Zelemii 51

1 Ma Dii ma mɛ̀, má tó ĩ́an pↄkaalɛna fɛlɛ,

i Babɛlideↄ sɛ́lɛ ń Babiloniↄ píi.

2 Má bui zĩ̀loↄ gbaɛ Babɛliwa,

aa bↄ gupiiu,

aai lɛ́lɛwà yã́yiawagↄↄ,

aai ń fã́fã e an bùsu gↄ̃ da gii.

3 Ásu to an kàzunaↄ ń sá kã́o,

ásu to aa ń mↄ̀ ulaↄ dao.

Ásu ń ɛ̀waasoↄ wɛ̃nagwao,

à ń zĩgↄ̃ↄ míↄnzↄ̃.

4 Aa kwɛ gɛↄ ũ Babiloni bùsuu,

wa ń zↄ̃zↄ̃ aa lɛ́lɛ a zɛaↄu.

5 Isailiↄ ń Yudaↄá gyaaↄ no,

Dii Zĩgↄ̃de ń Lua i pãkpańzio,

asa tàae pↄ́ wa kɛ̀ Isailiↄ Lua

pↄ́ a kua adoaɛ Babiloni bùsuu kɛ̀ zài.

6 À bàalɛ bↄlɛ Babɛli,

á baade i a mibↄkĩi wɛɛlɛ.

Ásu to à gaga wɛ̃́lɛpi tàae yã́io.

Dii tↄsimagↄↄ mɛ́ pìla,

a fĩabonɛ́ a zɛ́waɛ.

7 Babɛli dɛ lán vua imibↄwa Dii ↄzĩɛ,

a tò dṹnia bui píi a igbɛ̃̀ kã̀.*

Buiↄ a vɛ̃ɛ mì, ↄ̃ aa gↄ̃̀ mìsai.

8 Babɛli a kwɛ́ kã́ndoɛ, i ga.

À ↄ́ↄlↄɛ̀, í ɛsɛ maɛ̀ aà bↄwa.

Wìliↄ dↄ̃o, a gí gbã́gbãia?

9 Wa ɛsɛ màma Babɛliwa, i gbã́gbão.

Wà aà to we sa,

wá baade a taa kɛ a bùsuu,

asa aà tàae luabɛpuana lè,

à gbã̀ zↄ̃̀ luawaɛ.†

10 Dii tò yã́ bↄ̀wanↄ na.

À mↄ wà gɛ́ yã́ pↄ́ Dii wá Lua kɛ̀ dau siuinɛ́ Siↄna.

11 À á kaↄ lɛ́ kɛkɛ,

í á sɛ̀ngbaoↄ sɛ́lɛ!

Dii Mɛdɛ kíaↄ sóikɛ̀ Babɛliwa,

asa à zɛ̀ ń aà kaalɛaoɛ,

i tↄsiwà a kpɛ́ yã́ musu.

12 À dàlapoo sɛ à mipɛò Babɛli bĩ́iwa.

À zĩgↄ̃ↄ gba gbãa,

í gudↄ̃anaↄ gbaɛ aa gɛ́ ń kúkĩi!

À gbɛ̃́ↄ zɛzɛ aa bↄnsaɛ kɛnɛ́!

Yã́ pↄ́ Dii zɛ̀ò a kɛɛ,

yã́ pↄ́ àlɛ yá Babɛlideↄ yã́ musupi.

13 Ń kálɛ swa zↄ̃ↄ saɛ,‡

àizɛɛ tↄ̃̀ma,

ń beeo n ka kaalɛa sa,

n ↄvãi'ea lɛ́ kà.

14 Dii Zĩgↄ̃de sì ń azĩao à mɛ̀

má tó wà li Babɛlia lán kwaↄwa,

wi kúkua dↄwà.

15 Dii mɛ́ tↄↄlɛ kɛ̀ ń azĩa gbãao,

à dṹnia kàlɛ ń azĩa ↄ̃nↄo,

à musu kpàlɛ ń azĩa wɛzɛ̃o.

16 Tó Dii pũ̀na,

í pↄ́ kú musu ì kↄ̃fĩkɛ,

ì to lou sisi za dṹnia lɛ́wa.

Dii ì bↄ ń ĩ́anao a làasiu,

ì to lou ma ń pílɛao.

