Soũↄ 105

105

Lua a gbɛ̃́ↄ suabaa

(1Lad 16.8-22)

1 À Dii sáaukpa, í lɛ́mawà,

à to bui píi aà yãkɛaↄ dↄ̃.

2 À lɛsi, í aà táasilɛ,

à aà yãbↄnsaɛkɛaↄ galikɛ píi.

3 À ĩ́anadã ń Dii tↄ́ pↄ́ kú adoao.

Á Dii kĩ́i wɛ̀ɛlɛnaↄ à pↄnakɛ,

4 à gɛ Dii le à gbãa gbɛawà,

íↄ aà aɛya gↄↄpii.

5 À to yãbↄnsaɛ pↄ́ a kɛ̀ↄ dↄágu,

aà dabudabukɛaↄ ń ikoyã pↄ́ a òↄ,

6 á Dii zↄ̀blena Ablahaũ buiↄ,

á Yakↄbu bui pↄ́ à á sɛ́ↄ.

7 Dii mɛ́ wá Lua ũ,

ↄ̃mɛ ì yãdilɛ gbɛ̃́piiɛ.

8 Aà bàakuawanↄ yã́ lí sãaaguo,

yã́ pↄ́ a òpi aↄ kuɛ e wá buiwa.

9 Aà bàa kú ń Ablahaũo,[a]

à ɛ̀a à a lɛgbɛ̃̀ Izaakiɛ lↄ.[b]

10 Aà bàa ɛ̀a kú ń Yakↄbuo iko ũ,

ↄ̃ a kú ń Isailiↄ e gↄↄpii.

11 À mɛ̀ á Kanaa bùsu kpámá,

aↄ dɛ pↄ́ pↄ́ aa sɛ kpaalɛ guu ũ.[c]

12 Gↄↄ bee aa dasio, wìli ń yãdao,

aa ku Kanaa bùsuu bↄ̀mↄↄ ũɛ.

13 Aaìↄ liaaliaa bui ń buioↄ guu,

aaìↄ bɛbɛ bùsu ń bùsuo.

14 I we wà ń wɛtã̀o,

à kíaↄ lèle an yã́ musu à mɛ̀

15 aasu ↄkã gbɛ̃́ pↄ́ a ń sɛ́piↄwao,

aasu ĩada a ãnabipiↄwao.[d]

16 Ɔ̃ a tò nↄana kà bùsupiu,

a tò an kũ̀sũa làa píi.[e]

17 Ɔ̃ à Yosɛfu gbàɛ à dↄ̀aanɛ́,

wà aà yìa zↄ ũ.[f]

18 Wà mↄkà aà gbáwa,

wà mↄ dↄ̀ aà nↄɛ[g]

19 e yã́ pↄ́ à dↄ̀aa ò gɛ̀ kɛ̀ò,

ↄ̃ yã́ pↄ́ Dii dàɛ̀ tò yã́ bↄ̀aànↄ na.[h]

20 Kɛ́ kía gbɛ̃́ zĩ̀, ↄ̃ wà aà gbàɛ,

bùsu gbɛ̃zↄ̃ↄpi aà kɛ̃̀.[i]

21 À aà dìlɛ a bùsu dↄaana ũ,

a tò aàↄ iko vĩ a àizɛɛↄwa píi.[j]

22 Yosɛfu aà kíaↄ tòto a pↄeãwa,

à ↄ̃nↄ dà aà ìwaↄnɛ.

23 Ɔ̃ Yakↄbu buiↄ mↄ̀ Egipi,[k]

Isailiↄ ku nibↄↄ ũ Haũ buiↄ bùsuu.[l]

24 Dii tò a gbɛ̃́ↄ kↄ̃̀ we maamaa,

a tò aa dasikũ̀ dɛ ń ibɛɛↄla.

25 Ɔ̃ à ń ibɛɛpiↄ swãfɛ̃̀, ↄ̃ aa zà aà gbɛ̃́piↄu,

aa ↄ̃nↄsↄpɛ̀lɛ aà zↄ̀blenapiↄnɛ.[m]

26 À a zↄ̀blena Mↄizi zĩ̀má[n]

ń Aalona pↄ́ a sɛ̀o.[o]

27 Aa yãkɛ̀ Egipiↄnɛ seela ũ,

aa dabudabukɛ̀ Haũ buipiↄ bùsuu.

28 À gusia gbàɛmá, gu sì ń bùsuu,[p]

kɛ́ aa gì aà yãmai yã́i.

29 À ń swa'i lìlɛ à gↄ̃̀ au ũ,

ↄ̃ a kpↄↄ gàga.[q]

30 Blↄↄ lì ń bùsua

ń ń gbãadeↄ wúlɛkĩiↄ píi.[r]

31 À yã'ò ↄ̃ ũsĩnaↄ kàńgu,[s]

gã́i kàńgu e an bùsu lɛ́ lɛ́u píi.[t]

32 À lougbɛ kàńgu lou ũ,

loupilɛa lì ń bùsua gupiiu.[u]

33 À ń vɛ̃ɛliↄ ɛ̀'ɛ ń ń kaadↄɛnliↄ,

à ń bùsu líↄ kɛ̀ kɛ́lɛkɛlɛ píi.

34 À yã'ò ↄ̃ kwaↄ kàńgu,

kwasutɛ̃ↄ kà, aa lɛ́ vĩo.

35 Aa ń bùsu sɛ̃ ń láo nɛ̀,

aa ń buapↄ́ↄ blè píi.[v]

36 À ń bùsu nɛgↄ̃ɛ sɛ̃́iaↄ dɛ̀dɛ píi,

nɛ́ woode pↄ́ aa ń í ń ɛ̀waasogↄↄpiↄ.[w]

37 À bↄ̀lɛ ń a gbɛ̃́ↄ,

aa ã́nusu ń vuao kũa,

an bui gbɛ̃e i gɛ̃nalɛ zɛ́uo.

38 Kɛ́ aa bↄ̀lɛ, Egipiↄ pↄ kɛ̀na,

kɛ́ vĩa ń kṹ Isailiↄ yã́ musu yã́i.[x]

39 À tɛlu pɛ̀lɛ kpà a gbɛ̃́ↄzi,

à kɛ̀ tɛ́ ũ gwã́, à gupùnɛ́.[y]

40 Aa wabikɛ̀wà, ↄ̃ à mↄ̀nɛ́ ń bùuↄ,

à musu blɛ kpàmá aa kã̀.[z]

41 À gbɛsi pàa, ↄ̃ í bↄ̀u,[aa]

ípi bàalɛ̀ guwaiwaiu we lán swawa.

42 Asa lɛ́ pↄ́ a gbɛ̃̀ yã́ dↄaàguɛ,

yã́ pↄ́ a ò a zↄ̀blena Ablahaũɛpi.

43 À bↄ̀ ń a gbɛ̃́ↄ, aalɛ pↄnakɛ,

gbɛ̃́ pↄ́ a sɛ̀piↄ guladↄ.

44 À buipãleↄ bùsu kpàmá,[bb]

zĩ pↄ́ gbɛ̃́piↄ kɛ̀ↄ ài gↄ̃̀nɛ́.

45 Bee kɛ̀ píi kɛ́ aa e wàↄ a yãdilɛaↄ kũa,

aai a ikoyãↄ da.

Àleluya!

<- Soũↄ 104 Soũↄ 106 ->