Soũↄ 89

Lua lɛgbɛ̃a Davidiɛ

1 Ɛzala bui Etani* lɛ.

2 Dii, máↄ lɛsi n gbɛ̃kɛ yã́ musu láasaiɛ,

máↄ n náaiyã kpàwakɛ wɛ̃ ń wɛ̃o.

3 Má o n gbɛ̃kɛ líↄ kpálɛa vĩo,

n náaidekɛ zĩ́napɛlɛa musu n bɛ.

4 N mɛ̀ n bàa kú ń gbɛ̃́ pↄ́ ń sɛ̀o,

n lɛgbɛ̃̀ n zↄ̀blena Davidiɛ.

5 Ńyↄ̃ to aà bui àↄ kible gↄↄpiiɛ,

ńyↄ̃ aà kpala gba gbãa e aà buiwa.†

6 Musudeↄ n dabuyãↄ sáaukpa, Dii,

malaikaↄ n náaiyã'ò balu guu.

7 Asa gbɛ̃e ku musu à kà Diiwao,

malaikae muaaaànↄo.

8 Baa malaikaↄ kã̀aa, Lua mɛ́ fuańla,

gbɛ̃́ pↄ́ liaaaàziↄ mɛ ì seena ta.

9 Dii Lua Zĩgↄ̃de, démɛ muaannↄi?

Ń gbãa ń náaio vĩ yã́pii guu.

10 Ni gbãamↄ ísiaɛ,

tó à fɛ̀lɛ ń vĩvĩao, ni a zùukɛ.

11 N Egipiↄ suumpà aa gↄ̃̀ gɛↄ ũ,

n n wɛ̀lɛpiↄ fã̀aa ń n gã̀sa gbãao.

12 Musu ń zĩ́lɛoá n pↄ́ɛ,

n dṹnia kàlɛ ń pↄ́ pↄ́ kú a guuↄ.

13 N gugbãntoo ń gɛↄmidↄkĩio kɛ̀,

Taboo ń Ɛɛmↄ gbɛↄ ì guladↄma.

14 N gã̀saá gↄ̃sa pↄ́ɛ,

n ↄ gbãa mɛ́ n ↄplaa dↄ musu.

15 Yãmaa ń yã́zɛdeo mɛ́ n gĩ́na ɛ̃kpalɛ ũ,

gbɛ̃kɛ ń náaio mɛ́ dia n aɛwa.

16 Báaadeↄn gbɛ̃́ pↄ́ aa guladↄama dↄ̃,

aaìↄ bɛ n aɛ gupuauↄ ũ, Dii.

17 Aaìↄ pↄnakɛ ń n tↄ́o gↄↄpii,

aaì ĩ́anadã ń n maakɛao.

18 Asa an gawi ń ń gbãaon n ũ,

n zɛawanↄ yã́i wá mi daa ía.

19 Wá sɛ̀ngbaoá Dii pↄ́ɛ,

wá kíapiá wá Isailiↄ Lua pↄ́ɛ.

20 N yã'ò n yãmanaↄnɛ yãa

wɛ́pungu'ea guu n mɛ̀:

Ma dↄnlɛkɛ̀ nɛgↄ̃naɛ,

ma ɛ̀waasopi sɛ̀ lɛsĩ a gbɛ̃́ↄ guu.

21 Ma a zↄ̀blena Davidi è,

ma a nísikàwà ma aà dìlɛ.

22 Máↄ aà kũa ma ↄzĩɛ,

ma gã̀sa gbãa aↄ kuaànↄ.

23 Ibɛɛ a fↄ̃ falusiwào,

gbɛ̃vãi a e ↄnaalɛwào.

24 Má aà wɛ̀lɛↄ wíwi aà aɛ,

má aà zangudeↄ kwɛ́.

25 Máↄ náai vĩɛ̀ ń gbɛ̃kɛo,

aà mi iↄ daa ía ń ma tↄ́o.

26 Má ísia naɛ̀ a ↄzĩɛ,

iↄ iko vĩ swaↄwa.

