Zelemii 3

1 Tó gbɛ̃e gì a nai,

ↄ̃ à gɛ̀ zãkɛ̀ gupãlei,

a fↄ̃ ɛa nↄpi kũ lↄe?

Aà kũa a bùsupi gbãlɛ dúuduuɛ.

Ápiↄ sↄ̃ a gbãsĩkɛ̀ ń gↄ̃ↄ dasi,

ↄ̃ a ɛa lɛ́ sua saa?

Ma Dii mámɛ málɛ á la.

2 À wɛzu à sĩ̀sĩ wáiwaiↄ gwae,

gu kpele wi á dã̀akpauo ni?

Iↄ zↄ̃lɛ zɛ́ saɛ àↄ gↄ̃ↄ dã́

lán Laalubue zↄ̃lɛa guwaiwaiuwa.

3 A yã́i tò ma gi lou maɛ́,

káabuana i kɛɛ́o.

Ń beeo á wɛ́ dɛ lán káalua wɛ́waɛ,

wí lí á kũo.

4 A lɛzùmazi tia a mɛ̀:

Wá Mae, wá ɛ̀waasogↄↄ gbɛ̃na,

5 n pↄ aↄ paawázi e bↄɛ ni?

Ńyↄ̃ↄ wá kpɛ̃nɛ kũa gↄↄpii yã̀?

Màa i omɛɛ,

ↄ̃ iↄ yãvãikɛ á pↄeãwa.

Isailiↄ pↄ̀ↄbↄzãkɛa Diiɛ ń ń suawào

6 Kí Yosia kpalablegↄↄ Dii òmɛɛ: N Isaili pↄ̀ↄbↄzãkɛnapiↄ yãkɛa èa? Aa gɛ̀ gbãsĩkɛ̀ sĩ̀sĩ lɛsĩ píi musu ń lí yɛ̀lɛlɛↄ píi gbáuo. 7 Málɛ e yã́ beeↄ kɛa gbɛa píi aa suaɛ, kási aai suao. Ɔ̃ an gbɛ̃́ Yuda náaisaideↄ ń yãkɛapiↄ è. 8 Ma gínzila kpà Isaili pↄ̀ↄbↄzãkɛnapiↄwa, ma ń yá gbãsĩ pↄ́ aa kɛ̀ↄ yã́i. Kási vĩa i ń gbɛ̃́ Yuda náaisaidepiↄ kũo, ↄ̃ aa gɛ̀ gbãsĩkɛ̀ sↄ̃. 9 Káaluakaa i kɛ Isailiↄnɛ yãe ũo, ↄ̃ aa ń bùsu gbãlɛ̀, aa gbãsĩkɛ̀ gbɛↄ ń líↄ yã́ musu. 10 Gia ń beeo píi an gbɛ̃́ Yuda náaisaidepiↄ i sua ń nↄ̀sɛmɛndooo, sema mↄafili. Ma Dii mámɛ má ò.

11 Ɔ̃ Dii òmɛɛ: Isaili pↄ̀ↄbↄzãkɛnapiↄ yã́ maa dɛ Yuda náaisaidepiↄla. 12 Gɛ ǹ kpàwakɛ gugbãntoo oi ǹ mɛ:

Ma Dii ma mɛ̀,

à sua Isaili pↄ̀ↄbↄzãkɛnaↄ!

Má fɛ̃́ázi lↄo, asa má gbɛ̃kɛ vĩ,

ma pↄ aↄ paaázi gↄↄpiio.

Ma Dii mámɛ má ò.

13 À we á tàaei lé!

Asa a bↄ ma Dii á Lua kpɛɛ,

a táa'ò dii zĩ̀loↄwa

lí yɛ̀lɛlɛↄ píi gbáu,

i swã́sɛ ma yã́io.

Ma Dii mámɛ má ò.

14 Ma Dii ma mɛ̀, gbɛ̃nazĩn pↄ̀ↄbↄzãkɛnaↄ, à sua, asa á zã́n ma ũ. Má á sɛ́ wɛ̃́lɛ ń wɛ̃́lɛo dodo, bui ń buio plapla, mí suánↄ Siↄna. 15 Dã̀na pↄ́ an nↄ̀sɛ muaamanↄↄ ↄ̃ má ń dilɛ aa dↄaaɛ́ ń dↄ̃ao ń laaio. 16 Ma Dii ma mɛ̀, gↄↄ bee tó a kↄ̃ a dasikũ̀ á bùsuu, wa ma bàakuaánↄ kpagolo yã'o lↄo, a làasoo a gɛ̃ an sↄ̃ guuo. A ni aↄ kúmáo, mɛ́ wa a pãle kɛo. 17 Zĩbeezĩ wa o Yelusalɛũɛ, Dii kpalabaa. Bui píi a si Yelusalɛũu ma tↄbↄa yã́i. An nↄ̀sɛvãi swã́gbãa yã́ a dↄaanɛ́ lↄo. 18 Gↄↄ bee Yudaↄ na Isailiↄwa, aa bↄ gugbãntoo oi bùsuu sãnu, aai su bùsu pↄ́ má kpà ń deziↄwau.

19 Mámɛ má ò.

Má ye mà á sí ma nɛ́ↄ ũɛ,

mí pↄeã bùsu kpáwá,

bùsu pↄ́ a kɛfɛnkɛ dɛ buipãleↄ pↄ́a.

Málɛ e áli ma sísi á Mae ũɛ,

mɛ́ á we ma to weo,

20 ãma á Isailiↄ a bↄ ma kpɛ,

lán nↄɛ pↄ́ a zã́ tò à gɛ̀ gbãsĩkɛ̀wa.

Ma Dii mámɛ má ò.

21 Wii ma dↄ sĩ̀sĩ wáiwai musu,

Isailiↄ lɛ́ ↄ́ↄlↄ, aalɛ awakpa,

asa aa pã̀zɛaɛ,

ma Dii ń Lua ma yã́ sã̀ńguɛ.

22 À ɛa sua, pↄ̀ↄbↄzãkɛnaↄ,

mí á gbã́gbã ń á pↄ̀ↄbↄzãkɛgyão.

Wá kɛ́! Wá sumaɛ,

asa ḿmɛnn Dii wá Lua.

23 Sĩ̀sĩↄ ɛɛ vĩ, gbɛ̀sĩsĩↄ zↄa vĩ,

Dii Isailiↄ Lua mɛ́ wá Suabana ũ.

24 Za wá ɛ̀waasogↄↄ

tã́aↄ wá maeↄ zĩ ài blè,

an sãↄ ń ń zuↄ

ń ń nɛgↄ̃ɛↄ ń ń nɛnↄɛↄ.

25 Wà naalɛ ń wío,

wà tó wá gɛɛ gↄ̃ kpá wá wɛ́i,

asa ń wá deziↄ wa duunakɛ̀ Dii wá Luaɛɛ,

za wá ɛ̀waasogↄↄ e gbã wi aà yãmao.