Soũↄ 34

34

Dii maakɛa

1 Lɛ pↄ́ Davidi dà gↄↄ pↄ́ à azĩa dìlɛ ĩ́ande ũ Abimɛlɛki aɛ, ↄ̃ Abimɛlɛki aà yà, à tà.*

2 Máↄ Dii sáaukpa gↄↄpiiɛ,

míↄ aà táasilɛ lá gu lɛ́ dↄ.

3 Máↄ ĩ́anadã Dii yã́ musu,

taasideↄ i ma, aai pↄnakɛ.

4 À zↄ̃ↄkɛ dↄ̃ Diiɛmanↄ,

wí aà tↄbↄ sãnu.

5 Ma Dii kĩ́i wɛ̀ɛlɛ ↄ̃ a wèa,

à ma bↄ ma sↄ̃̀deedee guu.

6 Gbɛ̃́ pↄ́ aà wɛ́ dↄaàzi a yáalↄ,

aà gɛɛ a gↄ̃ kpa aà wɛ́i bauo.

7 Ma taasidekɛ guu ma lɛzù Diizi,

ↄ̃ à ma yãmà à ma bↄ ma yooyea píi guu.

8 Dii Malaika ìↄ ku a vĩakɛnaↄ saɛ,

ì ń bↄ.

9 À iɛ àↄ dↄ̃ lá Dii maa,†

báaaden gbɛ̃́ pↄ́ nàaàzi ũ.

10 Dii gbɛ̃́ↄ, à vĩakɛɛ̀,

pↄe lí kɛ̃́sã aà vĩakɛnaↄwao.

11 Nↄana ì nↄ̀ↄmusu dɛ, pↄblea ì kɛ̃́sãwà,

ãma pↄmaae lí kɛ̃́sã Dii kĩ́i wɛ̀ɛlɛnaↄwao.

12 Gbɛ̃́ↄ, à mↄ ma yãma,

mí vĩakɛa Diiɛ dadaɛ́.

13 Gbɛ̃́ pↄ́ ye a wɛ̃ni àↄ maa,

mɛ́ a ye a kua àↄ na,

14 aà a lɛ́ fↄ̃́ ń yãvãi oao,

asu to ɛɛ bↄ a lɛ́uo.

15 Aà mikɛ̃ vãiwa, i maakɛ,

aà aafia zɛ́ wɛɛlɛ, iↄ tɛi.

16 Dii ìↄ wɛ́tɛ gbɛ̃maaↄzi,

ì swã́kpa ń wiilɛai.

17 Dii ì mikpɛdↄ vãikɛnaↄnɛ,‡

kɛ́ an yã́ su dↄ gbɛ̃egu lↄo yã́i.

18 Tó wà lɛzù Diizi, ì ma,

ì ń bↄ ń yooyea píi guu.

19 Dii kãi ń gbɛ̃́ pↄ́ an pↄ yàↄ,

ì dↄ gbɛ̃́ pↄ́ an kã́ gàↄlɛ.

20 Taasi ìↄ gbɛ̃maa le mↄ̀ↄmↄↄ,

ãma Dii ì aà bↄ a guu píi.

21 Ì aa wáↄ dↄ̃́aɛ̀ píi,

ìli ɛ́o, baa mɛ̀ndo.§

22 Kìsia a gbɛ̃vãiↄ dɛdɛ,

yã́ a zↄ̃lɛ gbɛ̃maa ibɛɛↄwa.

23 Dii ì a zↄ̀blenaↄ suaba,

yã́ a zↄ̃lɛ gbɛ̃́ pↄ́ nàaàziwao.

<- Soũↄ 33 Soũↄ 35 ->

a 1Sam 21.13-15
b 1Piɛ 2.3
c 1Piɛ 3.10-12
d Zãa 19.36

ReflectTheSON aims to make the Bible available worldwide, especially in nations that declare the Bible illegal.
About How to access ReflectTheSON Languages Downloads