Zia yã́ 16

Lua pↄkũmabↄbↄa dṹniawa.

1 Ɔ̃ ma lↄↄ gbãa mà à bↄ̀ Lua kpɛ́u, a ò malaika gbɛ̃ↄn soplapiↄnɛ: À gɛ́ Lua pↄkũma pↄ́ kú tùu mɛ̀n soplaↄ guu ɛ́lɛi dṹniawa.

2 A sɛ̃́ia gɛ̀ a pↄ́ ɛ̀lɛ dṹniawa. Ɔ̃ sã́nɛ vãi pãsĩↄ*Bↄa 9.10 gbɛ̃́ pↄ́ wài seela vĩ aaì kúlɛ aà taaɛↄ lè.

3 A plaade a pↄ́ ɛ̀lɛ ísiawa. Ɔ̃ ísia í gↄ̃̀ lán gɛ̀ auwa, pↄ́ bɛ̃́ɛ pↄ́ kú a guuↄ gàga píi.

4 A àaↄ̃de a pↄ́ ɛ̀lɛ swaↄ ń nibↄnaↄwa, ↄ̃ an í lì au ũ.†Bↄa 7.17-21 5 Ɔ̃ má mà malaika pↄ́ í iko vĩ mɛ̀:

Kuaadoade, n gbɛ̃́ pↄ́ ń kú yãa,

mɛ́ ń kú tia,

n yã́kpalɛkɛ̀ńnↄ a zɛ́waɛ.

6 Aa n gbɛ̃́ↄ ń n ãnabiↄ au bↄ̀lɛ,

ↄ̃ n aupi kpàmá aa mì.

À kↄ̃sìńnↄ màaɛ.

7 Ɔ̃ ma lↄↄ mà sa'okĩi à mɛ̀:

Ao, Dii Lua Gbãapiide,

n yã́kpalɛkɛ̀ńnↄ a zɛ́waɛ,

mɛ́ a sĩana vĩ.

8 A síiↄ̃de a pↄ́ ɛ̀lɛ ĩatɛ̃wa, a tò à gbɛ̃nazĩnaↄ tɛkũ̀. 9 A pusu gbãa ń lɛ́, ↄ̃ aa Lua pↄ́ kìsia beeↄ iko vĩ tↄbɛ̃ɛsì. Aai nↄ̀sɛlilɛ aa aà tↄbↄ̀o.

10 A sↄode a pↄ́ ɛ̀lɛ wài kpalabaawa, ↄ̃ gusia‡Bↄa 10.22 dà aà kpalaa. Gbɛ̃́ↄ lɛ́ ń lɛ́ fĩ wãwã guu, 11 ↄ̃ aa Lua Musude tↄbɛ̃ɛsì an wãwã ń ń sã́nɛo yã́i. Aai nↄ̀sɛlilɛ aa mikɛ̃̀ ń yãkɛaↄwao.

12 A soolode a pↄ́ ɛ̀lɛ swa zↄ̃ↄ Uflatawa,§Isa 11.15 ↄ̃ swapi í bà à zɛbↄ̀ gukpɛ kíaↄnɛ. 13 Ɔ̃ ma tã́aↄ è mɛ̀n àaↄ̃ lán blↄↄↄwa, aalɛ bↄ kwã́ ń wàio ń ãnabi ɛgɛnao lɛ́u. 14 Tã́a dabudabukɛnaↄnɛ. Aalɛ gɛ́ dṹnia bṹu kíaↄ kĩ́i, kɛ́ aa ń kãaa zĩkaa Lua Gbãapiide gↄↄ zↄ̃ↄ zĩ́ yã́i. 15 Ma! Má mↄ́ lán kpã́iwaɛ.*Zia 3.3 Báaaden gbɛ̃́ pↄ́ lɛ́ itɛ̃kɛ mɛ́ a a pↄkasaↄ daa, kɛ́ asu bↄ bṹu wà aà puizi eo yã́i ũ.†Zia 3.18 16 Ɔ̃ tã́apiↄ kíapiↄ kã̀aa gu pↄ́ wì mɛ ń Ɛbɛlu yã́o Aamagedↄ̃.

17 A soplade a pↄ́ ɛ̀lɛ ĩ́anawa. Ɔ̃ lↄↄ gbãa bↄ̀ kpalabaa kĩ́i Lua kpɛ́u à mɛ̀: A lɛ́ kà. 18 Lou lɛ́ pílɛ, àlɛ vĩ, àlɛ pũna. Tↄↄlɛ lùalua pãsĩpãsĩ. Zaa wà gbɛ̃nazĩna kàlɛ dṹnia guu, a taa i kɛo, a pãsĩ kɛ̀ zài. 19 Mɛɛwia zↄ̃ↄ kɛ̃̀aa lɛɛ àaↄ̃, mɛ́ bui píi mɛɛwiaↄ kwɛ̀. Mɛɛwia zↄ̃ↄ Babɛli yã́ dↄ̀ Luagu, ↄ̃ à a pↄkũma vɛ̃ɛ gbãa imibↄ kpàwà a mì.‡Isa 51.17 20 Ísia gũgũnaↄ gɛ̃̀zɛa píi, wi wɛsi gbɛ̀sĩsĩↄlɛ lↄo. 21 Lougbɛ zↄ̃ↄↄ bↄ̀ luabɛ, aa kà kiloo bla. Aa kwɛ̀ gbɛ̃nazĩnaↄla,§Bↄa 9.23, Zia 11.19 ↄ̃ aa Lua tↄbɛ̃ɛsì lougbɛ kìsia yã́i, asa kìsiapi pãsĩ maamaaɛ.

<- Zia yã́ 15 Zia yã́ 17 ->