Soũↄ 9

9

Lua sáaukpaa kɛ́ ì yãkɛkɛ gbɛ̃́ↄnɛ yã́i

1 Davidi lɛ.

2 Dii, má n táasilɛ ń nↄ̀sɛmɛndoo,

má n yãbↄnsaɛkɛaↄ kpàwakɛnɛ́.

3 Má pↄnakɛ, má yáalↄ n yã́ musu,

Musude, má n tↄbↄ ń lɛsiao.

4 Ma ibɛɛↄ ì kpɛkpa,

aaì gɛ̃mbↄlɛ aa gaga n aɛ.

5 Asa n zɛmanↄ, n yãnakpàa,

zↄ̃lɛa n gĩ́naa n yãgↄ̃̀gↄ̃ a zɛ́wa.

6 N buipãleↄ lèle,

n gbɛ̃vãipiↄ míↄnzↄ̃,

n ń tↄ́ dɛ̀ míↄmiↄ.

7 N músi láasai kpà ma wɛ̀lɛↄzi,

n ń wɛ̃́lɛↄ kwɛ̀,

an yã́ dↄ gbɛ̃egu lↄo.

8 Dii ì kible gↄↄpii,

à a kpala dìlɛ yã́kpalɛkɛa yã́i.

9 A yã́kpalɛkɛ ń dṹnia gbɛ̃́ↄ súsu,

a kible buiↄwa a zɛ́wa.

10 Dii mɛ́ ulɛkĩi ũ

gbɛ̃́ pↄ́ wàlɛ gbãamↄnɛ́ↄnɛ,

a dɛnɛ́ aafia'ekĩi ũ taasikɛgↄↄ.

11 Dii, gbɛ̃́ pↄ́ n tↄ́ dↄ̃ↄ n náai vĩ,

nili n aɛyanaↄ vũaao.

12 À lɛsi Diiɛ, àlɛ kible Siↄna,

à aà yãkɛaↄ kpàwakɛ bui píiɛ.

13 Asa yã́ lí sãaaguo,

ì tↄsi gbɛ̃dɛnawa,

ì taasideↄ wiilɛa yãda.

14 Gwa lá ma ibɛɛↄ lɛ́ ĩadaa, Dii,

wɛ̃nadↄ̃mɛɛ, ní ma bↄ ga lɛ́zĩ,

15 mí lɛ́mama Siↄna bĩ́ibↄlɛu,

mí pↄnakɛ kɛ́ n ma suabà yã́i.

16 Buiↄ sì ɛ pↄ́ aa yↄ̃̀u,

an gbá zù ba pↄ́ aa kpàu.

17 Wa Dii dↄ̃ ń yã́kpalɛkɛa a zɛ́waoɛ,

ì to gbɛ̃vãi yãkɛa labadaaàla.

18 Gbɛ̃vãiↄ ì ta bɛdau,

bui pↄ́ aali Lua yãdaopiↄ.

19 Wɛ̃nadeↄ yã́ a sãaàgu bauo,

taaside wɛdↄaaàzi láaa vĩo.

20 Fɛlɛ Dii,

ńsu to gbɛ̃nazĩna n gã fĩo,

bui píi kãaa, ní yã́kpalɛkɛńnↄ.

21 Dii, to vĩa buiↄ kṹ,

kɛ́ aa e dↄ̃ wa dɛ gbɛ̃nazĩnaↄ ũ.

<- Soũↄ 8 Soũↄ 10 ->