17 Gbɛ̃nazĩnaↄ sↄũ, aa yãe dↄ̃o,

siaↄ gɛɛ a gↄ̃ kpá ń wɛ́i

tã́a pↄ́ aa pìↄ yã́ musu.

Pↄ́ ɛgɛnaↄnɛ, aa wɛ̃ni vĩo.

18 Pↄ́ gianaↄnɛ, láanipↄↄnɛ,

yã́kpalɛkɛgↄↄzĩ aa midɛ.

19 Dii pↄ́ dɛ Yakↄbu buiↄ baa ũ muaańnↄo,

asa ↄ̃mɛ pↄ́pii kɛ̀

ń bui pↄ́ à ń sɛ́ a pↄ́ ũↄ.

Aà tↄ́n Dii Zĩgↄ̃de.

20 Babɛli, ń dɛ ma gbɛ̃́wiwibↄ ũɛ,

ma gↄ̃kɛbↄn n ũ.

Mi n sɛ mà buiↄ wíwiò,

mi ń kpalaↄ midɛnnↄ.

21 Mi sↄ̃́ↄ ń ń dikpɛnaↄ wíwinnↄ

ń zĩkasↄ̃goↄ ń sↄ̃́godeↄ.

22 Mi gↄ̃ɛↄ ń nↄɛↄ wíwinnↄ,

nɛ́fɛ̃nɛn gbɛ̃zↄ̃ↄ,

ɛ̀waasoↄ ń wɛ̃́ndiaↄ píi.

23 Mi sãdãnaↄ ń ń sãↄ wíwinnↄ,

zↄ̃ɛↄ ń ń zù zĩkɛnaↄ,

dↄaanaↄ ń gbãadeↄ.

24 Má fĩabo Babɛlideↄnɛ

ń Babiloniↄ píi á wáa

vãi pↄ́ aa kɛ̀ Siↄnaɛ yã́i.

Ma Dii mámɛ má ò.

25 Gbɛ̀sĩsĩ bùsudɛna,

ni dṹnia bṹu ↄ̃̀ↄkpa,

ↄ̃ ma fɛlɛnnↄ sa.

Ma Dii mámɛ má ò.

Má ↄkàa kpanzi

mà n zu yãtɛ̃uɛ,

ní gↄ̃ lán gbɛ̀sĩsĩ tɛ́kũawa.

26 Wa n gbɛe sɛ kpɛdↄgbɛↄ mide ũ

ge ɛ̃daalɛgbɛ ũo,

asa ńyↄ̃ↄ dɛ bɛzia ũ gↄↄpiiɛ.

Ma Dii mámɛ má ò.

27 À gudↄkↄ̃ɛkĩi dilɛ dṹniau,

à zĩ̀ kuupɛ bùsu ń bùsuo.

À gbãbↄ buiↄnɛ,

aa gɛ́ lɛ́lɛi Babɛliwa,

Alalata kía ń Mini kíao

ń Asɛnazi kíao sóikɛwà,

í zĩgↄ̃ badeↄ dilɛ aa gɛ́ lɛ́lɛiwà,

í sↄ̃deↄ gbaɛwà lán kwasutɛ̃ↄwa.

28 À gbãbↄ buiↄnɛ aa gɛ́wà ń zĩo,

Mɛdɛ kíaↄ ń ń dↄaanaↄ ń ń gbãadeↄ

ń bùsu pↄ́ aalɛ kiblewàↄ gbɛ̃́ↄ.

29 Dṹnia lɛ́ dee, àlɛ pelembo,

yã́ pↄ́ Dii lɛ́ yá ń Babɛlio gi kuɛ.

A to Babiloni bùsu gↄ̃ bɛzia ũɛ,

gbɛ̃e aↄ ku we lↄo.

30 Babɛli nɛgↄ̃naↄ fù zĩwa,

aa gↄ̃̀ ye ń zɛgikĩiↄu.

An yɛ̃̀ɛɛ làa aa gↄ̃̀ lán nↄɛↄwaɛ.

Wà tɛsↄ̃̀ ń bɛↄwa,

wà ń bↄlɛ gbã́aↄ ɛ̀'ɛ.

