SOFONI
Yã́ pↄ́ kú láɛ bee guuↄ
Ãnabi Sofoni yã́ɛ bee ò e ãnabi Abaku àↄ gɛ́ ãnabikɛkɛi, à kà wɛ̃̀ 700 taawa e wàↄ gɛ́ Yesu Kilisi ii. Gↄↄ pↄ́ à yã́pi ò Kí Yosia i lousisiyã dafu zɛ́kalɛ a làao (2 Kíaↄ 23.1-28) mɛ́ Yudaↄ bùsu ku kai lɛ́zĩ gↄↄ beeɛ. Ãnabipi yã́zãsì gbɛ̃́ pↄ́ aalɛ làasookɛ wàlɛ mɛ: Lua bàa gi kúwanↄ yã̀ mↄↄↄ? À lá Lua a mↄ yã́ↄ gↄ̃́gↄ̃ taaↄ onɛ́: A mↄ yã́kpalɛkɛ ń Yudaↄ ń Yelusalɛũdeↄ (1.1-2.3), i buipãle pↄ́ an bùsu liaa Yudaↄziↄ midɛ (2.4-15), i ɛa su ń Yelusalɛũo a pa ziu. A a gbɛ̃́ↄ vãi kɛ̃́má, i ń nↄ̀sɛ lilɛnɛ́ ń dṹnia gbɛ̃́pii pↄ́o (3.1-20).
Sofoni mɛ̀ lↄ Lua gbɛ̃́ↄ fↄ̃ ń Luapi nama ma gbɛ̃́ pↄ́ anzĩa yã́ lɛ́ dↄaanɛ́ↄ kaalɛsaio. Ãma a laaidↄ nↄ̀sɛdoũdeↄ ń wɛ̃nadeↄwa. (2.3, 3.12).

Dii yã́kpalɛkɛa ń dṹniao

1 Dii yã'ò Kusi nɛ́ Sofoniɛ gↄↄ pↄ́ Amↄ nɛ́ Yosia* dɛ Yudaↄ kía ũ. Sofonipiá Gedalia tↄũnaɛ, Amalia sĩ́wɛnaɛ, Ezekia sↄ̃kpaɛɛ.

2 Má pↄ́pii waa tↄↄlɛwa.

Ma Dii mámɛ má ò.

3 Má gbɛ̃nazĩnaↄ ń nↄ̀bↄↄ waa píiɛ,

má bãↄ ń kpↄↄ waa píiɛ.

Má vãikɛnaↄ fu,

mí gbɛ̃nazĩnaↄ kaalɛ tↄↄlɛ.

Ma Dii mámɛ má ò.

4 Má ↄloo Yudaↄ ń Yelusalɛũdeↄla píiɛ.

Má guɛ bee zↄ̃ Baali gbàgbana pↄ́ gↄ̃̀ↄnɛ,

mí gulɛsĩ sa'onaↄ ń tã́a sa'onaↄ tↄ́ bãdɛ,

5 gbɛ̃́ pↄ́ aaì kúlɛ musupↄↄnɛ kpɛ́ musuↄ

ń gbɛ̃́ pↄ́ aaì kúlɛmɛɛ

aaì lɛgbɛ̃ ń ma tↄ́o,

aaì ɛa gbɛ̃ ń tã́a Mↄlↄkuoↄ,

6 gbɛ̃́ pↄ́ pↄ̀ↄbↄzãkɛ̀ aai tɛmazi lↄoↄ.

Aali ma kĩ́i wɛɛlɛ aa yãgbɛaao.

7 À kɛ kílikili Dii Lua aɛ,

asa Dii gↄↄ kãikũ̀.

À sa'obↄ dìlɛ Yudaↄ ũ,

à gbãbↄ̀ gbɛ̃́ pↄ́ à ń sisiↄnɛ.

8 Ma gbagbagↄↄzĩ

má ĩada kíaↄ ń kíanɛↄwa

ń gbɛ̃́ pↄ́ buipãle pↄkasa daaↄ píi.

9 Gↄↄ bee má ĩada

gbɛ̃́ pↄ́ aaì vĩvĩ kpɛɛlɛ bèeↄwa,

gbɛ̃́ pↄ́ aaì ń dii kpɛ́ pa

ń yãpãsĩo ń mↄafilioↄ.

10 Ma Dii ma mɛ̀,

gↄↄpi zĩ́ wa ↄ́ gbãa dↄ Kpↄ̀ Bↄlɛu,

Fã́ani dafu a wã ń wiio,

mɛ́ wa zↄa zↄ̃ↄ ma gbɛ̀sĩsĩↄ musu.

11 Ɛlɛfãanideↄ, à wiipɛ,

asa laatanaↄ midɛ píiɛ,

mɛ́ ↄde gbãngbooↄ kaalɛ míↄmiↄɛ.

12 Zĩbeezĩ má Yelusalɛũ kɛɛlɛ ń filiaↄ,

mí ĩada gbɛ̃́ pↄ́ kálɛa we

lán wɛ̃ pↄ́ kú ń a gbↄ̃oↄwa.

Gbɛ̃́piↄ ì o ń sↄ̃ guu aa mɛ

má yãe kɛo, a maa ge a vãin nò.

13 Wa ń àizɛɛↄ naaa,

an bɛↄ i gↄ̃ yàaa.

Aa bɛkpakpa,

kási aa e zↄ̃lɛuo,

aa vɛ̃ɛli pɛ́pɛ,

kási aa e a imio.

14 Dii gↄↄ zↄ̃ↄ kãikũ̀,

À kà kãi, àlɛ ká ń bao.

Dii gↄↄ zↄa aↄ dↄ wɛ̃nannↄ,

baa nɛgↄ̃na a wiipɛ.

15 Gↄↄpiá kpɛ̃nɛmuugↄↄɛ,

taasi ń yeelɛao gↄↄɛ lↄ.

Músi ń gudɛao gↄↄɛ,

gubeebee gↄↄɛ, gu a siakũ,

lou guduuduu gↄↄɛ.

16 Zĩbeezĩ kã̀ae'ↄ ń zĩkawiio aↄ dↄ

wɛ̃́lɛ bĩ́ideↄ ń bĩ́ipi gulɛsĩↄu.

17 Má gbɛ̃nazĩnaↄ da taasiu,

aai táa'o lán vĩ̀aↄwa,

asa aa duunakɛ̀mɛɛɛ.

Wa ń au daada lán íwa,

an gɛↄ aↄ kpálɛa lán bìsawa.

18 An ã́nusu ge an vua a fↄ̃ ń bↄ

Dii kpɛ̃nɛmuugↄↄpi zĩ́o.

Aà zafɛ̃a tɛ́ a kṹ dṹniawa píiɛ,

a gbɛ̃́ pↄ́ kú a guuↄ midɛ kã́ndo.

Sofoni 2 ->