Soũↄ 25

25

Lua wá dↄ̃̀ana

Davidi lɛ.

1 Dii, ma azĩa kpàmaɛ,

2 ma Lua, málɛ n náaikɛ.

Ńsu to wí ma kũo,

ńsu to ma ibɛɛↄ tidↄmalao.

3 Wí a gbɛ̃́ pↄ́ an wɛ́ dↄnziↄ kũo,

sema gbɛ̃́ pↄ́ bↄ̀ n kpɛ pãↄ.

4 Dii, ǹ n zɛ́ ↄlↄmɛɛ,

ní n yã́ dadamɛɛ.

5 Gɛmanↄ n sĩanau, ní dadamɛɛ,

asa Lua ma Suabanan n ũ,

ma wɛ́ ìↄ dↄnziɛ gↄↄpii.

6 N sùuu ń n gbɛ̃kɛo aↄ dↄngu,

asa ń vĩ za káauɛ, Dii.

7 Ńsu tàae pↄ́ má kɛ̀ↄ yãdao

ge duuna pↄ́ má kɛ̀ ma ɛ̀waasogↄↄ.

Ma yã́ àↄ dↄngu gbɛ̃kɛ guu,

kɛ́ ń maa yã́i, Dii.

8 Dii maa, ì yãkɛ a zɛ́wa,

bee yã́i ì a yãdada duunkɛnaↄnɛ.

9 Ì zĩabusanaↄ da a zɛ́wa,

ì yãmaa dadanɛ́.

10 Dii ìↄ gbɛ̃kɛ ń náaio vĩ

ń gbɛ̃́ pↄ́ zɛ̀ ń a bàakuańnↄ yã́o.

11 Baa kɛ́ ma duuna zↄ̃ↄ Dii,

sùuukɛmanↄ n tↄ́ yã́i.

12 Démɛ Dii vĩa vĩi?

Dii ì ade da zɛ́ pↄ́ dɛ aà sɛwa.

13 Ade aↄ ku nama guu,

aà buiↄ mɛ́ aa gↄ̃ ń bùsu vĩ.

14 Dii gbɛ̃kɛ vĩ ń a vĩakɛnaↄ,

ì to aaↄ a bàakuańnↄ yã́ dↄ̃.

15 Ma wɛ́ ìↄ pɛ Diiwa gↄↄpii,

asa ↄ̃mɛ ì ma gbá bↄ bau.

16 Ma wɛgwa, wɛ̃nadↄ̃mɛɛ,

asa má kú mado ń taasio.

17 Ma yã'ↄ̃maↄ kↄ̃̀ ma nↄ̀sɛ guu,

ma bↄ ma wɛ́tɛ̃api guu.

18 Ma taasi ń ma pↄsiao gwa,

ní ma duuna woloa píi.

19 Gwa lá ma ibɛɛↄ lìgua,

aa zamagu pãsĩpãsĩ.

20 Ma wɛ̃ni dↄ̃́a, ní ma misi,

ńsu to wí ma kũo, asa ma nanziɛ.

21 To sĩana ń kua maao àↄ ma dↄ̃́a,

asa ma wɛ́ ìↄ dↄnziɛ.

22 Lua, Isailiↄ bↄ ń taasikɛaↄu píi.

<- Soũↄ 24 Soũↄ 26 ->