Nɛɛmii 9

Isailiↄ ń duunaↄ oa Luaɛ

1 Mↄ doũpi gↄↄ baasↄo mɛ̀ndosaide zĩ́ Isailiↄ kↄ̃ kã̀aa ń lɛyeo ń zwã̀nkasaↄ dadaa, mɛ́ bùsu kákaa ń miu. 2 Aa ńzĩa kɛ̃̀ buipãleↄwa ↄ̃ aa sĩa, aalɛ ń duunaↄ ń ń deziↄ yãvãikɛaↄ o. 3 Aa gↄ̃̀ sĩa gu pↄ́ aa kuu, ↄ̃ wà Dii ń Lua ikoyã lá kyokɛ̀nɛ́ e mↄ̀ àaↄ̃, ↄ̃ aa ń duunaↄ ò aa kùlɛ Dii ń Luaɛ e mↄ̀ àaↄ̃. 4 Levii buieↄ zɛ gba pↄ́ wa dànɛ́ musu, aa lɛzù Dii ń Luazi gbã́ugbãu. An tↄ́ↄn kɛ: Yesua, Bani, Kamiɛli, Sebania, Buni, Selebia, Bani ń Kenanio. 5 Levii buiↄ Yesua ń Kamiɛlio ń Banio ń Asaniao ń Selebiao ń Odiao ń Sebaniao ń Petaiao mɛ̀: À fɛlɛ Dii á Lua táasilɛ! A ku za asĩnizĩ e gↄↄpii. To wà n tↄbↄ, asa n gawi dɛ lɛ́maama ń táasiola píi. 6 Ḿmɛ ń Dii ũ ndo. N bàluma kɛ̀ ń n bɛ pↄ́ kú musuo ń pↄ́ pↄ́ kú weↄ píi. N dṹnia kɛ̀ ń pↄ́ pↄ́ kuwàↄ, n ísia kɛ̀ ń pↄ́ pↄ́ kú a guuↄ. Ni wɛ̃ni kpa ḿpiiwa, n bɛ malaika dasiↄ ì kúlɛnɛ.

7 Ḿmɛ ń Dii Lua pↄ́ Ablaũ sɛ̀ ũ, n bↄaànↄ Ulu, Babiloni bùsuu,[a] n aà tↄ́ lìlɛɛ̀ Ablahaũ.[b] 8 Ń è a n náai vĩ a sↄ̃ guu, ↄ̃ n mɛ̀ n bàa aↄ kuaànↄ, ńyↄ̃ Kanaa bùsu kpawà ń aà buiↄ, bùsu pↄ́ Itiↄ ń Amↄleↄ kuu ń Pɛliziↄ ń Yebusiↄ ń Giigasiↄ.[c] Ɔ̃ n lɛ́ pↄ́ ń gbɛ̃̀ɛ̀pi kɛ̀, kɛ́ ń maa yã́i.

9 N taasi pↄ́ wá deziↄ kɛ̀ Egipi è,[d] n wii pↄ́ aa lɛ̀ Ísia Tɛ̃ai mà.[e] 10 N seelaↄ ń dabudabuↄ kɛ̀ Falaↄ̃ↄɛ,[f] ń kpàaàzi ń aà ìwaↄ ń aà bùsudeↄ píi, asa ń dↄ̃ lá aa ãiapãsĩkɛ̀ ń wá deziↄ. N tↄbↄ̀ lá a ku e ń a gbãowa. 11 N ísia zↄ̃̀ɛnɛ́, ↄ̃ aa táa'ò gugiiu aa bùa.[g] N gbɛ̃́ pↄ́ pɛ̀lɛńziↄ zù ísiu, n ń zú lán gbɛwa í zↄ̃ↄpi guu.[h] 12 N dↄaa n gbɛ̃́ↄnɛ tɛlu guu fãanɛ, gwãasĩna sↄ̃ tɛ́ guu.[i] N zɛ́ pↄ́ dɛ aa sɛ pùnɛ́.

