Naokɛa 33

Isailiↄ bòokpakpaa bↄa Egipi gbɛa

1 Gua pↄ́ Isailiↄ bòokpàkpau an bↄa Egipi gbɛaↄn kɛ: Aa táa'ò gãgã, Mↄizi ń Aalonao mɛ́ ń dↄaanaↄ ũ. 2 Mↄizi ń bòokpakĩiↄ tↄ́ kà láu lá Dii òɛwa. Ɔ̃n kɛ: 3 Mↄ sɛ̃́ia gↄↄ gɛ̃ode zĩ́ Gɛ̃amusu dikpɛkɛa gbɛa Isailiↄ bↄ̀ Lamɛsɛ ń mio daa ía Egipiↄ wáa píi, 4 gↄↄ pↄ́ aalɛ ń nɛgↄ̃ɛ sɛ̃́iaↄ vĩ, asa Dii yã́kpalɛkɛ̀ ń Egipi tã́aↄɛ, ↄ̃ à Egipi nɛ́piↄ dɛ̀dɛ.

5 Bↄa Lamɛsɛ Isailiↄ gɛ̀ bòokpà Suko. 6 Bↄa Suko aa gɛ̀ bòokpà Etani guwaiwai lɛ́wa. 7 Bↄa Etani aa ɛ̀a gɛ̀ Pi'ailo, Baalizɛfↄ̃ gukpɛ oi, ↄ̃ aa gɛ̀ bòokpà Midoli saɛ. 8 Bↄa Pi'ailo aa bùa ísiawa gugiiu, ↄ̃ aa sì guwaiwaiu. Kɛ́ aa táa'ò Etani guwaiwaipiu gↄↄ àaↄ̃, ↄ̃ aa bòokpà Mala. 9 Bↄa Mala aa gɛ̀ bòokpà Eliũ. Wekĩi nibↄnaↄ kuu mɛ̀n kuɛpla ń daminaliↄ mɛ̀n bàaↄ̃kwi. 10 Bↄa Eliũ aa gɛ̀ bòokpà Ísia Tɛ̃a saɛ. 11 Bↄa Ísia Tɛ̃a saɛ, aa gɛ̀ bòokpà Sini guwaiwaiu. 12 Bↄa Sini guwaiwaiu aa gɛ̀ bòokpà Dↄfɛka. 13 Bↄa Dↄfɛka aa gɛ̀ bòokpà Alusu. 14 Bↄa Alusu aa gɛ̀ bòokpà Lefidiũ. Wekĩi aa kùau íwa aa mi. 15 Bↄa Lefidiũ aa gɛ̀ bòokpà Sinai guwaiwaiu. 16 Bↄa Sinai guwaiwaiu aa gɛ̀ bòokpà Kibelo Ataava. 17 Bↄa Kibelo Ataava aa gɛ̀ bòokpà Azelo. 18 Bↄa Azelo aa gɛ̀ bòokpà Litema. 19 Bↄa Litema aa gɛ̀ bòokpà Limↄ Pɛlɛzi. 20 Bↄa Limↄ Pɛlɛzi aa gɛ̀ bòokpà Libena. 21 Bↄa Libena aa gɛ̀ bòokpà Lisa. 22 Bↄa Lisa aa gɛ̀ bòokpà Keelata. 23 Bↄa Keelata aa gɛ̀ bòokpà Sɛfɛɛ gbɛzĩ. 24 Bↄa Sɛfɛɛ gbɛ zĩ́ aa gɛ̀ bòokpà Alada. 25 Bↄa Alada aa gɛ̀ bòokpà Makelo. 26 Bↄa Makelo aa gɛ̀ bòokpà Taatu. 27 Bↄa Taatu aa gɛ̀ bòokpà Tɛla. 28 Bↄa Tɛla aa gɛ̀ bòokpà Miteka. 29 Bↄa Miteka aa gɛ̀ bòokpà Asemↄna. 30 Bↄa Asemↄna aa gɛ̀ bòokpà Mↄselo. 31 Bↄa Mↄselo aa gɛ̀ bòokpà Bɛnɛyaakã. 32 Bↄa Bɛnɛyaakã aa gɛ̀ bòokpà Oo Agigada. 33 Bↄa Oo Agigada aa gɛ̀ bòokpà Yↄbata. 34 Bↄa Yↄbata aa gɛ̀ bòokpà Ablona. 35 Bↄa Ablona aa gɛ̀ bòokpà Ɛziↄ̃gɛbɛɛ. 36 Bↄa Ɛziↄ̃gɛbɛɛ aa gɛ̀ bòokpà Kadɛsi, Zini guwaiwaiu. 37 Bↄa Kadɛsi aa gɛ̀ bòokpà Oo gbɛ saɛ Ɛdↄũ bùsu lɛ́wa. 38 Ɔ̃ sa'onkia Aalona dɛ̀dɛ Oo gbɛwa lá Dii òɛwa. We à gàu Isailiↄ bↄa Egipi wɛ̃̀ blade a mↄ sↄode gↄↄ sɛ̃́iazĩ. 39 Aà wɛ̃̀ basoolo ń àaↄ̃ode guu ↄ̃ à gà.*Nao 20.22-28 40 Alade pↄ́ kú Nɛgɛvɛ bùsuu kía pↄ́ dɛ Kanaa bui ũ mà Isailiↄ lɛ́ mↄ́.

