NAOKƐA
Mↄizi lá síiↄ̃de
Yã́ pↄ́ kú láɛ bee guuↄ
Kɛ́ Isailiↄ ikoyã pↄ́ Lua kpà Mↄiziwa Sinai gbɛ musu yãmà, aa sↄukɛ̀ wà da bùsu pↄ́ Lua a lɛgbɛ̃̀nɛ́ zɛ́u (1.1-10.10). Aa táa'ò wà kà Kadɛsi Baanɛa, we aa gɛ̃u bùsupiu, ↄ̃ aalɛ vĩakɛ bùsupi gɛ̃aɛ, aa ɛ̀a mipɛ̀ gɛↄmidↄkĩiwa, ↄ̃ aa kɛ̀ gbáau wɛ̃̀ bla. Tá gbã̀a oa gbɛa aa Mↄabu bùsu lè Ísia Wiside gukpɛ oi (10.11-21.35). Lápi yã́ gbɛzãↄ yã́ pↄ́ kɛ̀ Mↄabu bùsuuↄ òwɛ̃ɛ. Bↄa we gbɛzã ↄ̃ Isailiↄ è gɛ̃̀ Kanaa bùsuu (22.1-36.13).
Lápi tɛ Bↄa láiɛ, mɛ́ à Lua gbɛ̃́ↄ gbɛ̃nazĩnkɛ ↄ̀lↄwɛ̃ɛ. Zĩeↄ aaì Lua náaikɛ, zĩeↄ aaì seakɛ, zĩeↄ yãeↄ ì ń kã́si, zĩeↄ yãeↄ ì ń kãdɛ, zĩeↄ aaì ńzĩa sɛ lɛsĩ, zĩeↄ aaì lɛ́lɛ zĩ́lɛ. Lápi ↄ̀lↄwɛ̃ɛ lↄ kɛ́ Lua ìↄ dɛ a gbɛ̃́ↄnɛ náaide ũ gↄↄpii, ìↄ yãkɛ a zɛ́wa, ãma zĩeↄ ìↄ pãsĩńnↄ.
Yã́ zĩ'ũ Mↄizi lè a dɛa kↄ́ↄ ũ Dii ń a gbɛ̃́ↄ zãnguo yã́ musu. Ɔ̃mɛ Lua lɛdↄɛkɛna ũ, ↄ̃ ìↄ sↄ̃ Luazi. Ɔ̃mɛ ì awakpa Luaɛ a gbɛ̃́ↄnɛ, asa náaisaideↄnɛ.

Isailiↄ naokɛa Sinai guwaiwaiu

1 Isailiↄ bↄa Egipi wɛ̃̀ plaade, a mↄ plaade gↄↄ sɛ̃́ia zĩ́, Dii yã'ò Mↄiziɛ kpaaũkpɛu Sinai guwaiwaiu à mɛ̀: 2 À Isailiↄ naokɛ daɛdaɛ ualɛ ń ualɛo, ní gↄ̃ɛↄ tↄ́ dalau píi. 3 Mpi ń Aalonao à Isaili gↄ̃ɛ pↄ́ kà wɛ̃̀ bao ge aa dɛaↄ kãaa, í gbɛ̃́ pↄ́ kà zĩkaapiↄ nao gã ń gão. 4 À gbɛ̃́ pↄ́ dɛ uabele ũↄ sɛ bui ń buio guu dodo aa dↄálɛ. 5 Gbɛ̃́ pↄ́ aaↄ kúánↄpiↄ tↄ́n kɛ:

Lubɛni buiↄ guu Sedeu nɛ́ Ɛlizuu.

6 Simɛↄ buiↄ guu Zulisadai nɛ́ Selumiɛ.

7 Yuda buiↄ guu Aminadabu nɛ́ Naasↄ̃.

8 Isakaa buiↄ guu Zuaa nɛ́ Nɛtanɛli.

9 Zabulↄni buiↄ guu Heloni nɛ́ Ɛliabu.

10 Yosɛfu nɛ́ Ɛflaiũ buiↄ guu Amihudu nɛ́ Ɛlisama.

Yosɛfu nɛ́ Manase buiↄ guu Pedazuu nɛ́ Gamaliɛli.

11 Bɛ̃yãmɛɛ buiↄ guu Gidoni nɛ́ Abidã.

12 Dã buiↄ guu Amisadai nɛ́ Ahiɛzɛɛ.

13 Asɛɛ buiↄ guu Ɔkɛlana nɛ́ Pagiɛli.

14 Gada buiↄ guu Deuɛli nɛ́ Ɛliasafa.

15 Nɛfatali buiↄ guu Enana nɛ́ Ahila.

16 Gbɛ̃́ pↄ́ wà ń sɛ́ gbɛ̃́ↄ guu ń deziↄ buiↄ kía ũↄn we. Aamɛ Isaili bui dↄaanaↄ ũ. 17 Mↄizi ń Aalonao gbɛ̃́ pↄ́ Dii ń tↄ́ dↄ̀dↄpiↄ sɛ̀, 18 ↄ̃ aa gbɛ̃́ↄ kã̀aa píi mↄ plaade gↄↄ sɛ̃́iazĩ. Aa gbɛ̃́ pↄ́ kà wɛ̃̀ bao ge aa dɛaↄ tↄ́ dàlau píi daɛdaɛ ualɛ ń ualɛo. 19 Mↄizi ń nao Sinai guwaiwaiu lá Dii dìlɛɛwa.

