MATIEE
Yã́ pↄ́ kú láɛ bee guuↄ
Matiee baona pↄ a kɛ̃̀ ku zɛ́zɛ lán Maaku pↄ́waɛ:
Zãa da'ilɛna waasokɛa (3.1-12)
Yesu da'ilɛkɛa ń aà yↄ̃ao (3.13-4.11)
Yesu zĩkɛa Galile, gu pↄ́ à waasokɛ̀u bílaɛ à yãdanɛ́, à gyãeↄ gbã̀gbã (4.12-18.35)
Aà gɛa Yelusalɛ́ũ (19-20)
I gɛ̃gɛ̃o, ãsↄ̃a do taa, ↄ̃ wà Yesu kũ̀ wà yãdàaàla wà aà dɛ̀. Aà bↄa gau yã́ bↄ̀ ń saɛ, ↄ̃ à bↄ̀ mↄ̀ gbɛ̃́ↄwa (21-28).
Matiee Yesu buibↄkĩi yã́ bↄↄlɛkɛ̀ ń aà iao ń aà nɛgↄↄ yã́o (1-2). Yã́ beeↄ guu à gbɛ̃́ pↄ́ Yesu dɛ a ũ ò: Kíaɛ mɛ́ Suabanaɛ lá Lua a lɛgbɛ̃̀nɛ́wa, wì mɛ lↄ Emanuɛli. Bee mɛ̀ Lua kúwanↄ. Ɔ̃mɛ yã́ pↄ́ Lua ò a bàakuańnↄ káau lá guu pàpa.
Matiee Yesu yãdanɛↄ kã̀aa lɛɛ sↄo:
Yãdaanɛ́ sĩ̀sĩ musu lɛ́ kpala pↄ́ bↄ̀ Lua kĩ́i gbɛ̃́ↄ luanaaikɛa ↄlↄwɛ̃ɛɛ (5-7).
Lɛdilɛa gbɛ̃́ pↄ́ aa kpalapi baokpanɛ́ↄnɛ (10).
Kpalapi asiiyã lɛɛũanɛ́. Kpalapi ulɛa gĩa, ãma a bↄ gupuau ń gawio zĩewa (13).
Kua ń kↄ̃o kpalapi guu (18).
Wɛdↄa kpalapi mↄai (24-25).
Baona pↄ́ Matiee kɛ̃̀ guu, Yesu mɛ́ kpala pↄ́ bↄ̀ Lua kĩ́i Kía ũ, mɛ́ àlɛ yãdada gbɛ̃́ pↄ́ aalɛ gɛ̃ↄnɛ, kɛ́ aa e wàↄ dɛ a seeladeↄ ũ gbɛ̃́ↄnɛ.

Bui pↄ́ Yesu bↄ̀ ń guu

(Luk 3.23-38)

1 Davidi ń Ablahaũo bui Yesu Kilisi yã́ pↄ́ kɛ̃a Luayãtaalaun kɛ: 2 Ablahaũ Izaaki ì, Izaaki Yakↄbu ì, Yakↄbu Yuda ì ń a vĩ̀iↄ ń a dãunaↄ. 3 Yuda Pɛlɛzi ń Zelao ì ń a na Tamaao, Pɛlɛzi Ɛzↄ̃nↄ ì, Ɛzↄ̃nↄ Alaũ ì. 4 Alaũ Aminadabu ì, Aminadabu Naasↄ̃ ì, Naasↄ̃ Salamↄ ì, 5 Salamↄ Bↄazu ì ń a na Lahabuo. Bↄazu Ɔbɛdi ì ń a na Lutuo, Ɔbɛdi Yɛse ì, 6 ↄ̃ Yɛse kí Davidi ì.

Davidipi mɛ́ Salomↄↄ ì ń Uli nao, 7 Salomↄↄ Lↄbↄaũ ì, Lↄbↄaũ Abia ì, Abia Asa ì, 8 Asa Yosafa ì, Yosafa Yeholaũ ì, Yeholaũ Ozia ì. 9 Ozia Yoataũ ì, Yoataũ Akazi ì, Akazi Ezekia ì, 10 Ezekia Manase ì, Manase Amↄ ì, Amↄ Yosia ì, 11 Yosia Yɛkↄnia ì ń a dãunaↄ gↄↄ pↄ́ wà gbɛ̃́ↄ kũ̀kũ tàńnↄ Babiloni.*

12 Taa ń gbɛ̃́ↄ Babiloni gbɛa ↄ̃ Yɛkↄniapi Salatiɛli ì, Salatiɛli Zolobabɛli ì, 13 Zolobabɛli Abiudu ì, Abiudu Ɛliakiũ ì, Ɛliakiũ Azↄↄ ì. 14 Azↄↄ Zadoki ì, Zadoki Akiũ ì, Akiũ Ɛliudu ì, 15 Ɛliudu Ɛleazaa ì, Ɛleazaa Matana ì, Matana Yakↄbu ì, 16 ↄ̃ Yakↄbu Maliama zã́ Yosɛfu ì. Maliamapi mɛ́ Yesu pↄ́ wì mɛ Mɛsii ì.

17 Za Ablahaũ lɛ́u e à gɛ̀ pɛ̀ Davidiwa, mae ń a nɛ́o ku gɛ̃o mɛ̀ndosaiɛ. Za Davidi lɛ́u e gↄↄ pↄ́ wà tà ń gbɛ̃́ↄ Babiloni, mae ń a nɛ́o ku gɛ̃o mɛ̀ndosaiɛ. Za taa ń gbɛ̃́ↄ Babiloni e à gɛ̀ pɛ̀ Mɛsiiwa, mae ń a nɛ́o ku gɛ̃o mɛ̀ndosaiɛ.

Yesu Kilisi ia

(Luk 2.1-7)

18 Lá wà Yesu Kilisi ìn kɛ: Aà da Maliamaá Yosɛfu nↄkpamaɛ. E àↄ gɛ́ zãkɛi à nↄsì ń Lua Nisĩna gbãao. 19 Aà gↄ̃kpama Yosɛfupiá gbɛ̃maaɛ, a ye widawào, ↄ̃ à zɛ̀ò á bↄ aà yã́u asii guuɛ. 20 Gↄↄ pↄ́ àlɛ làasookɛ yã́piwa, Dii malaikae bↄ̀ mↄ̀wà nana guu a òɛ̀: Davidi bui Yosɛfu, ńsu bílikɛ n nↄkpama Maliama sɛa yã́ musuo, asa nↄ pↄ́ a sia bↄ̀ Lua Nisĩna kĩ́iɛ. 21 A nɛ'i gↄ̃ɛ ũ, ní tↄ́kpaɛ̀ Yesu, asa a a gbɛ̃́ↄ bↄ ń duuna guu. 22 Bee kɛ̀ píi, kɛ́ yã́ pↄ́ Dii dà ãnabiɛ a ò e kɛ à mɛ̀:

23 Nↄɛ lɛ́so mɛ́ a nↄsi,

i nɛ'i gↄ̃ɛ ũ,

wi tↄ́kpaɛ̀ Ɛmanuɛli.†

Tↄ́ bee mɛ̀ Lua kúwanↄ.

24 Kɛ́ Yosɛfu vù, a kɛ̀ lá Dii malaikapi dìlɛɛwa, à a nↄpi sɛ̀. 25 Ãma i aà dↄ̃ nↄɛ ũo e à gɛ̀ nɛgↄ̃ɛpi ìò. Ɔ̃ à tↄkpàɛ̀ Yesu.

Matiee 2 ->