Zelemii 6

Koezↄ̃a Yelusalɛũi

1 Bɛ̃yãmɛɛ buiↄ, à bↄlɛ Yelusalɛũ,

í gɛ́ mikpakĩi wɛɛlɛi!

À kuupɛ Tekoa!

À to súɛlɛ fɛlɛ Bɛtakɛlɛũ seela ũ.

Kìsia lɛ́ bↄ gugbãntoo oi,

kaalɛ zↄ̃ↄ looaála.

2 Má Siↄna midɛ,

wɛ̃́lɛ pↄ́ wì mɛ a kɛfɛũ mɛ́ a maa.

3 Zĩgↄ̃ↄ mↄ bòokpa liai,

lán sãdãnaↄ ń ń sãↄwa,

baade ń a gbɛ̃́ↄ a bòou.

4 À sↄukɛ wà si Siↄna ń zĩo,

à fɛlɛ wà gɛ lɛ́lɛmá ĩatɛ̃ gbãa zã́.

Agya! Ĩatɛ̃'aua pìla,

gu lɛ́ gɛ̃kↄ̃u kↄ̀.

5 À fɛlɛ wà gɛ lɛ́lɛmá gwãasĩna,

wí gu pↄ́ dɛ aa zɛ giu wíwi.

6 Ma Dii Zĩgↄ̃de ma mɛ̀:

À lizↄ̃zↄ̃,

í bùsu kálɛ Yelusalɛũ bĩ́i saɛ.

À ĩada wɛ̃́lɛpiwa,

asa gbãamↄakↄ̃ɛ mɛ́ kↄ̃̀u.

7 Lá í ìↄ di lↄ̀ↄu,

màa yãvãi di wɛ̃́lɛpiu.

Taiina ń yãpãsĩo zↄa dↄu,

mi e aà gyã ń aà bↄo làa ziio.

8 Yelusalɛũdeↄ, à ma lɛdama ma,

kɛ́ másu kɛ̃́wáo yã́i.

Tó màan sↄ̃o, má á bùsu dɛ̃ↄnzↄ̃ɛ,

gbɛ̃e aↄ ku a guu lↄo.

9 Ma Dii Zĩgↄ̃de ma mɛ̀:

Wa Isaili pↄ́ gↄ̃̀ↄ kↄ̃nwɛ,

lá wì vɛ̃ɛ kↄ̃nwɛwa.

Wa ɛa a gbɛsisi,

lá wì pↄ́ gbɛsisiwa.

10 Dé má yã'oɛ̀ mà aà gba laaii?

Démɛ a mamɛɛi?

An swã́ wɛ̃ao, aa fↄ̃ yãmao,

Dii yã́ ì kɛnɛ́ ĩ́iɛ,

ìli káńguo.

11 Dii pↄkũma dɛ̀dɛa,

má fↄ̃ màↄ kṹkũa lↄo.

Pↄkũmapi bↄbↄ nɛ́ↄwa gãaɛ

ń ɛ̀waaso pↄ́ kãaaa gudoũↄ.

To wà gↄ̃ɛ ń a nↄo kũ sãnu

ń gbɛ̃́ pↄ́ zikũ̀ táotaoↄ.

12 Ma Dii ma mɛ̀,

tó ma ↄ lòo bùsuɛbeedeↄla,

má ń bɛↄ na gbɛ̃pãleↄnɛ ń ↄzĩɛ,

ń ń buaↄ ń ń nↄɛↄ.

13 Nɛ́fɛ̃nɛn gbɛ̃zↄ̃ↄ píi ↄvãi'enaↄnɛ.

Ãnabiↄ ń sa'onaↄ píi aaìↄ gbɛ̃́ↄ sãsãɛ.

14 Aaì ɛsɛ ma ma gbɛ̃́ↄ bↄwa

lá a dɛ pↄe ũowa.

Aaì mɛ, aafia ku, aafia ku,

kási aafia ku we sↄ̃o.*

15 Yãbɛ̃ɛ pↄ́ aa kɛ̀ ì kɛnɛ́ wí ũe?

Aawo! Ìli kɛnɛ́ wí ũo,

an gɛɛ lí gↄ̃ kpá ń wɛ́io.

