Zelemii 14

Ikpaa

1 Dii yã'ò Zelemiiɛ lousai yã́ musun à mɛ̀:

2 Yuda bùsu gↄ̃̀ wɛ̃nannↄ,

a wɛ̃́lɛↄ gↄ̃̀ zeesai.

Wɛ̃́lɛdeↄ oosìsi ń bùsu yã́ musu,

Yelusalɛũdeↄ zↄa ma dↄ.

3 Zɛdeↄ ì ń zĩkɛnaↄ zĩ ítↄi.

Tó aa gɛ̀ lↄ̀ↄi, aali í eo,

aaì su tùu giiɛ, bíli ì ń kṹ.

Ì kɛnɛ́ wí ũ, aaì pↄ́ku ń wɛ́a.

4 Sɛ̃̀wanaↄ gↄ̃̀ ń bílio,

aalɛ pↄ́kuku ń wɛ́a,

tↄↄlɛ pàapaa, lou i ma gueio.

5 Baa tue da ì a nɛ́ tó weɛ,

kɛ́ sɛ̃ kuo yã́i.

6 Sɛ̃̀a zàa'ĩnaↄ zɛ sĩ̀sĩ wáiwaiↄ musu,

aalɛ we hɛ̀hɛhɛhɛ lán gbɛ̃gbonaↄwa,

an wɛ́ tà loũloũ sɛ̃sai yã́i.

7 Baa kɛ́ wá tàaeↄ wá dá yã́u,

dↄwálɛ n tↄ́ yã́i.

Wá pↄ̀ↄbↄzãkɛa kɛ̀ zài,

wa duunakɛ̀nɛ.

8 N gbɛ̃́ pↄ́ Isailiↄ wɛ́ dↄnzi,

an wɛtãgↄↄ Suabana,

àkɛa n gↄ̃wɛ̃ɛ lán nibↄ ge gɛ̃zɛa

pↄ́ mↄ̀ ì wá bùsuu gↄↄ dowai?

9 Bↄ́yãi ń dɛ lán gbɛ̃́ pↄ́ yã́ dìwà

ge nɛgↄ̃na pↄ́ a fↄ̃ ń suabaowai?

Dii, ń kú wá guu,

wìↄ wá sisi n tↄ́wa,

ńsu pãkpawázio.

10 Yã́ pↄ́ Dii ò gbɛ̃́piↄ yã́ musun kɛ:

Aa ye liaaliaai maamaaɛ,

aali zↄ̃lɛ ń zíwao,

an yã́ lí ká Diiguo.

An tàaeↄ a dↄaàgu sa,

i ĩadamá an duuna yã́i.

11 Ɔ̃ Dii òmɛɛ: Ńsu gbɛ̃́piↄ aafia wabikɛao. 12 Baa tó aa lɛyè, má ń wabikɛa sio. Baa tó aa sa pↄ́ wì a pↄ́ kátɛu à tɛ́kũ òa ń pↄ́wɛntio, má síńnↄo. Má ń midɛ ń zĩo ń nↄanao ń gagyãoɛ. 13 Ɔ̃ ma mɛ̀: Á'a Dii Lua! Ãnabiↄ mɛ́ i onɛ́ aa wɛsi zĩlɛo, nↄana a ń dɛo. Aaì mɛ ńyↄ̃ ń gba aafia gↄↄpii guɛ beeuɛ.

14 Ɔ̃ Dii òmɛɛ: Ãnabipiↄ lɛ́ ãnabikɛkɛ ń ɛɛo ń ma tↄ́oɛ. Mi ń zĩo, mi yãdilɛnɛ́o, mɛ́ mi yãe onɛ́o. Ãnabikɛ pↄ́ aalɛ kɛɛ́á wɛ́pungu ɛgɛna ń màso bɛɛɛsaio ń làasoo kpaanlao yã́ɛ. 15 A yã́i tò yã́ pↄ́ ma Dii má ò ãnabi pↄ́ mi ń zĩo, mɛ́ aalɛ ãnabikɛkɛ ń ma tↄ́opiↄ musun kɛ: Aalɛ mɛ zĩ ge nↄana a gɛ̃ ń bùsuuo, kási sↄ̃ zĩ ń nↄanao mɛ́ a ń dɛdɛ, 16 wi gbɛ̃́ pↄ́ aalɛ ãnabikɛkɛnɛ́ↄ zuzu Yelusalɛũ gãaɛↄ nↄana ń zĩpio yã́i. Gbɛ̃e aↄ ku à ń vĩo ge ń nↄɛↄ ge ń nɛ́ↄ. Má ń vãikɛapi wínɛ́ ń musuɛ. 17 Yã́ɛ bee onɛ́:

To mà wɛ́'ikau,

má kã́mabo gwãasĩna ge fãanɛo.

Asa ma gbɛ̃́ↄ wíwia maamaaɛ,

wà ń kɛ́ ĩa à kɛ̀ zài.

18 Tó ma gɛ sɛ̃saou,

mi gbɛ̃́ pↄ́ wà ń dɛdɛↄ gɛ e kálɛa.

Tó ma gɛ̃ wɛ̃́lɛ guu,

mi gbɛ̃́ pↄ́ lɛ́ gyãkɛkɛ nↄana yã́iↄ e.

Ãnabiↄ ń sa'onaↄ ìↄ liaaliaa ḿpii,

an gbɛ̃e a bùsu dↄ̃ lↄo.

19 N gi Yudaↄzi fĩ́afĩa yã̀?

N pↄ bↄ̀ Siↄnagu yã̀?

Àkɛa n wá wɛtã̀,

gbã́gbãa kuo ni?

Wá wɛ́ dↄ aafiai,

kási yãmaae kuo.

Wá wɛ́ dↄ gbã́gbãai,

ↄ̃ gili guu wá kúu.

20 Dii, wa wá vãikɛa dↄ̃̀

ń tàae pↄ́ wá deziↄ kɛ̀o.

Wa duunakɛ̀nɛɛ fá!

21 Ńsu sakáwáguo n tↄ́ yã́i,

ńsu ǹ n kpalabaa gawide bↄlↄboo.

N bàakuawanↄ yã́ su sãnguo,

ńsu gbooo.

22 Buipãleↄ tã́aↄ ì to lou mae?

Luabɛ ì to lou ma ń azĩaoa?

Aawo Dii wá Lua, ḿmɛ ni tó,

ↄ̃ wá wɛ́ dↄnzi,

asa ḿmɛ ni yã́piↄ kɛ píi.

<- Zelemii 13 Zelemii 15 ->