1 Dii ò Mↄiziɛ 2 aà o Isailiↄnɛ píi aà mɛ: Á kua líↄ adoa, asa ma Dii á Lua ma kua adoaɛ.[a]

3 Á baade lí misiilɛ a da ń a deoɛ.[b] Àli kã́mabogↄↄ pↄ́ má dìlɛ yãda.[c] Mámɛmaa Dii á Lua. 4 Ásu ɛa su tã́aↄwao. Ásuli mↄkasa á dii ũo.[d] Mámɛmaa Dii á Lua.

5 Tó álɛ sáaukpa sa'oa, àli o a zɛ́wa, mí sí. 6 Àli sa'onↄↄ so a ogↄↄ ge a gu sìa dↄa, í a pↄ́ pↄ́ gↄ̃̀ a gↄↄ àaↄ̃de zĩ́ kátɛu à tɛ́kũ. 7 Tó gbɛ̃e su sò a gↄↄ àaↄ̃de zĩ́ sↄ̃, pↄ́pi gbãlɛ̀n we, má sí lↄo. 8 Gbɛ̃́ pↄ́ sò, a yã́ ali wí ade musuɛ, asa a tò ma pↄ́ gbãlɛ̀ɛ. Wàli ade bↄ a gbɛ̃́ↄ guu.

9 Tó a á pↄ́ↄ kɛ̀kɛ á bùsuu, ásuli kɛkɛ e á bú lɛ́wao, mɛ́ ásuli a kↄ̃nwɛo. 10 Ásuli á vɛ̃ɛ kɛkɛ gɛ̃n plao, mɛ́ ásuli a bɛ pↄ́ kwɛ̀ zĩ́lɛ sɛ́lɛo. Àli tó taasideↄnɛ ń bↄ̀mↄↄ. Mámɛmaa Dii á Lua.[e]

11 Ásuli kpã́i'oo.[f] Ásuli ɛɛtoo. Ásuli mↄafilikɛ á gbɛ̃́deeɛo. 12 Mámɛmaa Dii á Lua. Ásuli ɛɛto à mɛ á simanↄ à ma tↄ́ ↄ̃̀ↄkpao.[g] 13 Ásuli á gbɛ̃́dee ble ge à aà pↄ́ síwào. Ásuliↄ á zĩkɛna asea kũa e gu dↄo.[h] 14 Ásuli swãdona kao. Ásuli pↄ́ dilɛ vĩaɛ zɛ́u aà kpaao.[i] Àliↄ ma vĩa vĩ. Mámɛmaa Dii. 15 Ásuli yã́gↄ̃gↄ̃ koleao.[j] Ásuli zɛ ń wɛ̃nadeo a wɛ̃nadekɛ yã́io, ge tↄde a tↄdekɛ yã́io. Àli yã́gↄ̃gↄ̃ gbɛ̃́ↄnɛ a zɛ́wa. 16 Ásuliↄ bɛ ń gbɛ̃peo á gbɛ̃́ↄ guuo. Ásuli á gbɛ̃́dee ga wɛɛlɛ à yãdↄwào. Mámɛmaa Dii.

17 Ásuliↄ za á Isaili deeguo. Àli á gbɛ̃́dee gba laai,[k] kɛ́ aà duuna su wí á musuo yã́i. 18 Ásuli tↄsi á Isaili deewao, ásuliↄ yã́kũaaànↄo. Àliↄ ye á gbɛ̃́deezi lá ázĩa wɛ̃niwa.[l] Mámɛmaa Dii.

19 Àliↄ ma ikoyãↄ kũa. Ásuli pↄtuo bui dodoa kpakↄ̃a aa kpáwa'okↄ̃wao. Ásuli pↄbui dodoa tↄ̃ bú doũ guuo. Ásuli pↄkasa pↄ́ wà a pↄ́lɛ tã̀ ń bà bui dodoao dao.[m]

20 Tó gↄ̃ɛ wùlɛ ń zↄ̀ wɛ̃́ndiana pↄ́ dɛ gbɛ̃pãle nↄkpama ũo, mɛ́ i aà bo à gↄ̃̀ wɛ̃́ɛ ũ gĩao, wàli ń swã́gaga. Wasuli ń dɛdɛo, kɛ́ nↄɛpi i gↄ̃ wɛ̃́ɛ ũ yãao yã́i. 21 Gↄ̃ɛpi lí mↄmɛɛ kpaaũkpɛ kpɛɛlɛ ń sãsakaoo a tàae fĩabobↄ ũ. 22 Sa'ona lí duuna pↄ́ a kɛ̀ kɛ̃wà ma aɛ, mí sùuukɛaànↄ.

23 Tó a gɛ̃ á bùsuu, mɛ́ a li bɛdee bà, àli a bɛ dilɛ tɛ̃ ũ gĩa. Lípi bɛ líↄ dɛɛ́ tɛ̃ ũ e wɛ̃̀ àaↄ̃, ásuli bleo. 24 A wɛ̃̀ síiↄ̃de a bɛ líↄ dɛ ma pↄ́ ũ píi, í ma sáaukpaò. 25 A wɛ̃̀ sↄode íli a bɛ ble sa. Beewa lípi nɛ'iaɛ́ aↄ kã́fĩ. Mámɛmaa Dii á Lua.

26 Ásuli nↄ̀ↄ kòlokpasai sóo.[n] Ásuli màsokɛo. Ásuli pↄdamáo.[o] 27 Ásuli mizↄ̃io. Ásuli á lɛkãna kã́ kpaaĩo. 28 Ásuli á mɛ líli gɛ yã́ musuo.[p] Ásuli wɛ̃̀sã li ge à sↄti zↄ̃o. Mámɛmaa Dii.

29 Ásuli á nɛnↄɛ ↄ̃̀ↄkpa aà gↄ̃ káalua ũo,[q] kɛ́ bùsudeↄ su zɛ ń káaluakaao, dàa vãi i kↄ̃́ á bùsuuo yã́i. 30 Àli kã́mabogↄↄ pↄ́ má dìlɛↄ yãda. Àliↄ ma kúkĩi vĩa vĩ. Mámɛmaa Dii. 31 Ásuli yãma gɛ̀sisinaↄwao, mɛ́ ásuli tã́adeↄ kĩ́i wɛɛlɛ,[r] an gbãsĩ i liázio. Mámɛmaa Dii á Lua.

32 Àli fɛlɛ zɛ mikãpuadeɛ, àli zↄ̃ↄkɛ dↄ̃ gbɛ̃zↄ̃ↄↄnɛ, íↄ ma vĩa vĩ. Mámɛmaa Dii á Lua.

33 Tó bↄ̀mↄ kúánↄ á bùsuu, ásuli gbãamↄɛ̀o. 34 Àli bↄ̀mↄ pↄ́ kú á guu dilɛ lán belewa.[s] Àliↄ yeaàzi lá ázĩa wɛ̃niwa, asa bↄ̀mↄↄn á ũ Egipi bùsuu yãa. Mámɛmaa Dii á Lua. 35 Àↄ kú ń yãkɛa a zɛ́wao pↄ́yↄ̃a guu,[t] pↄ́ gbã̀a ge a gbia ge a zↄ̃ↄn lò. 36 À tó á pↄ́gbiayↄ̃bↄↄ ń á zaaↄ aaↄ kú wásawasa. Mámɛmaa Dii á Lua pↄ́ á bↄ́lɛ Egipi. 37 Àliↄ ma ikoyãↄ ń ma yãdilɛaↄ kũa píi, íↄ zĩkɛwà. Mámɛmaa Dii.

<- Levii buiↄ 18Levii buiↄ 20 ->