31 Zĩnaↄ lɛ́ dadakↄ̃lɛ,

baokpanaↄ tɛkↄ̃i,

aalɛ gɛ́ baokpai Babɛli kíaɛ,

aa oɛ̀ wà aà wɛ̃́lɛ bũu sìwà,

32 wà swabuakĩiↄ sì,

wà tɛsↄ̃̀ dã̀naↄwa,

gili gɛ̃̀ zĩgↄ̃ↄgu píi.

33 Ma Dii Zĩgↄ̃de Isailiↄ Lua ma mɛ̀

Babɛli kɛkɛgↄↄ kà,

a dɛ lán pↄ́wɛna pↄ́ wa kàlɛ zɛu,

wàlɛ go kɛɛ̀waɛ.

34 Babɛli kí Nɛbukanɛza wá taitai,

à wá kɛ́ kɛ́lɛkɛlɛ,

à wá tó lán dàa giiwa.

À wá mↄmↄ lán kwãsawa,

à kã̀ pã́upãu ń wá pↄ́ maaↄ,

ↄ̃ à ↄzↄ̃̀wázi.

35 Siↄnadeↄ mɛ̀

gbãa pↄ́ Babɛlideↄ mↄ̀nɛ́ aa ń só,

to a yã́ wí ń musu.

Yelusalɛũdeↄ mɛ̀

ń bↄ́ↄ'i pↄ́ Babiloniↄ mì,

to aa a gbɛ'e.

36 A yã́i ma Dii ma mɛ̀,

À ma! Má zɛánↄ, mí tↄsiɛ́.

Má tó an swada í ba,

má tó an nibↄnaↄ gↄ̃ gii.

37 Babɛli a gↄ̃ gbɛ̀zɛ ũɛ,

gbɛ̃gbonaↄ tòo ũ, sↄ̃kɛ̃ngu pↄ́ ũ,

láanipↄ ũ, gbɛ̃e aↄ ku weo.

38 Babɛlidepiↄ pũna sãnusãnu lán nↄ̀ↄmusuwa,

aa ↄ́ↄlↄ lán nↄ̀ↄmusu nɛ́ↄwa.

39 Gↄↄ pↄ́ an mɛ wã̀,

ↄ̃ má mↄ́nɛ́ ń í gbãao,

mí kákanɛ́, aai gↄ̃ dↄ̀ↄsai,§

aaiↄ i'o vusai gↄↄpii.

Ma Dii mámɛ má ò.

40 Má ń pã́lɛ lán sãnɛbↄlↄ

pↄ́ wàlɛ mↄ́ ń kòlokpaiↄwa,

lán sãsakaoↄ ge blesanaↄwa.

41 Wa lɛ́lɛ Babɛliwaɛ fá!

Wa dṹnia wɛ̃́lɛ tↄdepi siɛ,

Babɛlipi i gↄ̃ sↄ̃kɛ̃ngu pↄ́ ũ buiↄnɛ.

42 Ísia a da Babɛliaɛ,

a ikooa kↄ̃fĩdeↄ lɛ́lɛwà.

43 Aà zↄ̃ɛwiaↄ gↄ̃ bɛziaↄ ũ,

aà bùsu i gↄ̃ gbáa gii ũ.

Gbɛ̃e aↄ ku weo, gbɛ̃e a pãao.

44 Má fɛlɛ ń Bɛlio Babɛli,

mí tó aà pↄ́ pↄ́ a mↄ̀mↄↄ pisipisi.

Buiↄ siu we lↄo, aà bĩ́iↄ kwɛ́.

45 À bↄlɛ a guu ma gbɛ̃́ↄ,

baade azĩa mibↄkĩi wɛɛlɛ

ma pↄkũma pãsĩ yã́i.

46 Tó a bùsupi baoe mà,

ásu to sↄ̃ kɛ̃́águo,

ásu to vĩa á kũo.

Yãpãsĩ a fɛlɛ bùsupiu,

kpaladeↄ fɛlɛ ń kↄ̃o.

Á yã́pi feena ma wɛ̃a,

í a feena ma zii.

47 Asa a gↄↄ lɛ́ mↄ́

kɛ́ má fɛlɛ ń Babɛli tã́aↄ.

A gbɛ̃́ↄ kwɛ gɛↄ ũ a guu,

bùsupideↄ gɛɛ i gↄ̃ kpá ń wɛ́i.

