Naokɛa 34

Kanaa bùsu zↄ̃lɛↄ

1 Dii yã'ò Mↄiziɛ à mɛ̀: 2 O Isailiↄnɛ ǹ mɛ, tó a gɛ̃ Kanaa bùsuu mɛ́ álɛ kpaalɛkↄ̃ɛ, bùsupi zↄ̃lɛↄn kɛ: 3 Gɛↄmidↄkĩi oi, Zini guwaiwai pↄ pã̀ Ɛdↄũ bùsu lɛ́i mɛ́ á bùsu lɛ́ ũ. Sɛa za gukpɛ oi á bùsu lɛ́pi a daalɛ Ísida Wiside lɛ́waɛ, 4 i pã Sóigbɛbↄlɛi ↄzɛɛi, i ta Zini guwaiwaiwa, i pãi Kadɛsi Baanɛa ↄzɛɛi, i gɛ̃ ń Azaa'adaao, i gɛ́ Azemↄ. 5 Bↄa Azemↄ i pã Egipi zɛ́ swai e à gɛ pɛ ísiawa. 6 Ísia zↄ̃ↄ pↄ́ kú bɛ'aɛ oi mɛ́ á bùsu lɛ́ ũ. Á bùsu lɛ́n we bɛ'aɛ oi.

7 Lá á bùsu lɛ́ aↄ dɛ gugbãntoo oin kɛ: Bↄa za ísia zↄ̃ↄi, à a iada e Oo gbɛ saɛ. 8 Bↄa Oo gbɛ saɛ, à a iada e Amata bↄlɛi, í gɛò Zedada. 9 Bùsupi lɛ́ a gɛ̃ ń Ziflonaoɛ, i gɛ pɛ Azaa'enanawa. Lá á bùsu lɛ́ aↄ dɛ gugbãntoo oin we.

10 Gukpɛ oi à á bùsu lɛ́ iada bↄa Azaa'enana e Sefaũ. 11 Bↄa Sefaũ i gɛ̃ Libla, Aini gukpɛ oi, i gɛ pã Gɛnɛzalɛti Ísida gbɛpↄlɛi gukpɛ oi. 12 Bↄa we i pã Yuudɛ̃i, i gɛ pɛ Ísida Wisidewa. Lá á bùsu lɛ́ aↄ dɛn we.

13 Ɔ̃ Mↄizi yã́pi dìlɛ Isailiↄnɛ à mɛ̀: À bùsupi kpaalɛkↄ̃ɛ ń gbɛlaao.*Yoz 14.2 Dii dìlɛ á bui lɛɛ kɛ̃okwi ń kĩnioↄ pↄ́ ũɛ, 14 asa Lubɛni buiↄ ń Gada buiↄ ń Manase buiↄ lɛɛ doo ń baa è kↄ̀ ualɛ ń ualɛo. 15 Bui lɛɛ pla ń kĩniopiↄ ń baa è Yuudɛ̃ baa gukpɛ oi bↄaa ń Yelikoo.

16 Dii yã'ò Mↄiziɛ à mɛ̀: 17 Gbɛ̃́ pↄ́ aa bùsu kpaalɛɛ́ ń gbɛlaaoↄ tↄ́n kɛ: Sa'onkia Ɛleazaa ń Nuni nɛ́ Yozueeo. 18 Bee gbɛa í dↄaanaↄ sɛ bui ń buio guu mɛ̀ndodo aa dↄńlɛ bùsu kpaalɛapi guu. 19 Gbɛ̃́ pↄ́ á ń sɛ́piↄ tↄ́n kɛ:

Yuda buiↄ guu Yefũnɛ nɛ́ Kalɛbu.

20 Simɛↄ buiↄ guu Amihudu nɛ́ Semuɛli.

21 Bɛ̃yãmɛɛ buiↄ guu Kiseloni nɛ́ Ɛlidada.

22 Dã buiↄ guu Yↄgɛli nɛ́ Buki.

23 Yosɛfu nɛ́ Manase buiↄ guu Efodu nɛ́ Aniɛli.

24 Yosɛfu nɛ́ Ɛflaiũ buiↄ guu Sifitã nɛ́ Kɛmuɛ.

25 Zabulↄni buiↄ guu Paanaki nɛ́ Ɛlizafã.

26 Isakaa buiↄ guu Azã nɛ́ Palɛtiɛ.

27 Asɛɛ buiↄ guu Selomi nɛ́ Aihudu.

28 Nɛfatali buiↄ guu Amihudu nɛ́ Pedaɛ.

29 Gbɛ̃́ pↄ́ Dii ń dílɛ aa Kanaa bùsu kpaalɛ Isailiↄnɛↄn we.

<- Naokɛa 33 Naokɛa 35 ->