13 N pila Sinai gbɛ̀sĩsĩ musu, n yã'ònɛ́ za musu.[j] N ikoyã zɛde sĩande kpàmá ń yãmaa pↄ́ ń dìlɛↄ. 14 Ń tò aa kã́mabogↄↄ dↄ̃̀ ń pↄ́ ũ.[k] N n yãdilɛaↄ ń n ↄtondↄkĩio ń n ikoyão dà n zↄ̀blena Mↄiziɛ, ↄ̃ a kpàmá. 15 Kɛ́ nↄana ń dɛ́, n blɛ gbàɛnɛ́ za musu.[l] Kɛ́ imi ń dɛ́, n ibↄ̀nɛ́ gbɛsiu.[m] Bùsu pↄ́ n a lɛgbɛ̃̀nɛ́ n mɛ̀ ńyↄ̃ kpámá ↄ̃ ń ònɛ́ aa gɛ sí ń pↄ́ ũ.

16 Ń beeo wá dezipiↄ kàamai vĩ, an swã́ gbãakũ̀, aaliↄ n yãdilɛaↄ kũao. 17 Aa gì n yãmai, dabudabu pↄ́ ń kɛ̀nɛ́ↄ yã́ sã̀ńgu. An swã́ gbãakũ̀, aa bↄ̀ n yã́ kpɛ, aa dↄaana dìlɛ aà ɛa táńnↄ zↄbleu.[n] Lua, ni gbɛ̃́ↄ duuna kɛ̃́má, ń sùuu vĩ ń sósobio, n pↄ lí pa kpaao, ń gbɛ̃kɛ vĩ zↄ̃ↄ, ↄ̃ ni pãkpańzio.[o] 18 Baa kɛ́ aa mↄkàsa lán gáaenawa, aa mɛ̀ ń dii pↄ́ ń bↄ́lɛ Egipin we,[p] mɛ́ aa dↄ̀ɛnnↄ maamaa, 19 ni pãkpańzi guwaiwaiuo n sósobi zↄ̃ↄ yã́i. Tɛlupi dↄ̀aa zɛ'ↄ̀lↄnɛ́ fãanɛ, tɛ́pi zɛ́ pↄ́ dɛ aa sɛ pùnɛ́ gwã́, i ń tó we ziio. 20 N n Nisĩna kpàmá à yãdànɛ́. Ni ń tɛ̃́ manao. Kɛ́ imi lɛ́ ń dɛ, n ń gbá í. 21 N ń gwá guwaiwaiu wɛ̃̀ bla, pↄe i kɛ̃́sãmáo. An pↄkasaↄ i yaao, an gbá i sɛ́sɛo.

22 N buiↄ kpàmá ń ń bùsuↄ, n ń bùsupiↄ kpaalɛ̀nɛ́ míↄ. Aa Ɛsɛbↄ̃ kí Siↄ̃ bùsu sì ń pↄ́ ũ ń Basana kí Ogu pↄ́o.[q] 23 Ń tò an bui dasikũ̀ lán saanaↄwa,[r] n gɛ̃ńnↄ bùsu pↄ́ ń ò ń maeↄnɛ aa gɛ sí ń pↄ́ ũ guu. 24 Kɛ́ an nɛ́ↄ gɛ̀ bùsupi sì ń pↄ́ ũ, ↄ̃ n Kanaa pↄ́ kú weↄ kãdɛ̀nɛ́, n ń nánɛ́ ń ↄzĩ ń ń kíaↄ píi, n bùsupi buiↄ kpàmá, aa ń pↄeã kɛ̀má.[s] 25 Aa wɛ̃́lɛ bĩ́ideↄ sì ń tↄↄlɛ maao, aa kpɛ́ↄ sì ń pↄmaa pↄ́ kúuↄ ń lↄ̀ↄ pↄ́ wa yↄ̃̀ↄ ń vɛ̃ɛbuↄ ń kù kpɛ́ↄ ń lí pↄ́ wì a bɛ bleↄ à kɛ̀ zài. Aa pↄblè aa kã̀ aa mɛ̀kpa, aa namablè n ɛ̀fãai zↄ̃ↄ yã́i.

