Zelemii 21

Zelemii Yelusalɛũ dúuzↄ̃a yã'oa

1 Dii yã'ò Zelemiiɛ gↄↄ pↄ́ kí Zedekia Malakia nɛ́ Pasuu ń sa'ona Zefania, Maasea nɛ́o zĩ̀wà. Aa mɛ̀: 2 Yãgbɛawɛ̃ɛ Diiwa, asa Babɛli kí Nɛbukanɛza lɛ́ zĩkawanↄɛ.* Wìliↄ dↄ̃o tó Dii a dabudabue kɛwɛ̃ɛ lán yãawa, i aà yáwɛ̃ɛ.

3 Ɔ̃ Zelemii ònɛ́ aa gɛ o Zedekiaɛ: 4 Dii Isailiↄ Lua mɛ̀: N zĩgↄ̃ pↄ́ aa gↄ̃kɛbↄↄ kũa, aalɛ zĩkaò bĩ́i kpɛ ń Babɛli kíao ń Babiloni bùsude pↄ́ koezↄ̃̀áziↄ, má tó n zĩgↄ̃piↄ kpɛkpaɛ, wi ń gↄ̃kɛbↄpiↄ sɛ́lɛ sioázi wɛ̃́lɛu la. 5 Mámɛ má a gã̀sĩ poo, mí zĩkaánↄ ń ma gã̀sa gbãao ń pↄfɛ̃o ń kyã̀wãao ń pↄkũma zↄ̃ↄo. 6 Má gagyã pãsĩ ká wɛ̃́lɛɛbeedepiↄgu aa gagaɛ, gbɛ̃nazĩnaↄ ń pↄtuoↄ píi. 7 Ma Dii ma mɛ̀, bee gbɛa mí Yudaↄ kí Zedekia ń a ìwaↄ ń gbɛ̃́ pↄ́ aa bↄ̀ gagyã ń zĩo ń nↄanao guuↄ na Babɛli kí Nɛbukanɛzaɛ a ↄzĩ ń ń ibɛɛ pↄ́ aalɛ ń wɛↄ, aai ń dɛdɛ ń fɛ̃ndao. Aa sùuukɛńnↄo, aa ń gbɛ̃e too, aa ń wɛ̃nagwao.

8 O gbɛ̃́ kĩniↄnɛ sↄ̃ ma Dii ma mɛ̀, wɛ̃ni zɛ́ ń ga zɛ́o ↄ̃ málɛ ↄlↄnɛ́. 9 Gbɛ̃́ pↄ́ gↄ̃̀ wɛ̃́lɛɛ beepiuↄ gaga zĩu ń nↄanao ń gagyãoɛ. Gbɛ̃́ pↄ́ aa bↄ̀ gɛ̀ nà Babiloni bùsude pↄ́ koezↄ̃̀ńziↄwaↄ sↄ̃ aaↄ kuɛ, adeↄ mɛ́ aa bↄ. 10 Ma zɛò mà vãikɛ wɛ̃́lɛɛ beepiɛ, i kɛ maa no. Ma Dii mámɛ má ò. Má wɛ̃́lɛpi na Babɛli kíaɛ a ↄzĩɛ, i tɛsↄ̃wà. 11 O Yudaↄ kí bɛdeↄnɛ aa Dii yã́ɛ bee ma.

12 Davidi bɛdeↄ, ma Dii ma mɛ̀,

àliↄ yãkɛ a zɛ́wa lá gu lɛ́ dↄ,

í gbɛ̃́ pↄ́ wàlɛ gbãamↄnɛ́ↄ bↄ ń wɛtãnaↄ ↄzĩ.

Tó i kɛ màa sↄ̃o, má pↄfɛ̃bↄbↄwá

lán tɛ́wa á vãikɛaↄ yã́iɛ,

iↄ kṹwá, gbɛ̃e a fↄ̃ dɛo.

13 Yelusalɛũdeↄ, má bↄ á kpɛɛ.

Ma Dii mámɛ má ò.

Á kú gbɛ̀ sàlala musu guzulɛ saɛ,

ↄ̃ i mɛ: Démɛ a fↄ̃ lɛ́lɛwái?

Démɛ a e siwázi wá tòoui?

14 Má ĩadawá á yãkɛaↄ lɛ́uɛ.

Ma Dii mámɛ má ò.

Má tɛsↄ̃ á líkpɛ kpɛ́waɛ,†

tɛ́pi i kṹ pↄ́ pↄ́ liaaiↄwa píi.

<- Zelemii 20 Zelemii 22 ->