Zelemii 17

Sↄ̃ mↄafili vĩ dɛ pↄ́piia

1 Wà Yudaↄ duuna yã́ kɛ̃̀nɛ́ ń sↄ̃wa ń pɛ̃nkɛ̃bↄo.

Wa kɛ̃̀ ń sa'okĩiↄ kↄ́baↄwa ń gbɛkãoo.

2 An sa'okĩiↄ ń ń Asetaati lipɛlɛↄ yã́ ìↄ dↄ ń nɛ́ↄgu se.

Aa ku lí yɛ̀lɛlɛↄ gbáu sĩ̀sĩ lɛsĩↄ musu.

3 Má a gbɛ̀sĩsĩ na á ibɛɛↄnɛ ń ↄzĩ

ń á àizɛɛↄ ń á pↄ́ ↄdeↄ

ń gulɛsĩ pↄ́ á bòↄɛ

duuna pↄ́ á kɛ̀ á bùsuu yã́i.

4 Á ↄkpa bùsu pↄ́ má kpàwázi,

mí tó à zↄble á ibɛɛↄnɛ bùsu pↄ́ á dↄ̃o guu,

asa á tò ma pↄ fɛ̀lɛ lán tɛ́waɛ,

mɛ́ tɛ́pi aↄ kũ gↄↄpiiɛ.

5 Ma Dii ma mɛ̀, gbɛ̃́ pↄ́ bↄ̀ ma kpɛ

à gbɛ̃nazĩnaↄ náaikɛ̀,

a daa ń gã̀u gↄ̃̀ láaipↄ ũɛ.

6 A dɛ lán lí pↄ́ kú gugiiuwaɛ.

Tó nama mↄ̀, a e bleo.

Aↄ ku guwaiwaiuɛ

ge bùsu wiside pↄ́ gbɛ̃e kuuo.

7 Báaaden gbɛ̃́ pↄ́ lɛ́ ma náaikɛ,

àlɛ sↄ̃kpalɛmazi ũ.

8 A dɛ lán lí pↄ́ wa bà swa saɛ,*

a zĩ́napɛlɛa íuwaɛ.

Aà bàa kú ń guwãaoo,

a lá ìↄ siaɛ.

Ìli imina yãdao,

nɛ'i ĩaaànↄo.

9 Sↄ̃ mↄafili vĩ dɛ pↄ́piia,

a kɛkɛa vĩo,

démɛ a fↄ̃ à a yã́ↄ dↄ̃i?

10 Ma Dii, mámɛ mi sↄ̃ yↄɛ,

mi nↄ̀sɛ yã́ tàasika,

mí fĩabo baadeɛ a yãkɛawa,†

mí kɛɛ̀ lá a kɛ̀wa.

11 Gbɛ̃́ pↄ́ ↄda è zɛ́ vãi guu dɛ

lán dↄ̃na pↄ́ gbe kↄ̃mpa pìpiwaɛ.

Gↄↄ pↄ́ a ku a gↄↄ soplawa,

ↄ̃api a láawàɛ, i gↄ̃ sↄũ ũ gbɛzã.

12 Wá Lua kpɛ́ mɛ́ aà kpalabaa gawide ũ,

kpɛ́pi mɛ́ fuańla za asĩnizĩ.

13 Dii, ḿmɛ Isailiↄ wɛ́ dↄnzi,

wí a gbɛ̃́ pↄ́ pãkpànziↄ kṹ.

Gbɛ̃́ pↄ́ bↄ̀ ma kpɛↄ dɛ lán tↄ́ pↄ́ wa kɛ̃̀ tↄↄlɛwawaɛ,

asa aa pãkpà n gbɛ̃́ pↄ́ ń dɛ nibↄna í wɛ̃nide ũziɛ.

14 Ma gbã́gbã Dii, mí gbã́gbã,

ma bↄ Dii, mí bↄ,

asa n táasi miↄ lɛ gↄↄpii.

15 Wì mɛ yã́ pↄ́ Dii ò ku máɛ?

Aà kɛ wà e mɛ!

