Zia yã́ 19

Pↄnakɛa luabɛ

1 Bee gbɛa ma lↄↄ gbãa mà luabɛ lán dasi yã'owa à mɛ̀:

Àleluya! Wá Lua mɛ́ zĩblè!

Ɔ̃mɛ gawi ń gbãao vĩ,

2 asa ì yã́kpalɛkɛńnↄ a zɛ́wa ń sĩanaoɛ.

À yã́kpalɛkɛ̀ ń káalua zↄ̃ↄ pↄ́ dṹnia ↄ̃̀ↄkpà ń a káaluakaaopio.

À a zↄ̀blenaↄ dɛdɛa tↄsìwà.

3 Aa ò lↄ:

Àleluya!

A súɛlɛ aↄ dↄ gↄↄpiiɛ.*

4 Gbɛ̃zↄ̃ↄ gbɛ̃ↄn baasↄo mɛ̀ndosaiↄ ń pↄ́ bɛ̃́ɛ mɛ̀n síiↄ̃ↄ wùlɛwulɛ aa misìilɛ Luaɛ zↄ̃lɛa a báawa aa mɛ̀:

Ãmi! Àleluya!

5 Ɔ̃ ma lↄↄ mà báapi kĩ́i à mɛ̀:

À wá Lua táasilɛ

aà zↄ̀blenaↄ píi,

á gbɛ̃́ pↄ́ á aà vĩa vĩↄ,

nɛ́fɛ̃nɛn gbɛ̃zↄ̃ↄ.†

6 Ɔ̃ ma lↄↄ mà lán dasi yã'owa, lán izↄ̃ↄsukaawa, lán louvĩa gbãawa à mɛ̀:

Àleluya!

Dii wá Lua Gbãapiide nà kibleawa.

7 Wà pↄnakɛ wà yáalↄ wà aà tↄbↄ,

asa Sã nↄsɛgↄↄ kà, aà nↄ sↄu mà.

8 Wà bàabaa pua táitai tɛkɛa kpàwà aà ye.

Bàabaa piá Lua gbɛ̃́ↄ maakɛaↄɛ.

9 Malaika òmɛɛ: Kɛ̃́. Báaadeↄn gbɛ̃́ pↄ́ wà ń sisi Sã nↄsɛblɛble guuↄ ũ.‡Mat 22.2 A òmɛɛ lↄ: Lua yã́ sĩanan we. 10 Ma wulɛ aà gbázĩ mà misiilɛɛ̀, ↄ̃ a òmɛɛ: Bee tó. Kúlɛ Luaɛ. N zↄ̀blen deen ma ũ ń n gbɛ̃́ pↄ́ aaì Yesu seeladekɛ kɛↄ.§Zia 22.8-9 Yesu seeladekɛkɛa mɛ́ ãnabikɛmi ũ.

Kilisi mↄa dia sↄ̃kaapua kpɛ

11 Ɔ̃ ma luabɛ è a wɛ̃a, ↄ̃ sↄ̃kaapua bↄ̀, gbɛ̃́ pↄ́ di a kpɛ tↄ́n Náaide Sĩande. Ì yã́kpalɛkɛńnↄ, ì zĩkańnↄ a zɛ́wa.* 12 Aà wɛ́ dɛ lán tɛ́vuawa, kíafua pↄ́ a kpaa dasi. Tↄ́e kɛ̃a aà mi'aɛwa, gbɛ̃e tↄ́pi yáasi dↄ̃o, aà bàasio. 13 A ula pↄ́ tã̀ ń auo daa.† Aà tↄ́n Lua Yã́.‡ 14 Luabɛ zĩgↄ̃ↄ tɛaàzi, aa di sↄ̃kaapuaↄ kpɛ, aa bàabaa pua táitai dadaa. 15 Fɛ̃nda lɛna lɛ́ bↄ aà lɛ́u à buiↄ lɛò, i kiblemá ń mↄ̀ gopanao,§ i ↄ̃zↄ̃ vɛ̃ɛbɛↄwa vɛ̃ɛfɛ̃kĩi guu Lua Gbãapiide pↄkũma pãsĩ ũ.* 16 Wà tↄ́ɛ bee kɛ̃̀ aà ulawa ń aà gbalao:

Kíaↄ Kía, diiↄ Dii.

17 Ɔ̃ ma malaikae è zɛa kpaa ĩatɛ̃i. À lɛ́ gbãa zù bã pↄ́ aalɛ vua musumusuↄzi píi à mɛ̀: À mↄ kãaa à blɛ zↄ̃ↄ pↄ́ Lua kɛ̀ɛ́ ble, 18 í kíaↄ gɛ só ń sosa gbɛ̃zↄ̃ↄↄ ń gbãadeↄ ń sↄ̃́ↄ ń ń dikpɛnaↄ ń gbɛ̃́piio, wɛ̃́ɛↄ ń zↄↄ, nɛ́fɛ̃nɛn gbɛ̃zↄ̃ↄ.†Eze 39.17-20 19 Ɔ̃ ma wài è ń dṹnia kíaↄ ń ń zĩgↄ̃ↄ, aa kↄ̃ kã̀aa aa zĩka ń gbɛ̃́ pↄ́ di sↄ̃́ kpɛpio ń aà zĩgↄ̃ↄ. 20 Wà wàipi kũ̀ sãnu ń ãnabi ɛgɛna pↄ́ dabudabuↄ kɛ̀ aà aɛo. Dabudabupiↄ ↄ̃ à gbɛ̃́ pↄ́ aa wài seela vĩ aa kùlɛ a taaɛↄ sã̀sãò.‡Zia 13.1, 11-16 Wà ń zú tɛ́ ísida pↄ́ lɛ́ kṹ ń ĩatɛ̃gbↄ̃o guu bɛ̃́ɛ an pla ḿpii. 21 Gbɛ̃́ pↄ́ di sↄ̃́ kpɛ gbɛ̃́ kĩniↄ dɛ̀dɛ ń fɛ̃nda pↄ́ bↄ̀ a lɛ́uo,§2Tɛs 2.8 ↄ̃ bãↄ píi ń gɛ sòso aa kã̀.

<- Zia yã́ 18 Zia yã́ 20 ->