Lomadeↄ 10

1 Ma gbɛ̃́ↄ, yã́ pↄ́ má yei ma sↄ̃ guu, málɛ a wabikɛ Luawa mɛ́ Isailiↄ suabaa ũ. 2 Má dɛ a seelade ũ, kɛ́ aa ãiavĩ ń Lua yã́o, ãma an wɛ́ kɛ̃ao. 3 Asa aa lá Lua ì to yã́ bↄńnↄ na dↄ̃o, ↄ̃ aaìↄ wɛɛlɛ yã́ bↄńnↄ na ń ńzĩa gbãao. Aai lá Lua ì to yã́ bↄńnↄ na sio. 4 Asa Kilisi Mↄizi ikoyã lɛpàpa, ↄ̃ yã́ ìↄ bↄ ń aà náaikɛnaↄ na. 5 Lá ikoyã ì to yã́ bↄńnↄ na ↄ̃ Mↄizi ò a taalau à mɛ̀, gbɛ̃́ pↄ́ yã́pi kũa aↄ ku a sabai.* 6 Lá luanaaikɛa ì to yã́ bↄńnↄ na a ò à mɛ̀:

Ńsu o n nↄ̀sɛu,

démɛ a gɛ́ luabɛ à Kilisi pilaio,

7 ge démɛ a gɛ́ bɛdau à Kilisi bↄ gauio.

8 Yã́ pↄ́ a òn kɛ:

Yã́pi kunnↄ kãi,

a kú ń lɛ́u ń n nↄ̀sɛo.†

Luanaaikɛa yã́ pↄ́ wi a waasokpa ↄ̃n yã́pi ũ. 9 Tó ń ò ń lɛ́o gupuau Yesu mɛ́ Dii ũ, mɛ́ ń a náai vĩ n nↄ̀sɛu Lua aà bↄ̀ gau, a n suaba. 10 Asa yã́pi náai vĩa nↄ̀sɛu ì to gbɛ̃́ bↄ maa, mɛ́ yã́pi oa ń lɛ́o ì gbɛ̃́ suaba. 11 A kɛ̃a Luayãtaalau wà mɛ̀, wí a gbɛ̃́ pↄ́ lɛ́ aà náaikɛ kũo.‡

12 Yudaↄ ń buipãleↄ dodoa kↄ̃ɛo, asa ampii an Dii doũɛ, ì kã́fĩakɛ a sìsinaↄnɛ píi. 13 Asa Dii sìsinaↄ bↄ píiɛ.§Yoɛ 3.5 14 Kpelewa aa aà sísi aà náaikɛsaii? Kpelewa aa aà náaikɛ aà yã́ masaii? Kpelewa aa aà yã́ ma waasokɛnasaii? 15 Tó wi waasokɛnaↄ zĩmáo, kpelewa aa waasokɛnɛ́i? A kɛ̃a Lua taalau wà mɛ̀: Baonakpanaↄ mↄa na.*Isa 52.7 16 Ãma gbɛ̃́pii i baonapi sio. Ɔ̃ Isaia mɛ̀: Dii, démɛ wá yã́ sìi? †Isa 53.1 17 Beewa luanaaikɛa ì bↄ aà yãmaa kĩ́iɛ, mɛ́ yã́piá Kilisi yã́ɛ. 18 Ma mɛ̀ yóo! Aai mao lé? Aa mà.

An lↄↄ tà dṹnia guu píi,

an yã'oa gɛ̀ e tↄↄlɛ lɛ́wa.‡

19 Ma mɛ̀ yóo! Isailiↄ i dↄ̃o lé? Mↄizi dↄ̀aa ò à mɛ̀:

Má tó bui pↄ́ aa dɛ ma gbɛ̃́ ũoↄ á pↄ fɛlɛɛ́,

má tó á pↄ pa bui wɛ́siadeↄ yã́ musu.§

20 Ɔ̃ Isaia sↄ̃dìlɛ à Lua lɛdↄɛkɛ̀ à mɛ̀:

Gbɛ̃́ pↄ́ aalɛ ma kĩ́i wɛɛlɛoↄ mɛ́ ma e,

ma azĩa ↄ̀lↄ gbɛ̃́ pↄ́ aalɛ ma gbɛaoↄnɛ.*

21 Isailiↄ yã́ musu sↄ̃ Lua ò:

Za kↄↄ e oosi ma ↄdↄ̀ bui swã́gbãade pↄ́ fɛ̃̀manↄↄzi.†

<- Lomadeↄ 9 Lomadeↄ 11 ->