Yáasiↄ 24

24

1 Ńsu lua gbɛ̃vãiↄ gweaio,

ńsu yãalɛańnↄ nidɛ seo.

2 Yã́ gbãa làasoo mɛ́ ìↄ kú ń sↄ̃u,

yãkele mɛ́ ìↄ dↄ ń lɛ́u.

3 Ɔ̃nↄ wì uakpaò,

wɛzɛ̃ ì to àↄ báaa vĩ.

4 Dↄ̃a ↄ̃ wì pↄ́ kaò làasiↄ pai

ń àizɛɛ maa gawideo.

5 Ɔ̃nↄna gbãa ìↄ kã́fĩɛ,

dↄ̃na iko ìↄ dɛdɛɛ.

6 Zĩgbasɛlɛa ì to wà fↄ̃ wà zĩka,

tó yãkɛkɛnaↄ dasi, ì to wà zĩble.

7 Ɔ̃nↄ lɛsĩ dɛ faasaidea,

wɛ̃́lɛ kↄ̃kãaa guu aà lɛ́ ìↄ kpaaũaɛ.

8 Gbɛ̃́ pↄ́ ìↄ vãikɛanɛ́ làasoo vĩ

ↄ̃ wì mɛ kↄ̃nide.

9 Yãfaasai wàaipaaá duunaɛ,

gbɛ̃e líↄ ye gbɛ̃́laanikɛna gĩyãio.

10 Tó n nzĩa bùsa taasiɛ,

n yɛ̃̀ɛɛ mɛ́ bílao.

11 Gbɛ̃́ pↄ́ aa mipɛ̀ gawaↄ suaba,

gbɛ̃́ pↄ́ aa sòo lɛ́ si kaalɛ guuↄ misi.

12 Tó n mɛ̀: Ó'o, wá dↄ̃ yãao fá,

Lua pↄ́ nↄ̀sɛ guu yã́ dↄ̃ a eo lé?

N wɛ̃ni Dↄ̃̀ana a yã́ dↄ̃,

a fĩabo baadeɛ a yãkɛawaɛ.

13 Ma nɛ́, zↄ́ ble, asa a naɛ,

zↄsapuna ì kɛ lɛ́ɛ na.

14 Màa ↄ̃nↄ ì kɛ gbɛ̃́ɛ na a nↄ̀sɛu.

Tó n ↄ̃nↄkũ̀, ńyↄ̃ↄ zia vĩ,

mɛ́ tãmaa a n nɛo.

15 Dàade, ńsu gbɛ̃maa ua kpákpao,

ńsu ǹ aà pↄ́ↄ waawà a bɛo.

16 Baa tó gbɛ̃maa lɛ̀lɛ gɛ̃n sopla, ì ɛa fɛlɛɛ,

vãikɛnaↄ sↄ̃, músi ì to aa fu.

17 Tó n ibɛɛ lɛ̀lɛ, ńsu pↄnakɛo,

tó à fù, ńsu tidↄaàlao.

18 Tó Dii è màa, a kɛɛ̀ nao,

aà pↄkũma a wee n ibɛɛpiwaɛ.

19 Ńsu to gbɛ̃vãiↄ yã́ n kũ gbãao,

ńsu lua vãikɛnaↄ gweaio.

20 Asa gbɛ̃vãi líↄ zia vĩo,

Lua a vãikɛnaↄ tɛdɛ.

21 Ma nɛ́, vĩakɛ Diiɛ ń kíao,*

ńsu gbɛ̃́kpa ń gbɛ̃́ pↄ́ bↄ̀ ń kpɛↄo.

22 Asa yã́ a ń le kã́ndoɛ.

Démɛ dↄ̃ lá wa ń ásookɛi?

Ɔ̃nↄnaↄ yã́n kɛ lↄ

23 Ɔ̃nↄnaↄ yã́n kɛ lↄ:

Gbɛ̃bↄbↄa'ↄsi yã́kpalɛ guu maao.

24 Gbɛ̃́ pↄ́ ì yãnakpa tàaedewa,

wa savãi'oɛ̀, buiↄ i ↄlɛlɛɛ̀.

25 Gbɛ̃́ pↄ́ ì yã́'ĩikpawà aↄ maa e,

Lua a báaadaaàgu maamaaɛ.

26 Gbɛ̃́ pↄ́ ì yãwe gbɛ̃́wa wásawasa

lɛ́ lɛ́pɛwàɛ.

27 Ɔlia n buai a zĩↄ láa,

ní gbasa kpɛdↄ sa.

28 Ńsu bↄbↄ ń n gbɛ̃́deeo pão,

ńsu to n lɛ́ gbɛ̃́ↄ sã́são.

29 Ńsu mɛ: Má kɛɛ̀ lá a kɛ̀mɛɛwaɛo,

ge má fĩaboɛ̀ a yãkɛawaɛo.

30 Ma pã màade bua,

ma dↄ ↄ̃nↄkɛ̃sãmade vɛ̃ɛbui,

31 ↄ̃ má è lɛ bↄ̀lɛ dàgua píi,

à sɛ̃kù, gĩ pↄ́ a bò ń gbɛo kwɛ̀.

32 Ma yã́pi gwà, ma làasookɛ̀wà,

ↄ̃ yã́ pↄ́ má èpi yãdàdamɛɛ.

33 Tó n mɛ̀: Má i'o yↄↄ, má kã́mabo yↄↄ,

má wúlɛ yↄↄ ↄkpaa ma kùɛ,

34 pↄtaasi a n zãmakɛ lán kpã́iwa,

pↄ́ nↄana i mↄma lán gↄ̃kɛbↄdewa.

<- Yáasiↄ 23 Yáasiↄ 25 ->

a 1Piɛ 2.17

ReflectTheSON aims to make the Bible available worldwide, especially in nations that declare the Bible illegal.
About How to access ReflectTheSON Languages Downloads