Mise 7

7

Isailiↄ fɛlɛa

1 Waiyoo mapi!

Má dɛ lán gbɛ̃́ pↄ́ lɛ́ libɛ

ge vɛ̃ɛbɛ kↄ̃nwɛwaɛ.

Vɛ̃ɛ kↄ́ ge kaadↄɛn sɛ̃́ia pↄ́ mi a nidɛ ku lↄo.

2 Luayãmanaↄ làa dṹniau,

gbɛ̃maaↄ ku gbɛ̃nazĩnaↄ guu lↄo.

Ampii aaì gbɛ̃́ dã́dã aa dɛ,

baade lɛ́ a gbɛ̃́dee wɛ ń táaluo.

3 Aa vãikɛa gↄ̃i vĩ ↄplaa ń zɛɛo.

Kía ì pↄ́ gbɛa,

yã́kpalɛkɛna ì gbagusaɛsi,

gbãade ì azĩa pↄeã dilɛnɛ́,

ampii aaì gbɛ̃́ wɛtãò.

4 An gbɛ̃maaↄ dɛ lán lɛaawa,

an dendaeↄ pãsĩ dɛ lɛsikaoa.

An ĩadamagↄↄ pↄ́ ń gudↄ̃anaↄ a yã'ò kà,

an bã̀abãabogↄↄ pìla se.

5 Ńsu ǹ n gbɛ̃́dee náaikɛo,

ńsu ǹyↄ̃ daa n kwàasi gã̀uwao.

Laaika yã́ pↄ́ ńyↄ̃ o nↄɛ pↄ́ kpá ń kùɛɛzi.

6 Nɛgↄ̃ɛ a a mae kpɛbↄ,

nɛnↄɛ a fɛlɛ ń a dao,

nↄzãe a bↄ a zãda kpɛ,

gbɛ̃́ bɛdeↄ gↄ̃ aà ibɛɛↄ ũ.*

7 Mapi sↄ̃ ma wɛ́ aↄ dↄ Diizi,

má Lua ma Suabanapi dã́.

Ma Lua a ma yãma.

8 Wá ibɛɛↄ su pↄnakɛ wá yã́ musuo.

Baa kɛ́ wa lɛlɛ, wá fɛlɛɛ.

Baa tó wá kálɛa gusiau,

Dii a gupuwɛ̃ɛ.

9 Lá wa duunakɛ̀ Diiɛ,

àlɛ a pↄkũma bↄbↄwá

e àↄ gɛ́ yã́siiwanↄ,

i to yã́ bↄwanↄ na.

A wá da gupuau,

a wá suaba, wí wɛ́siɛ.

10 Tó wá ibɛɛↄ è, wí a ń kṹ.

Wá ibɛɛpiↄ òwɛ̃ɛ yãa

aa mɛ̀ Dii wá Lua ku máɛ?

Wa ↄ̃zↄ̃má lán pɛ̀lɛawa gãaɛ,

wí wɛ́siɛ.

11 Siↄna bĩ́ibogↄↄ a ká,

gↄↄ bee a kálɛa a yàasa kṹ.

12 Gↄↄ bee gbɛ̃́ↄ bↄ Asili ń Egipi wɛ̃́lɛↄ guu,

aa bↄ za Egipi ń Uflatao,

za ísia baale ń baalao,

za gbɛ̀sĩsĩ kpɛle ń kpɛlao,

aai mↄ we.

13 Dṹnia a gↄ̃ yàaa

gbɛ̃́ pↄ́ kú a guuↄ yãkɛaↄ gbɛ ũ.

14 Dii, ǹ ń gbɛ̃́ↄ dã́dãkɛ ń n gopanao,

n kpàsa sãpiↄ aaiↄ kú ńtɛ̃ɛ Kaamɛli líkpɛu,

aai pↄble Basana ń Galadao dã́dãkɛkĩi maau lán yãawa.

15 Ńyↄ̃ yãbↄnsaɛↄ kɛnɛ́,

lá ń kɛ̀ gↄↄ pↄ́ n bↄńnↄ Egipiwa.

16 Buipãleↄ e,

wí i ń kṹ ń nɛgↄ̃nkɛyã musu.

Aa ↄku ń lɛ́wa,

an swã́ iↄ kɛ weũu.

17 Aa bùsu ble lán mlɛ̃wa,

lán pↄ́taa'onkuawaↄwa.

Aa bↄ ń ulɛkĩiↄ guu,

aa mↄ Dii wá Luawa ń lualuao.

N vĩa a ń kṹ, sↄ̃ i kɛ̃́ńgu.

18 Lua, démɛ muaannↄi?

Ni n gbɛ̃́ kↄ̃naↄ duuna kɛ̃́má,

ni sùuukɛńnↄ ń ń tàaeↄ.

N pↄ líↄ paa gↄↄpiio,

gbɛ̃kɛkɛanɛ́ mɛ́ ì kangu.

19 Ńyↄ̃ ɛa wá wɛ̃nagwa lↄ,

ní ↄ̃zↄ̃ wá yãvãiↄwa,

ní wá duuna zu ísia í títiu píi.

20 Ńyↄ̃ náaiyã kɛ Yakↄbu buiↄnɛ,

ńyↄ̃ gbɛ̃kɛkɛ Ablahaũ buiↄnɛ,

lá ń a lɛgbɛ̃̀ wá dezipiↄnɛ za káauwa.

a Mat 10.35-36, Luk 12.53

ReflectTheSON aims to make the Bible available worldwide, especially in nations that declare the Bible illegal.
About How to access ReflectTheSON Languages Downloads