27 A lɛzumazi à mɛ,

má dɛ a Mae ń a Luao ũ,

a gbɛsi ń a Suabanao ũ.

28 Má aà kɛ ma yoa ũ,

iↄ dɛ dṹnia kíaↄ mide ũ.‡

29 Máↄ gbɛ̃kɛ vĩaànↄ gↄↄpiiɛ,

ma bàa pↄ́ kuaànↄ gbooa vĩo.

30 Má tó aà bui àↄ kible gↄↄpiiɛ,

aà kpala iↄ ku e dṹnia gɛ láaò.

31 Tó aà buiↄ pãkpà ma ikoyãi,

mɛ́ aai tɛ ma yãdilɛaↄzio,

32 tó aa bↄ̀ ma yã́ kpɛ,

mɛ́ aa ma yãdanɛↄ kũao,

33 má gotↄ̃má an tàaeↄ yã́iɛ,

mí ń kɛ búubuu an vãi yã́ musu,

34 ãma gbɛ̃kɛ pↄ́ má vĩaànↄ a midɛo,

má fↄ̃ náaisaiyãkɛo.

35 Má a bàa pↄ́ kuaànↄ yã́ gbooo,

má lɛ́ pↄ́ má gbɛ̃̀ɛ̀ lilɛo.

36 Ma lɛgbɛ̃̀ ń mazĩa kuao gɛ̃n do,

má ɛɛto Davidiɛo, ma mɛ̀,

37 aà bui aↄ ku gↄↄpiiɛ,

aà kpala aↄ ku ma aɛ lán ĩatɛ̃wa.

38 Lá mↄvua dɛ seela náaide ũ musu,

màa aà kpala aↄ ku gↄↄpii.

39 Ń beeo n gi kía pↄ́ ń kpài,

n ↄkpàaàzi, n kolokɛ̀aànↄ.

40 N n bàa kua ń n zↄ̀blenao yã́ gbòo,

n sakà aà kíafuau, ń zù zĩ́lɛ.

41 N aà wɛ̃́lɛ bĩ́iↄ gbòo,

n aà zɛgikĩiↄ kwɛ̀ ń dàaĩ.

42 Gɛ̃zɛadeↄ lɛ́ ń baa sɛu,

à gↄ̃̀ láanipↄ ũ a saɛdeↄnɛ.

43 Ń tò aà wɛ̀lɛↄ gã gbã̀ɛ,

ń tò aà ibɛɛↄ pↄnakɛ̀.

44 N aà fɛ̃nda lɛ́ dɛ̀,

ni zɛaànↄ zĩ guuo.

45 N aà gawi kↄ'ɛ̀,

n aà báa bↄ̀aàla.

46 Ń tò à zikũ̀ a gbãau,

n widàwà.

47 Dii, ńyↄ̃ↄ ulɛawɛ̃ɛ gↄↄpii yã̀?

N pↄkũma tɛ́ aↄ kũ e bↄɛ ni?

48 Làasookɛ ma wɛ̃ni kulunkɛwa,

n gbɛ̃nazĩna kɛ̀ pã yã̀?

49 Gↄ̃sa kpele mɛ́ aↄ ku à gí gaii?

Démɛ a fↄ̃ azĩa si mia ikowai?

50 Dii, gbɛ̃kɛ pↄ́ ń vĩ yãa gɛ̀ má ni?

Lɛ́ pↄ́ ń gbɛ̃̀ Davidiɛ ń náaio sↄ̃ bɛ?

51 To n zↄ̀blena láanikɛa yã́ dↄngu,

buiↄ ma kɛa pↄ́ↄpↄↄ ma sↄ̃ zↄ̃̀.

52 N ibɛɛↄ kía pↄ́ ń kpà láanikɛ̀,

e gu pↄ́ aà kɛ̀sɛ zɛ̀u, Dii.

53 Wà Dii sáaukpa gↄↄpii!

Ãmi! Ãmi!

LÁ SÍIƆ̃DE

Soũↄ 90-106

<- Soũↄ 88 Soũↄ 90 ->