16 Mi gí dↄaainɛ n gbɛ̃́ↄnɛo,

ń dↄ̃ kɛ́ mámɛ mi wɛ́tɛ̃agↄↄ nidɛo,

yã́ pↄ́ ì bↄ ma lɛ́u ulɛanɛo.

17 Ńsu to sↄ̃ kɛ̃maguo,

ḿmɛ ń ma ulɛkĩi ũ yãpãsĩgↄↄ.

18 To wí ma wɛtãnaↄ kṹ,

mapi sↄ̃, ńsu to wí ma kũo.

To sↄ̃ kɛ̃́ńgu,

mapi sↄ̃, ńsu to sↄ̃ kɛ̃maguo.

Ǹ ń ká yãpãsĩpi gↄↄwa,

ní ń wíwi e lɛɛ pla.

Kã́mabogↄↄ

19 Dii òmɛɛ: Gɛ ǹ zɛ Gbɛ̃́ↄ Bↄlɛu, gu pↄ́ Yuda kíaↄ ìↄ gɛ̃u, aaìↄ bↄu, ní gɛ́ Yelusalɛũ bↄlɛ kĩniↄu lↄ píi. 20 Ní onɛ́ aa swã́kpa aa ma yãma, Yuda kíaↄ ń Yelusalɛũdeↄ píi ń Yuda pↄ́ aalɛ gɛ̃ bↄlɛpiↄuↄ píi.

21 Ma Dii ma mɛ̀: À laaika!

Ásu asosɛ kã́mabogↄↄzĩo,

ásu gɛ̃ò Yelusalɛũ bↄlɛↄuo.‡

22 Ásu bↄò á ua kã́mabogↄↄzĩo,

ásuli zĩe kɛ gↄↄpi zĩ́o.

Àliↄ dↄ̃ kɛ́ kã́mabogↄↄá ma pↄ́ɛ,

lá má dìlɛ á deziↄnɛwa.§

23 Kási aai mao, aai swã́sɛio,

aa ń swã́ kàkaɛ, aai mao,

aa gì totoaiɛ.

24 Ma Dii ma mɛ̀, tó a ma yãmà, álɛ gɛ̃ wɛ̃́lɛpi bↄlɛↄu ń asoo kã́mabogↄↄzĩ lↄo, tó á dↄ̃ kɛ́ gↄↄpiá ma pↄ́ɛ, álɛ zĩe kɛ gↄↄpi zĩ́o, 25 kía pↄ́ aa zↄ̃lɛa Davidi kpalauↄ gɛ̃ wɛ̃́lɛɛ beepi bↄlɛↄu ń ń ìwaↄ kua sↄ̃́goↄ guu ń dia sↄ̃́ↄ kpɛo. Yelusalɛũdeↄ ń Yudaↄ aaↄ kúńnↄ, aaiↄ ku wɛ̃́lɛɛ beepiu gↄↄpii. 26 Wa bↄ wɛ̃́lɛ pↄ́ liaa Yelusalɛũiↄ guu ń Yuda wɛ̃́lɛↄ píi ń Bɛ̃yãmɛɛ bui wɛ̃́lɛↄ ń gusalalao ń gusĩsĩdeo ń Nɛgɛvɛ guwaiwaio, wi mↄ ma kpɛ́u ń sa pↄ́ wì a pↄ́ kátɛu à tɛ́kũ obↄↄ ń sa pãle obↄↄ ń pↄ́wɛntio ń tulaletio ma sáaukpaa yã́i. 27 Tó i ma yãma á dↄ̃̀ kɛ́ kã́mabogↄↄzĩá ma pↄ́ɛo, mɛ́ álɛ gɛ̃ Yelusalɛũ bↄlɛↄu ń asoo kã́mabogↄↄzĩ, má tɛ́ka bↄlɛpiↄuɛ, i kṹ á zɛgikĩiↄwa. Wa fↄ̃ tɛ́pi dɛo.

<- Zelemii 16 Zelemii 18 ->