Levii buiↄ 17

Pↄkolokpakĩi

1 Dii yã'ò Mↄiziɛ à mɛ̀: 2 O Aalonaɛ ń a nɛ́ↄ ń Isailiↄ píi ǹ mɛ, yã́ pↄ́ má dìlɛn kɛ: 3 Tó Isaili zu ge sã ge ble dɛ̀ bòou ge wɛ̃́nkpɛ, 4 i mↄò kpaaũkpɛ kpɛɛlɛ sa'oioao, wali ade dilɛ aukↄlɛna ũ. Aukↄlɛnaɛ, wali ade bↄ a gbɛ̃́ↄ guu. 5 Isailiↄ su sa'o guei lↄo, sema aa mↄmɛɛ ń ń sa'obↄↄ kpaaũkpɛ kpɛɛlɛ, aai kpa sa'onawa, i sáaukpa sa'ooa, 6 i a au lɛ́ ma gbagbakĩiwa kpaaũkpɛ kpɛɛlɛ, i a nísi kpasa, a gĩ i kɛmɛɛ na. 7 Aasu sa'o tã́aↄwa aa gbãsĩkɛńnↄ lↄo. Bee aↄ dɛnɛ́ yãdilɛa ũ e ń buiwaɛ. 8 Onɛ́, tó gbɛ̃́ sa pↄ́ wì a pↄ́ kátɛu à tɛ́kũ ge sa pãle ò, bele ge bↄ̀mↄ pↄ́ kú á guun nò, 9 mɛ́ i mↄò kpaaũkpɛ kpɛɛlɛ sa'oioao, wali ade bↄ a gbɛ̃́ↄ guu.

Nↄ̀ↄ kòlokpasai

10 Tó gbɛ̃́ nↄ̀ↄ kòlokpasai sò, bele ge bↄ̀mↄ pↄ́ kú á guun nò, má fɛlɛaànↄɛ, mí ade bↄ a gbɛ̃́ↄ guu mà dɛ, 11 asa pↄ́ wɛ̃ni ku a au guuɛ, ↄ̃ má kpàwá àli á duuna kɛ̃owá sa'okĩiwa. Au mɛ́ ì duunakɛ̃má wɛ̃ni pↄ́ kú a guu yã́i.* 12 Ayãmɛto málɛ o Isailiↄnɛ, á gbɛ̃e su nↄ̀ↄ kòlokpasai sóo, baa bↄ̀mↄ pↄ́ kú á guu.

13 Tó Isaili ge bↄ̀mↄ pↄ́ kú á guu toekà, tó à nↄ̀ↄ ge bã pↄ́ wì so dɛ̀, aàli a kòlokpa à a au kↄ́lɛ, i bùsukawà, 14 kɛ́ au mɛ́ pↄ́ wɛ̃ni ũ yã́i. Má ò Isailiↄnɛ aasu nↄ̀ↄ kòlokpasai sóo, kɛ́ au dɛ pↄ́ wɛ̃ni ũ yã́i. Gbɛ̃́ pↄ́ sò, wali ade bↄ a gbɛ̃́ↄ guu. 15 Pↄ́ pↄ́ gà ń azĩao ge pↄ́ pↄ́ wài dɛ, tó bele ge bↄ̀mↄ dↄ̃o, mɛ́ a sò, aà a pↄkasaↄ pí, i zu'o, kási aↄ gbãlɛa e oosiɛ. 16 Tó i a pↄ́ↄpio, mɛ́ i zu'oo, a yã́ a wi aà musuɛ.

<- Levii buiↄ 16 Levii buiↄ 18 ->