1 Kɛ́ Sambala ń Tobiao ń Laalubuↄ ń Amↄniↄ ń Asedodadeↄ mà Yelusalɛũ bĩ́ikɛkɛa lɛ́ gɛ́ aɛ mɛ́ gufooↄ lɛ́ tata, an pↄ pà maamaa. 2 Ɔ̃ aa lɛkpàaĩ ḿpii, aa mɛ̀ wa mↄ lɛ́lɛ Yelusalɛũwa, wi yãkele liańzi. 3 Ɔ̃ wa wabikɛ̀ wá Luawa, mɛ́ wa gudↄ̃anaↄ dìlɛdilɛ fãanɛ ń gwãasĩnao an yã́i. 4 Ɔ̃ wá Yudaeↄ mɛ̀: Asosɛnaↄ yɛ̃̀ɛɛ lɛ́ láa. Gbɛ pↄ́ wa gbòo wa dàaĩ zↄ̃ↄ, wá fↄ̃ bĩ́ipi bo wà a midɛo. 5 Wá ibɛɛↄ mɛ̀, e wàↄ gɛ́ ń yã́ dↄ̃i, wa siwágu, wi wá dɛdɛɛ, zĩpi i gↄ̃ kpaa zɛ́u. 6 Wá gbɛ̃́ pↄ́ kú ń saɛↄ mↄ òwɛ̃ɛ à kà gɛ̃n kwi aa mɛ̀: Aalɛ bↄ gupiiu, aa ye mↄ lɛ́lɛiwáɛ. 7 Ɔ̃ ma gbɛ̃́ↄ dìlɛdilɛ bĩ́ifooↄ guu ń a gu pↄ́ ɛɛũↄ. Ma ń dílɛdilɛ daɛdaɛ, baade ń a fɛ̃ndao ń a sↄ̃nao ń a sáo. 8 Kɛ́ ma wɛtɛ̀ guↄi, ma fɛlɛ ò kíabuiↄnɛ ń gbãadeↄ ń gbɛ̃́ kĩniↄ ma mɛ̀: Ásu vĩakɛnɛ́o. Àↄ dↄ̃ kɛ́ Dii zↄ̃ↄ, ì tó ń mɛ séenata. À zĩka á gbɛ̃́ↄnɛ ń á nɛgↄ̃ɛↄ ń á nɛnↄɛↄ ń á naↄ ń á bɛↄ. 9 Kɛ́ wá ibɛɛↄ mà Lua ń fú, a tò wa ń lɛkpaaĩ feena mà, ↄ̃ wápii wa ɛa na bĩ́iboawa, baade ń a zĩo.

10 Za gↄↄ bee ma gbɛ̃́ↄ kpaalɛ̀ lɛɛ pla. Gbɛ̃eↄ lɛ́ zĩkɛ mɛ́ gbɛ̃eↄ sↄ̃na kũa ń sɛ̀ngbaoo ń sáo ń mↄ̀ ulao daa. Kíaↄ sĩ gbɛ̃́ pↄ́ lɛ́ bĩ́iboↄ kpɛ. 11 Gbɛ̃́ pↄ́ aso sɛaↄ aso kũa ↄ do, gↄ̃kɛbↄ ↄ do. 12 Bĩ́ibonaↄ fɛ̃nda dↄa ń pi ḿpii. Kuupɛna ìↄ ku ma saɛ. 13 Ɔ̃ má ò kíabuiↄnɛ ń gbãadeↄ ń gbɛ̃́ kĩniↄ: Zĩ dasi mɛ́ bĩ́ipi gbã̀a, ↄ̃ wa kↄ̃kpaalɛ̀kpaalɛ a lɛ́u. 14 Gu pↄ́ á mà wàlɛ kuupɛu, à kãaawázi we, wá Lua i zĩkawɛ̃ɛ. 15 Ɔ̃ wa ɛa na zĩwa, gbɛ̃eↄ sↄ̃na kũa za guluuluui e saanaↄ gɛ̀ bìlɛò. 16 Zĩbeezĩ má ò gbɛ̃́ↄnɛ: Á baade lí i Yelusalɛũ la ń a ìwaↄ, kɛ́ aàli e gudↄ̃a gwã́, aàli zĩkɛ fãanɛ. 17 Mapi ń ma dãunaↄ ń ma ìwaↄ ń gudↄ̃ana pↄ́ kumanↄↄ, wili wá pↄkasa bↄo, baade ìↄ a gↄ̃kɛbↄ kũa a ↄplaauɛ.