26 Ń beeo an swã́ gbãakũ̀, ↄ̃ aa bↄ̀ n yã́ kpɛ, aa gì n ikoyãi. Aa ãnabi pↄ́ lɛdàmá aa sumaↄ dɛ̀dɛ, aa dↄ̀ɛnnↄ maamaa. 27 N ń ná ń ibɛɛↄnɛ ń ↄzĩ, aa gbãamↄ̀nɛ́, ↄ̃ aa wiilɛ̀nzi ń taasikɛa guu. Kua za musu ń sìńnↄ n sósobi zↄ̃ↄ yã́i, n suabanaↄ dìlɛnɛ́, ↄ̃ aa ń bↄ́ ń ibɛɛpiↄ ↄzĩ. 28 Tó aa niɛ è, aaì ɛa yã́ pↄ́ vãinɛ kɛɛ, ↄ̃ n ń kpá ń ibɛɛↄwa aa gbãablèmá. Aa ɛ̀a wiilɛ̀nzi, ↄ̃ kua za musu ń sìńnↄ, n ń bↄ́ gɛ̃n ũma'ũma n sósobi yã́i.[t]

29 N lɛdàmá aa zɛ ń n ikoyão, kási aa zazakũ̀ma, aaliↄ n yãdilɛaↄ kũao, n yã́ pↄ́ tó gbɛ̃́ kũa, aↄ ku a sabaiɛ.[u] Aa zã̀ n yã́piↄwa aa mikpɛlìnɛ, an swã́ gbãakũ̀ aa gì n yãmai. 30 N mɛnakɛ̀ńnↄ a wɛ̃ dasi, n Nisĩna yãdà ń ãnabiↄnɛ, ↄ̃ aa lɛdàomá, aai swãdↄio, ↄ̃ n ń ná buipãleↄnɛ ń ↄzĩ.[v] 31 N sósobi zↄ̃ↄ guu ni ń midɛo, Lua sùuude sósobiden n ũ, ni pãkpańzio.

32 Ayãmɛto wá Lua, Lua zↄ̃ↄ gbãade pↄ́ ni tó ń mɛ séenata, lá n bàa ìↄ kúwanↄ gbɛ̃kɛ guu, taasi pↄ́ wá lé ń wá kíaↄ ń wá dↄaanaↄ ń wá sa'onaↄ ń wá ãnabiↄ ń wá deziↄ ń n gbɛ̃́ↄ píi za Asili kíaↄ gↄↄ e ń a gbão, ńsu to à kɛnɛ fɛ̃́nɛũo. 33 Yã́ pↄ́ wá léↄ píi musu ń maa, baa kɛ́ wa yãvãikɛ̀, ń náai vĩ. 34 Wá kíaↄ ń wá dↄaanaↄ ń wá sa'onaↄ ń wá deziↄ aai zĩkɛ ń ikoyãwao, aai laaidↄ ń yãdilɛaↄwao ge lɛ́ pↄ́ ń dàmáↄ. 35 Baa gↄↄ pↄ́ aa ńzĩa vĩ, mɛ́ aa pↄmaa dasi pↄ́ n ń gbáↄ vĩ ń bùsu yàasa táaede pↄ́ ń kpàmáo, aai zↄblenɛo, aai mikɛ̃ ń yãvãiↄwao.

36 Gwa! Zↄↄn wá ũ gbã. Bùsu pↄ́ ń kpà wá deziↄwa aa a libɛↄ ń a pↄmaaↄ ble, zↄↄn wá ũ a guu. 37 Wá bugbɛ yàasaↄ gↄ̃̀ kí pↄ́ ń tò aa gbãablèwáↄ pↄ́ ũ wá duuna yã́i. Aaì kiblewá ń wá pↄtuoↄ lá aa yeiwa. Wá kú wɛ́tɛ̃a zↄ̃ↄ guu.

<- Nɛɛmii 8 Nɛɛmii 10 ->