Nɛɛmii 2

Kí Aatasasa Nɛɛmii zĩa Yelusalɛũ

1 Aatasasa kpalablea wɛ̃̀ baode mↄ pↄ́ wì mɛ Nisã guu kí ye vɛ̃ɛmi, ↄ̃ má sɛ̀ má kpàwà. A ma dↄ̃ ń oosisio yãao, 2 ↄ̃ à ma la à mɛ̀: Bↄ́yãi n oosìsii? Ńlɛ gyãkɛo. N pↄ mɛ́ yàa? Vĩa ma kũ maamaa, 3 ↄ̃ má òɛ̀: Lua n dↄ̃ ń aafiao, Záai! Ma oosìsi, asa wɛ̃́lɛ pↄ́ ma deziↄ mia kuu gↄ̃̀ bɛzia ũɛ. A bĩ́ibↄlɛ gbaↄ tɛ́kũa.[a] 4 Ɔ̃ a òmɛɛ: Ń ye mà kɛ kpelewa ni? Ma wabikɛ̀ Lua Musudewa gĩa, 5 ↄ̃ má wèwà ma mɛ̀: Kí, tó à kɛ̀nɛ maa, mɛ́ mapi n zↄ̀blena ma yã́ kànguɛ, ma zĩ Yuda bùsu wɛ̃́lɛ pↄ́ ma deziↄ mia kuupi, kɛ́ mà e kɛkɛ kálɛ. 6 Kípi na zↄ̃lɛa aà saɛ, ↄ̃ à ma la à mɛ̀: Ńyↄ̃ kɛ we gↄↄ ũma ni? Gↄↄ kpele ńyↄ̃ sui? Kɛ́ kí wè ma gɛai, ↄ̃ ma gↄↄdìlɛɛ̀. 7 Má òɛ̀: Tó à kànguɛ, lákɛ̃ Uflata baale dↄaanaↄnɛ ǹ kpaa. Onɛ́ aa to mà pã́ ń bùsua e mà gɛ kaò Yuda bùsuu. 8 Lákɛ̃ n líkpɛ dↄ̃̀ana Asafaɛ lↄ. Oɛ̀ aà ma gba lí mà zɛgikĩi pↄ́ kú Lua kpɛ́ saɛ gbaↄ kɛò ń bĩ́ibↄlɛ gbaↄ ń kpɛ́ pↄ́ máↄ kuu pↄ́o. Ɔ̃ kí lá pↄ́ má gbɛ̀awaↄ kpàa, asa ma Lua ↄ kuamalaɛ. 9 Kí sosa badeↄ ń sↄ̃deↄ dàmɛɛ aa gɛmanↄ. Ɔ̃ ma gɛ Uflata baale dↄaanaↄ lè, ma kí láↄ kpàmá. 10 Kɛ́ Oloni gbɛ̃́ Sambala ń a ìwa Tobia, Amↄni buio mà gbɛ̃e mↄ̀ Isailiↄ gwea kã́fĩi, à kɛ̀nɛ́ ĩ́i maamaaɛ.

11 Kɛ́ ma ka Yelusalɛũ, ma kã́mabò gĩa gↄↄ àaↄ̃. 12 Ɔ̃ ma fɛlɛ gwãasĩna ń gbɛ̃eↄ, mi yã́ pↄ́ ma Lua dà ma sↄ̃u mà kɛ Yelusalɛũ o gbɛ̃eɛo. Ma di zàa'ĩna kpɛ, gbɛ̃́ kĩniↄ bɛ kɛ̀sɛ. 13 Ma bↄ Guzulɛ Bↄlɛu gwã́, ma mipɛ̀ Gbɛ̃gbon lↄ̀ↄwa ń Tufua Bↄlɛo. Málɛ Yelusalɛũ bĩ́i pↄ́ daaĩa gwagwa ń a bↄlɛ gbà tɛ́kũaↄ. 14 Ɔ̃ ma gɛ aɛ e Nibↄna Bↄlɛ ń kí íkalɛkĩio. Gue ku we, ma zàa'ĩna i fↄ̃ gɛ̃̀uo, 15 ↄ̃ má bɛ swa'ɛu gwã́, málɛ bĩ́i gwagwa. Ɔ̃ ma ɛa su, ma gɛ̃ Guzulɛ Bↄlɛu. 16 Gbãadeↄ gu pↄ́ ma gɛu ge yã́ pↄ́ má kɛ̀ dↄ̃o, asa mi yãe o Yudaↄnɛ gĩao, baa sa'onaↄ ge kíabuiↄ ge gbãadeↄ ge gbɛ̃́ kĩni pↄ́ aa zĩpi kɛↄ. 17 Ɔ̃ má ònɛ́: A taasi pↄ́ wá lé èó? Yelusalɛũ gↄ̃̀ bɛzia ũ, a bĩ́ibↄlɛↄ tɛ́kũa. À to wà ɛa bĩ́iboi lↄ, kɛ́ wásu wàↄ dɛ láanipↄ ũ lↄo yã́i. 18 Má ònɛ́ lↄ lá ma Lua ↄkùmala ń yã́ pↄ́ kí òmɛɛo. Ɔ̃ aa mɛ̀: Wà fɛlɛ na a boawa. Ɔ̃ aa nà zĩ maapiwa ↄplapla.

19 Kɛ́ Oloni gbɛ̃́ Sambala ń a ìwa Tobia, Amↄni buio ń Laalubu bui Gɛsɛũo a baomà, aa wá àlafiikɛ̀, aa sakàwágu aa mɛ̀: Bↄ́ álɛ kɛ wei? Álɛ bↄ kí yã́ kpɛ yↄ̃oo? 20 Ɔ̃ ma a zãsìmá ma mɛ̀: Lua Musude a wá daɛ ń gòmio. Wápiↄ aà zↄ̀blenaↄ, Yelusalɛũ bĩ́iboa wálɛ nawà kɛ. Ápiↄ sↄ̃ á baa ku lao. Á yã́ kú la lↄo, á tↄ́ àↄ dↄ gbɛ̃egu wɛ̃́lɛpi guu la lↄo.

<- Nɛɛmii 1 Nɛɛmii 3 ->