20 Wà gↄ̃ɛ pↄ́ kà wɛ̃̀ bao ge aa dɛaↄ nào, ↄ̃ wà gbɛ̃́ pↄ́ kà zĩkaapiↄ tↄ́ dàlau dodo baade iawa daɛdaɛ ualɛ ń ualɛo.

21 Isaili nɛgↄ̃ɛ sɛ̃́ia Lubɛni buiↄ guu, gbɛ̃́ pↄ́ kà zĩkaaↄ gbɛ̃ↄn ↄ̀aasↄsↄo lɛɛ bla ń sooloo ń ↄ̀aa pla ń basↄooɛ (46.500).

22-23 Simɛↄ buiↄ guu gbɛ̃ↄn ↄ̀aasↄsↄo lɛɛ bàaↄ̃ mɛ̀ndosai ń ↄ̀aa do ń basↄooɛ (59.300).

24-25 Gada buiↄ guu gbɛ̃ↄn ↄ̀aasↄsↄo lɛɛ blasↄo ń ↄ̀aa àaↄ̃ ń blakwioɛ (45.650).

26-27 Yuda buiↄ guu gbɛ̃ↄn ↄ̀aasↄsↄo lɛɛ bàaↄ̃kwi ń síiↄ̃o ń ↄ̀aa àaↄ̃oɛ (74.600).

28-29 Isakaa buiↄ guu gbɛ̃ↄn ↄ̀aasↄsↄo lɛɛ blakwi ń síiↄ̃o ń ↄ̀aa plaoɛ (54.400).

30-31 Zabulↄni buiↄ guu gbɛ̃ↄn ↄ̀aasↄsↄo lɛɛ blakwi ń soplao ń ↄ̀aa plaoɛ (57.400).

32-33 Yosɛfu nɛ́ Ɛflaiũ buiↄ guu gbɛ̃ↄn ↄ̀aasↄsↄo lɛɛ bla ń ↄ̀aa pla ń basↄooɛ (40.500).

34-35 Yosɛfu nɛ́ Manase buiↄ guu gbɛ̃ↄn ↄ̀aasↄsↄo lɛɛ baakwi ń plao ń ↄ̀aa dooɛ (32.200).

36-37 Bɛ̃yãmɛɛ buiↄ guu gbɛ̃ↄn ↄ̀aasↄsↄo lɛɛ baakwi ń sↄoo ń ↄ̀aa plaoɛ (35.400).

38-39 Dã buiↄ guu gbɛ̃ↄn ↄ̀aasↄsↄo lɛɛ bàaↄ̃ ń plao ń ↄ̀aa àaↄ̃ ń basↄooɛ (62.700).

40-41 Asɛɛ buiↄ guu gbɛ̃ↄn ↄ̀aasↄsↄo lɛɛ bla ń mɛ̀ndoo ń ↄ̀aa pla ń basↄooɛ (41.500).

42-43 Nɛfatali buiↄ guu gbɛ̃ↄn ↄ̀aasↄsↄo lɛɛ blakwi ń àaↄ̃o ń ↄ̀aa plaoɛ (53.400).

44 Gbɛ̃́ pↄ́ Mↄizi ń Aalonao ń Isailiↄ kía gbɛ̃ↄn kuɛplaↄ ń naoↄn we. Wà kíapiↄ sɛ̀ bui ń buio guu mɛ̀ndodoɛ. 45 Kɛ́ aa Isaili gↄ̃ɛ pↄ́ kà wɛ̃̀ bao ge aa dɛaↄ nào ualɛ ń ualɛo, Isaili pↄ́ kà zĩkaapiↄ 46 gbɛ̃ↄn ↄ̀aasↄsↄo lɛɛ ↄ̀aa àaↄ̃ ń àaↄ̃o ń ↄ̀aa pla ń basoplakwioɛ (603.550).

47 Wì Levii bui uadeↄ da nao guuo, 48 asa Dii ò Mↄiziɛ à mɛ̀: 49 Ńsu Levii buiↄ naoo. Ńsu ǹ ń tↄ́ dalau ń Isaili bui kĩniↄo. 50 Ikoyã zwã̀akpɛ zĩ na Levii buiↄnɛ ń ↄzĩ ń a pↄkeleↄ ń pↄ́ pↄ́ kú a guuↄ píi. Aamɛ aaliↄ zwã̀akpɛ sɛa ń a pↄkeleↄ píi, aaiↄ dɛ zwã̀akpɛpi zĩkɛnaↄ ũ, aali bòokpa aa liai. 51 Tó álɛ fɛlɛ, aamɛ aali zwã̀akpɛpi woɛwoɛ. Tó a ka bòokpakĩi, aali ɛa pɛ́ɛpɛɛ. Tó gbɛ̃pãle sↄ̃̀i, à gàɛ. 52 Isailiↄ lí bòokpakpa gã ń gão, baade ń a dàlapooo. 53 Levii buiↄ mɛ́ aali bòokpa aa lia ikoyã zwã̀akpɛi, kɛ́ másu pↄkũmabↄbↄ Isailiↄwao yã́i. Ikoyã zwã̀akpɛ gwaa mɛ́ Levii buiↄ zĩ ũ. 54 Ɔ̃ Isailiↄ kɛ̀ lá Dii ò Mↄiziɛwa.

Naokɛa 2 ->