Yobu 13

13

Yobu ye yã'o ń Luao

1 Ma wɛ́ yã́piↄ è píi,

ma swã́ mà ↄ̃ má dↄ̃̀.

2 Lá á dↄ̃a vĩ, màa má dↄ̃a vĩ sↄ̃,

i kɛ má kɛ̃́sãaázi no.

3 Ãma Gbãapiide ↄ̃ má ye mà yã'oɛ̀ sa,

má ye gɛ́ ń ma yã́o Luawaɛ.

4 Ápiↄ sↄ̃ i ɛɛ liamazi,

gyãegwan giaↄn á ũ ápii.

5 Tó á lɛ́ kpaaũa yãa lé,

wa á dilɛ ↄ̃nↄnaↄ ũɛ.

6 À ma yã́zɛ ma,

à swã́sɛ ma yã́zãsiawái.

7 Yã́zɛsai ↄ̃ á o Lua gɛ̃ɛ ũa?

Sã́sãyã ↄ̃ á o Lua gbɛua?

8 Á yãnakpa Luawa yã̀?

Á yã́siaànↄ yã̀?

9 Tó à wɛtɛ̀ á yã́i, a bↄánↄ nae?

Á dↄ́ɛwà lá wì dↄ́ɛ gbɛ̃nazĩnawawa yã̀?

10 Tó álɛ yãnakpawà a gbadↄ̃sai,

a á swã́gagaɛ.

11 Aà zↄ̃ↄkɛ a kã̀adaálao lé?

Vĩakɛaɛ̀ a tↄ̃́wáo lé?

12 Á yã'onɛↄá túfuɛ,

yã́ pↄ́ a giiyèoaá pɛ̀lɛaɛ.

13 À nílɛmɛɛ mà yã'o,

yã́ pↄ́ a ma le aà ma le.

14 Bↄ́yãi má azĩa pa swaai?

Máↄ a wɛ̃ni naa ma ↄzĩ yã̀?

15 Gwa, a ye ma dɛɛ, ma wɛ́ dↄ pↄei lↄo.

Ń beeo má gí ń mazĩao aà aɛ.

16 Bee a ma bↄ,

asa aà yãdansaiↄ we mↄ zɛ aà aɛo.

17 À laaidↄ ma yã́wa maamaa,

à swã́sɛmazi.

18 Ma yã́ pↄ́ má o zɛ́ kàlɛ,

má dↄ̃ kɛ́ ma yã́ naɛ.

19 Démɛ a fↄ̃ bↄbↄmanↄi?

Tó wa fↄ̃, má nílɛɛ, mí ga.

20 Lua, yã́ mɛ̀n plaɛ beeↄ kɛmɛɛ,

má ulɛnɛo.

21 Ǹ n ↄ goa,

ńsu to iwãakampↄa kã̀adamalao.

22 Bee gbɛa lɛzumazi, mí mↄ́,

ma gba zɛ́ mà yã'o, ní yã́zãsia.

23 Ma yãvãiↄ ń ma tàaeↄ kà ũmai?

To mà a tàae ń ma duunao dↄ̃.

24 Àkɛa ńlɛ nzĩa ulɛmɛɛ,

ńlɛ ma dilɛ n ibɛɛ ũi?

25 Lakɛɛ pↄ́ lɛ́ ĩ́ansɛ ↄ̃ ń ye wíwia?

Sɛ̃̀ gii ↄ̃ ń ye ɛ́'ɛa?

26 Ni yã́'ĩikpaa,

ni ma ɛ̀waasogↄↄ duuna wi ma musu.

27 Ni ma daliu,

ni ma táa'oa lɛ́ damɛɛ,

ni wɛ́tɛ ma yãvãiↄi píi.

28 Ɔ̃ ma gↄ̃ lán pↄ́ vlãa pↄ́ lì àlɛ lɛ́lɛlɛlɛwa,

lán pↄkasa pↄ́ blɛↄ lɛ́ blewa.

<- Yobu 12 Yobu 14 ->