48 Luabɛdeↄ ń zĩ́lɛdeↄ gulakɛ

Babɛli yã́ musu ḿpii,*

asa bùsudɛnaↄ bↄ gugbãntoo oi,

aa mↄ lɛ́lɛwàɛ.

Ma Dii mámɛ má ò.

49 Lá Babɛlideↄ gbɛ̃́ↄ dɛ̀dɛ dṹnia guu dasi,

Babɛlipi a wiɛ sa

Isaili pↄ́ aa ń dɛdɛↄ yã́ musu.†

50 Á Isaili pↄ́ a bↄ an fɛ̃nda lɛ́zĩↄ,

à bↄ we, ásu zɛzɛ weo.

À to Dii yã́ dↄágu za zã̀zã we,

í Yelusalɛũ yãda á sↄ̃u.

51 Wà yã́ lìwɛ̃ɛ, ↄ̃ wí wá kṹ,

bui zĩ̀loↄ gɛ̃̀ Dii kpɛ́u e aà kúkĩi,

wá gɛɛ gↄ̃̀ kpá wá wɛ́i.

52 Ma Dii ma mɛ̀, a gↄↄ lɛ́ mↄ́

kɛ́ má fɛlɛ ń Babɛli tã́aↄ,

gbɛ̃́ pↄ́ kɛ̀'ĩa Babiloni bùsu bũu guuↄ aaↄ aaukɛ.

53 Baa tó Babɛli gbã̀ zↄ̃̀ luawa,

mɛ́ à a bĩ́i lɛsĩ gbãa kã̀fĩ,

ma bùsudɛnaↄ gbaɛ aa gɛ lɛ́lɛwàɛ.

Ma Dii mámɛ má ò.

54 Babɛlideↄ wii ma dↄ,

Babiloni bùsu wíwia zↄ̃ↄ.

55 Asa Dii a Babɛli dúuzↄ̃ɛ,

i to aà súu zↄ̃ↄ midɛ.

Zĩgↄ̃ↄ lɛ́lɛwà lán ikooaↄwa,

an zↄa iↄ dↄ lán isukaawa.

56 Bùsudɛnaↄ mↄ lɛ́lɛ Babɛliwa,

aai aà nɛgↄ̃naↄ kṹkũ,

aai ń sáↄ ɛ́'ɛ,

asa ma Dii mi tↄsimá

mà fĩabonɛ́ a zɛ́waɛ.

57 Má íkaka aà kíaↄnɛ

ń aà ↄ̃nↄnaↄ ń aà dↄaanaↄ

ń aà gbãadeↄ ń aà nɛgↄ̃naↄ,

aaiↄ i'o vusai gↄↄpii.

Ma Dii mámɛ má ò.

58 Ma Dii Zĩgↄ̃de ma mɛ̀

wa aà bĩ́i gèele daaĩ,

wa tɛsↄ̃ aà bↄlɛ lɛsĩↄwa.

Gbɛ̃nazĩnaↄ ì ĩada ńzĩawa pãɛ,

buiↄ isimagakpaa gbɛ a gↄ̃ tɛ́ pↄ́ ũɛ.

Gɛa ń Zelemii taalao Babɛli

59 Nɛlia nɛ́ Selaia, Maasea tↄũna gɛ̀ Babɛli ń Yudaↄ kí Zedekiao kíapi kpalablea wɛ̃̀ síiↄ̃de guu. Selaiapi mɛ́ kía bòokpakĩi dↄaana ũ. Yã́ pↄ́ Zelemii dàɛ̀n kɛ. 60 Zelemii yãvãi pↄ́ a Babɛli lepiↄ kɛ̃̀ taala guu píi, 61 ↄ̃ a ò Selaiaɛ: Tó n ka Babɛli, wɛtã ǹ láɛ bee kyokɛnɛ́ píi, 62 ní mɛ, Dii mɛ́ ò á guɛ bee míↄnzↄ̃ɛ, gbɛ̃e ge pↄtuoe aↄ ku a guu lↄo. Aↄ da bɛzia ũ gↄↄpiiɛ. 63 Tó n lápi kyokɛ̀ ń làa, ba yewà ǹ naaa ń gbɛo, ní zu Uflata guoguo, 64 ní mɛ, màa Babɛli a kpálɛ fusai‡ yã́ pↄ́ Dii yìawà yã́i.

Zelemii yã́ lɛ́n we.

<- Zelemii 50 Zelemii 52 ->