Yáasiↄ 30

30

Aguu yã'oa

1 Yakɛ nɛ́ Aguu yã'oa.

Ma kpasa Lua, ma kpasa dúuduu,

2 asa ma sↄũkɛ dɛ dãↄla,

má gbɛ̃nazĩna wɛzɛ̃ vĩo.

3 Mi ↄ̃nↄ dadao,

mɛ́ má Lua dↄ̃a vĩo.

4 Démɛ gɛ̀ luabɛ yãa à sùi?

Démɛ ĩ́ana kã̀aa kũ̀ a ↄzĩi?

Démɛ lou yè a pↄkasaui?

Démɛ tↄↄlɛ lɛ́ dài?

Aà tↄ́n lai? Aà nɛ́ tↄ́n lai?

Tó ń dↄ̃.

5 Lua yã́ↄ pípia píiɛ,

ìↄ dɛ sɛ̀ngbao ũ gbɛ̃́ pↄ́ nàaàziɛ.

6 Ńsu yãe kã́fĩ aà yã́ guuo,

kɛ́ asu ń ɛɛkanɛ ń ↄzĩo yã́i.

7 Yã́ mɛ̀n pla málɛ gbɛama Dii,

ńsu giomɛɛ e màↄ gao.

8 Ma kɛ̃ yãpã oa ń ɛɛtoaowa.

Nìli ma gba blɛ ma lɛ́ lɛ́u.

Ńsu ma da taasi ge ↄdekɛuo,

9 kɛ́ pↄ́ su àↄ dimazi

mà lelekpanzi mà mɛ,

démɛ Lua ũio,

mɛ́ kɛ́ taasi su ma kũ mà kpã́i'o

mà n tↄ́ ↄ̃̀ↄkpao.

10 Ńsu yãdↄ zↄwa a dii kĩ́io,

kɛ́ asu n ka, à wi n musuo yã́i.

11 Gbɛ̃eↄ ku, aaì ń mae kaɛ,

aali samaa'o ń daɛo.

12 Gbɛ̃eↄ ku aaliↄ e wa gbãsĩo,

kási an ã́makɛ i kɛ̃́máo.

13 Gbɛ̃eↄ ku an wɛ́pɛkĩi zã̀,

aaì ń mi ga da ía.

14 Gbɛ̃eↄ ku an swaaá fɛ̃ndaɛ,

an kãnkãnaá fɛ̃naɛ,

aaì dṹnia taasideↄ ń gbɛ̃nazĩn wɛ̃nadeↄ taitaiò.

15 Too nɛnↄɛnaↄ vĩ mɛ̀n pla,

aaì mɛ: Wá gba, wá gba.

Pↄ́ mɛ̀n àaↄ̃ ku aali kã́o,

à kà síiↄ̃ se, aali mɛ pↄ́ mↄ̀máo:

16 Bɛda ń nɛasakpɛ giio

ń tↄↄlɛo asa í lí mↄ́wào

ń tɛ́o asa ìli mɛ a kã ziio.

17 Wɛ́ pↄ́ nɛ́ ì a mae láanikɛò mɛ́ ì sakaò a dau,

swa'ɛ gbagbaaↄ mɛ́ aa aà wɛ́pi bↄ,

yãamusuↄ i gbasa aa aà gɛ ble.

18 Yã́ mɛ̀n àaↄ̃ ku aa dɛ ma dↄ̃ala,

à kà síiↄ̃ se kɛ́ má ń midↄ̃o:

19 Zɛ́ pↄ́ yãamusu ìↄ bɛò musu,

zɛ́ pↄ́ mlɛ̃ ìↄ táa'oò gbɛsɛɛnaa,

zɛ́ pↄ́ gó'ilɛna ìↄ bɛò ísia guo

ń zɛ́ pↄ́ gↄ̃ɛ ìↄ yeò wɛ̃́ndiazio.

20 Nↄɛ dↄ́ɛ'ĩide yãkɛan kɛ:

Ì pↄble, ì ↄma a lɛ́wa,

ì mɛ i vãikɛo.

21 Yã́ mɛ̀n àaↄ̃ ì tↄ̃ tↄↄlɛwa à lualua,

à kà síiↄ̃ se a yã́piↄ fↄ̃o:

22 Zↄ kpalablea,

sↄũ pↄble kãa,

23 nↄɛ pↄ́ wa zau zãkɛa,

zↄ̀ wɛ̃́ndia gↄ̃a a dii zã́ nↄ ũ.

24 Pↄ́ nɛ́naↄ ku tↄↄlɛ mɛ̀n síiↄ̃,

kási aa ↄ̃nↄ vĩ maamaaɛ:

25 Bↄↄnaↄ dɛ pↄ́ gbãaↄ ũo,

kási aaì blɛ kũ̀sũa di saɛɛ.

26 Ɛ̃n'ui'uinaↄ dɛ pↄzↄ̃ↄↄ ũo,

kási aaì bɛkpa gbɛ̀sↄↄuɛ.

27 Kwaↄ líↄ kía vĩo,

kási aaì bↄlɛ zɛ́zɛ gã ń gãoɛ.

28 Ńyↄ̃ fↄ̃ zↄ̃ kṹ ń ↄo,

kási ì e gɛ na kía kpɛ́ saaiɛ.

29 Pↄ́ mɛ̀n àaↄ̃ ku an bɛa maa,

à kà síiↄ̃ se an táa'oa kɛfɛũ:

30 Nↄ̀ↄmusu pↄ́ dɛ gↄ̃sa ũ nↄ̀bↄↄ guu,

ìli pↄ̀ↄbↄzãkɛ pↄeɛo

31 ń kosa pↄ́ toe bↄo ń blesan giio

ń kía pↄ́ kú a zĩgↄ̃ↄ aɛo.

32 Tó n sↄũyã kɛ̀ zĩasɛa lɛsĩ guu

ge tó n vãi làasookɛ̀, ↄku n lɛ́wa,

33 asa lá wì vĩ disaa í fɛ̃́ à gↄ̃ wàagase ũ,

ge lá wì ní kṹ wà fĩ à aubↄ,

màa gbɛ̃́ↄ pↄfɛ̃anɛ ì sòleda.

<- Yáasiↄ 29 Yáasiↄ 31 ->