, Pɑlonigii, 28 kɑ Irɑ, Ikɛsin bii, Tekoɑgii, kɑ Abiesɛɛ, Anɑtɔtugii, 29 kɑ Sibekɑi, Husɑgii, kɑ Ilɑi, Akoɑsigii, 30 kɑ Mɑhɑrɑi, Nɛtofɑgii, kɑ Helɛdi, Bɑɑnɑn bii, wi u mɑɑ sɑ̃ɑ Nɛtofɑgii, 31 kɑ Itɑi, Ribɑin bii, Gibeɑgii, ye yɑ wɑ̃ɑ Bɛnyɑmɛɛn temɔ, kɑ Bɛnɑyɑ, Pirɑtonigii, 32 kɑ Hurɑi, Nɑsɑle Gɑɑsigii, kɑ Abiɛli, Arɑbɑgii, 33 kɑ Asimɑfɛti, Bɑsɑrumugii, kɑ Eliɑbɑ, Sɑɑbonigii, 34 kɑ Bɛnɛ Hɑsɛmu, Gisonigii, kɑ Yonɑtɑm, Sɑgen bii, Hɑrɑrigii, 35 kɑ Akiɑmu, Sɑkɑɑn bii, Hɑrɑrigii, kɑ Elifɑli, Urun bii, 36 kɑ Hefɛɛ, Mɛkerɑgii, kɑ Akiyɑ, Pɑlonigii, 37 kɑ Hɛsiro, Kɑɑmɛligii, kɑ Nɑɑrɑi, Ɛsibɑin bii, 38 kɑ Yoɛli, Nɑtɑnin mɔɔ, kɑ Mibisɑɑ, Hɑgirin bii, 39 kɑ Selɛki, Amɔnigii, kɑ Nɑkɑrɑi, Berɔtugii wi u rɑ Yoɑbu, Seruyɑn biin tɑbu yɑ̃nu sɔbe, 40 kɑ Irɑ, kɑ Gɑrɛbu be bɑ sɑ̃ɑ Yetɛɛbɑ, 41 kɑ Uri, Hɛti, kɑ Sɑbɑdi, Alɑigii, 42 kɑ Adinɑ, Sisɑn bii, Rubɛnin bwese kɛrɑn wirugii turo, wi u tɑbu kowobu tɛnɑ mɔ, 43 kɑ Hɑnɑni, Mɑɑkɑn bii, kɑ Yosɑfɑti, Mitinigii, 44 kɑ Osiɑsi, Asitɑrɔtugii, kɑ Sɑmɑ, kɑ Yeyɛli be bɑ sɑ̃ɑ Hotɑmun bibu, Aroɛɛgibu, 45 kɑ Yediɛli, Simurin bii, kɑ win wɔnɔ Yokɑ, Tisigii, 46 kɑ Eliɛli, Mɑkɑfimugii, kɑ Yeribɑi, kɑ Yosɑfiɑ, Elinɑmun bibu, kɑ Yitimɑ, Mɔɑbu, 47 kɑ Eliɛli, kɑ Obɛdi, kɑ Yɑsiɛli, Sobɑgii.

<- Bɑndun Gɑri I 10 Bɑndun Gɑri I 12 ->