Soũↄ 2

2

Kía pↄ́ Lua kpà

1 Bↄ́yãi bui ń buio lɛ́ zↄakai?

Àkɛa wàlɛ lɛ́ pã kpaaĩi?

2 Dṹnia kíaↄ lɛ́ zĩ̀ sↄukɛ,

kpalablenaↄ lɛ́ kãaa Dii

ń Kía pↄ́ a kpàozi.*

3 Aalɛ mɛ: Wà ń mↄdaonaↄ kɛ̃́kɛ̃,

wà ń ba polowá.

4 Dii lɛ́ ń àlafiikɛ,

zↄ̃lɛa musu àlɛ ń yáalↄ.

5 A palamá ń pↄfɛ̃o,

aà kpɛ̃nɛ ì to vĩa ń kṹ.

6 À mɛ̀ a a Kía kpà

a gbɛ̀sĩsĩ Siↄna musu.

7 Má yã́ pↄ́ Dii dìlɛmɛɛ o à mɛ̀:

Ma nɛ́n n ũ, n Maen ma ũ gbã.†

8 Wabikɛa, mí n gba bui píi,

mí dṹnia gola síiↄ̃ kpama n pↄ́ ũ.

9 Ńyↄ̃ kiblemá ń mↄ̀ gopanao,

ńyↄ̃ ń wíwi lá wì gĩ̀ oo wiwa.‡

10 Kíaↄ, à lɛdamaɛ bee ma,

dṹnia kpalablenaↄ, à ↄ̃nↄkũ sa.

11 À zↄble Diiɛ ń vĩakɛaɛ̀o,

à kúlɛ bùsu sɛɛ̀ ń lualuao,

12 kɛ́ aà pↄ su fɛ̃́ázi à gaga zɛ́uo,

asa aà pↄ ì pa kã́ndoɛ.

Báaaden gbɛ̃́ pↄ́ nàaàzi ũ.

<- Soũↄ 1 Soũↄ 3 ->

a Zĩn 4.25-26
b 2Sam 7.14, Mat 3.17, Zĩn 13.33, Ɛbɛ 1.5, 5.5
c Zia 2.26-27, 12.5, 19.15

ReflectTheSON aims to make the Bible available worldwide, especially in nations that declare the Bible illegal.
About How to access ReflectTheSON Languages Downloads