103
Lua gbɛ̃kɛ
Davidi lɛ.
1 Má Dii sáaukpa,
má aà tↄ́ pↄ́ kú adoa bↄ ń nↄ̀sɛmɛndoo.
2 Má Dii sáaukpa,
aà maakɛae a sãmaguo.
3 Ì sùuukɛmanↄ ń ma tàaeↄ píi,
ì ma gbã́gbã ń ma gyãↄ píi.[a]
4 Ì ma bↄ ga lɛ́zĩ,
ì maakɛmɛɛ a gbɛ̃kɛ guu.
5 Ì to pↄmaaↄ mↄa,
mí ɛa su ɛ̀waaso ũ lán kúuwa.
6 Dii ì yãkɛ a zɛ́wa,
ì to yã́ bↄ ń gbɛ̃́ pↄ́ wàlɛ gbãamↄnɛ́ↄnɛ na.
7 A tò Mↄizi a pↄeã dↄ̃̀,
à a yãkɛaↄ ↄ̀lↄ Isailiↄnɛ.
8 Dii sùuu vĩ ń sósobio,
aà pↄ́ lí pa kpaao,
a gbɛ̃kɛ vĩ maamaaɛ.[b]
9 Ìliↄ zↄadↄmá láasaio,
aà pↄ líↄ fɛ̃a gↄↄpiio.
10 Ìli yãkɛwɛ̃ɛ wá duunawao,
ìli ĩadawá wá vãikɛawao.
11 Lá luabɛ lɛsĩ dɛ ń tↄↄlɛo,
màa a gbɛ̃kɛ vĩ zↄ̃ↄ ń a vĩakɛnaↄ.
12 Lá gukpɛ zã̀ kↄ̃ɛ ń bɛ'aɛo,
màa ì wá tàaeↄ kɛ̃́wá.
13 Lá mae ì a nɛ́ↄ wɛ̃nagwa,
màa Dii ì wɛ̃nadↄ̃ a vĩakɛnaↄnɛ,
14 asa a wá kɛbↄ dↄ̃,
wá dɛa bùsuti ũ dↄaàgu.[c]
15 Gbɛ̃nazĩna wɛ̃ni dɛ lán sɛ̃waɛ,
ìↄ gawi vĩ gↄↄpla lán lávuwaɛ.[d]
16 Tó ĩ́anapɛ̀wà, ì gɛ̃lɛɛ,
a kúkĩi líↄ dↄ gbɛ̃egu lↄo.
17 Dii ìↄ gbɛ̃kɛ vĩ ń a vĩakɛnaↄ
za asĩnizĩ e gↄↄpii,
ì maakɛ ń nɛ́ↄnɛ ń ń tↄũnaↄ,[e]
18 gbɛ̃́ pↄ́ zɛ̀ ń aà bàakuańnↄ yã́o
aa yã́ pↄ́ a dìlɛↄ kũaↄ.
19 Dii a kpalabaa kpàlɛ musu,
a iko vĩ gbɛ̃́piiwa.
20 À Dii sáaukpa aà malaikaↄ,
ikode pↄ́ i aà yã'onɛ ma à zĩkɛwàↄ.
21 À Dii sáaukpa, aà ìwaↄ píi,
aà zĩkɛna pↄ́ i aà pↄeã kɛↄ.[f]
22 À Dii sáaukpa, aà pↄkɛaↄ píi
gu pↄ́ àlɛ kibleuↄ píi.