41 Bↄa Oo gbɛ zĩ́ aa gɛ̀ bòokpà Zalamↄna. 42 Bↄa Zalamↄna aa gɛ̀ bòokpà Punↄ. 43 Bↄa Punↄ aa gɛ̀ bòokpà Obo. 44 Bↄa Obo aa gɛ̀ bòokpà Iye'abaliũ, Mↄabu bùsu lɛ́wa. 45 Bↄa Iye'abaliũ aa gɛ̀ bòokpà Dibↄ̃ Gada. 46 Bↄa Dibↄ̃ Gada aa gɛ̀ bòokpà Alemↄ Diblataiũ. 47 Bↄa Alemↄ Diblataiũ aa gɛ̀ bòokpà Abaliũ bùsu sĩ̀sĩdeu Nɛbo saɛ. 48 Bↄa Abaliũ bùsu sĩ̀sĩdeu aa gɛ̀ bòokpà Mↄabu bùsu sɛ̃u Yuudɛ̃ saɛ bↄaa ń Yelikoo. 49 Aa bòokpà sɛ̃piu za Bɛyɛsimↄ e Abɛli Sitiũ.

Dii Isailiↄ gbaa laai Yuudɛ̃ baa

50 Dii yã'ò Mↄiziɛ Mↄabu bùsu sɛ̃piu à mɛ̀: 51 O Isailiↄnɛ: Tó a bua Yuudɛ̃wa a gɛ̃ Kanaa bùsuu, 52 à bùsupideↄ yá, í ń tã́a pↄ́ aa ã̀ↄ ń tã́a pↄ́ aa kàsaↄ wíwi, í ń gbagbakĩiↄ dɛɛlɛ. 53 À bùsupi símá, í zↄ̃lɛu, asa má kpàwá á pↄ́ ũɛ. 54 À bùsupi kpaalɛkↄ̃ɛ ń gbɛlaao daɛdaɛ. À tↄↄlɛ zↄ̃ↄ kpá á bui pↄ́ aa dasiↄwa, í tↄↄlɛ nɛ́na kpá á bui pↄ́ aa dasioↄwa. Tↄↄlɛ pↄ́ gbɛ̃́ sɛ̀ iↄ dɛ ń pↄ́ ũ. À kpaalɛkↄ̃ɛ daɛdaɛ. 55 Tó i bùsupideↄ yao, gbɛ̃́ pↄ́ a ń tóↄ zu á wɛ́u lán kↄ̀ↄwaɛ, aai gↄ̃ lán lɛwa á saalou. Aa ĩadawá bùsu pↄ́ á zↄ̃lɛupiuɛ, 56 mí kɛɛ́ lá ma zɛò mà kɛnɛ́wa.

<- Naokɛa 32 Naokɛa 34 ->