A yã́i aa ta gbɛ̃́ pↄ́ gɛ̀ gɛ́kĩiↄ guu,

aa kwɛ gↄↄ pↄ́ málɛ ĩadamá.

Ma Dii mámɛ má ò.

16 Ma Dii ma mɛ̀:

À zɛ zɛ́kpaau à a zɛ́ káauↄ gwa,

í a pↄ́ pↄ́ maa gbɛa àↄ bɛu,

á sↄ̃ i níni.†

Ɔ̃ a mɛ̀ áↄ bɛuo.

17 Ma gudↄ̃anaↄ‡ dìlɛɛ́,

má òɛ́ àli swãdↄ an kuupɛai,

ↄ̃ a mɛ̀ á swãdↄio.

18 Ayãmɛto buipãleↄ, à yãma,

í yã́ pↄ́ a ma gbɛ̃́ↄ le dↄ̃!

19 Dṹnia gbɛ̃́ↄ, à yãma,

málɛ mↄ́ gbɛ̃́piↄ ásookɛi.

Yã́ pↄ́ aalɛ yáↄ gbɛn we,

asa aai swãdↄ ma yã́io,

aa gì ma ikoyãiɛ.

20 Seba tulaleti dɛmɛɛ pↄe ũo,

ge kanɛli fee gĩnana pↄ́ bↄ̀ bùsu zã̀zãu.

Mili sa pↄ́ i oa i a pↄ́ kátɛu à tɛ́kũ sio,

á sa'oaa lí kamaguo.

21 Ayãmɛto ma Dii ma mɛ̀:

Má gbɛ pↄ́ gbɛ̃́ↄ ì gɛ̃mbↄlɛwàↄ kálɛ gbɛ̃́piↄnɛ ń aɛ,

maeↄ ń ń nɛ́ↄ, gbɛ̃́ ń a gbɛ̃́o

aai kpákpaa ḿpii aa gaga.

22 Ma Dii ma mɛ̀:

Gugbãntoo oi bùsudeↄ gwa,

aa fɛ̀lɛ,

bui zↄ̃ↄpiↄ lɛ́ bↄ za dṹnia lɛ́wa,

aalɛ mↄ́.

23 Aa sáↄ ń sↄ̃naↄ kṹkũa,

aa pãsĩ, aali gbɛ̃e wɛ̃nagwao.

An kↄ̃fĩ ìↄ dↄ lán ísia kↄ̃fĩwa,

aa didi sↄ̃́ kpɛ, aa zĩ'ↄpòo,

aalɛ mↄ́ lɛ́lɛiwá, Siↄnadeↄ.

24 Wa ń bao mà,

wá ↄ gↄ̃̀ dↄwázi.

Yã'ↄ̃ma wá kṹ gbãa,

wálɛ wãwãma lán nɛ'inawa.

25 Ásu gɛ́ buao,

ásu àↄ bɛ zɛ́uo,

asa ibɛɛↄ ń fɛ̃ndaↄ kṹkũaɛ,

vĩa pↄ́ↄ liaaázi.

26 Ma gbɛ̃́ↄ, à zwã̀nkasaↄ dↄdↄ á pi,

í gbeembo túfu guu.

À ↄ́ↄlↄ lán nɛ́ mɛ̀ndona gaamáwa,

à búbuapɛ pãsĩpãsĩ,

asa gbɛ̃kaalɛna a mↄ́wá kã́ndoɛ.

27 Ma n dilɛ mↄ̀baasana ũɛ,

ma gbɛ̃́ↄ mɛ́ gbɛ̀ mↄde ũ.

Ǹ ń yãkɛaↄ yↄ̃, ní ń dàa dↄ̃.

28 Swã́yãmansaideↄnɛ ḿpii,

aaìↄ bɛbɛ wàↄ yãdↄdↄmáɛ.

Aa fèe lán mↄgotɛ̃ ge mↄsiwaɛ,

yãkpaanlakɛnaↄnɛ ḿpii.

29 Sia lɛ́ tɛ́vu,

kɛ́ mↄ̀gbↄ̃ e láa tɛ́piu,

kási àlɛ mↄ baasa pãɛ,

gbɛ̃vãiↄ lɛ́ kɛ̃́ gbɛ̃maawao.

30 Wì onɛ́ ã́nusu giana,

asa Dii gìńziɛ.

<- Zelemii 5 Zelemii 7 ->