22
Wiilɛa Luawa
1 Davidi lɛ.
2 Ma Lua, ma Lua,
bↄ́yãi n ma to wei?*Mat 27.46, Maa 15.34
Ma wiilɛ̀,
àkɛa ńlɛ mↄ́ ma suabaio ni?
3 Ma Lua, ma lɛzùnzi fãanɛ,
ni weao,
ma wiilɛ̀ma gwãasĩna,
ↄ̃ ń nílɛ.
4 N kua adoa, ń zↄ̃lɛa báawa,
ↄ̃ Isailiↄ ì ń táasilɛ.
5 Ḿmɛ wá deziↄ n náaikɛ̀,
aa n náaikɛ̀ ↄ̃ n ń mìsi.
6 Aa lɛzùnzi ↄ̃ aa bↄkĩi è,
aa n náaikɛ̀ ↄ̃ wí i ń kũo.
7 Kↄ̀ↄtɛ̃n ma ũ, gbɛ̃nazĩnan ma ũo,
wàlɛ ma sↄ̃sↄ̃, wàlɛ sakamagu.
8 Gbɛ̃́ pↄ́ lɛ́ ma gwaↄ lɛ́ ma yáalↄ,
aalɛ lɛsuikɛa,
aalɛ mikɛ déũdeũ aalɛ mɛ:†Mat 27.39, Maa 15.29, Luk 23.35
9 Lá àlɛ Dii náaikɛ, aà aà bↄ,
tó aà yã́ kàaàguɛ, aà aà misi.‡Mat 27.43
10 Ḿmɛ n ma bↄ ma da nↄ̀sɛu,
n ma dↄ aà yↄ̃́wa.
11 Má na n ↄzĩ za nɛasakpɛuɛ,
ń dɛ ma Lua ũ za ma da nↄ̀sɛu.
12 Ńsu ǹyↄ̃ kumanↄ zã̀o,
asa taasi lɛ́ mɛkpa,
mɛ́ gbɛ̃e ku à dↄmalɛo.
13 Wa liaamazi dasidasi lán zugaaeↄwa,
wa pooamazi lán Basana zuswanaↄwa.
14 Wàlɛ lɛdↄdↄa lán nↄ̀ↄmusu ↄↄlↄna pↄ́ aalɛ pↄ́ taitaiↄwa.
15 Ma gbãa gɛ̃̀zɛa lán í kↄ́lɛawa,
ma guↄ bↄ̀ↄũ píi,
ma mɛ yↄ̀ lán zↄsawa.
16 Ma kòlo giigàga lán pɛ̃nkasowa,
ma lɛ́na nàalɛ ma lɛ́ musu.§Zãa 19.28
Wà ma wulɛ lán gɛwa bùsutiu.
17 Gbɛ̃́ↄ liaamazi dasidasi lán gbɛ̃ↄwa,
gbɛ̃vãipiↄ nↄ̀nↄaamazi,
aa ma ↄↄ ń ma gbáↄ fↄ̃̀fↄ̃.*Zãa 20.27
18 Má fↄ̃ mà a wáↄ nao píi.
Wà wɛbìibii, wàlɛ ma gwa,
19 wàlɛ ma pↄkasaↄ kpaalɛ,
wàlɛ tɛ́lɛpa ma ulatao yã́ musu.†Mat 27.35, Maa 15.24, Luk 23.34, Zãa 19.24
20 Dii, ńsu ǹyↄ̃ kumanↄ zã̀o,
ḿmɛ ń ma gbãa ũ,
mↄ dↄmalɛ kpakpa,
21 ma bↄ an fɛ̃nda lɛ́zĩ,
ma wɛ̃ni si gbɛ̃piↄ swaawa,
22 ma bↄ nↄ̀ↄmusupiↄ lɛ́zĩ,
ma si zùsɛ̃lɛpiↄ kↄ́bawa,
23 mí n tↄbↄ ma gbɛ̃́ↄnɛ,
mí n táasilɛ kↄ̃kãaa guu.‡Ɛbɛ 2.12
24 Á Dii vĩakɛnaↄ, à aà táasilɛ,
á Yakↄbu buiↄ, à aà tↄbↄ,
á Isailiↄ, à misiilɛɛ̀.
25 Asa i saka taasideguo,
i aà wɛ̃nadekɛ yaboo,
i mikpɛdↄɛ̀o,
à swãkpà aà wiilɛai.
26 Má n táasilɛ balu guu,
má lɛ́ pↄ́ má kɛ̀ma fĩabo n vĩakɛnaↄ wáa.
27 Taasideↄ pↄble aa kã́,
Dii kĩ́i wɛ̀ɛlɛnaↄ aa aà táasilɛ,
aaiↄ ku gↄↄpii.
28 Dṹnia bṹu gbɛ̃́ↄ Dii dↄ̃, aai zɛaànↄ,
bui pↄ́ kúuↄ kúlɛɛ̀ píi,
29 asa kpalableaá Dii yã́ɛ,
ì kible bui píiwa.
30 Dṹnia gbãadeↄ kúlɛɛ̀ píi,
gbɛ̃́ pↄ́ gɛ̀ gɛ́kĩiↄ misiilɛɛ̀ píi.
31 An buiↄ zↄbleɛ̀,
aa Dii yã́ dau siu ziadeↄnɛ,
32 aai o gbɛ̃́ pↄ́ wi ń i yãaoↄnɛ
lá à yãnakpàmá,