Zelemii 12

Zelemii yãgbɛaa Diiwa

1 Dii, tó ma mↄma ń yã́o,

n yã́ mɛ́ ìↄ zɛvĩ.

Ń beeo má yã'onnↄ yã́zɛde musu.

Bↄ́yãi vãikɛnaↄ yã́ ì bↄ maai?

Àkɛa náaisaideↄ ìↄ namablei?

2 N ń bá, aa zĩ́napɛ̀lɛ e aa gɛ̀ nɛ'ì.

N tↄ́ dↄ ń lɛ́u, an sↄ̃ kuma sↄ̃o.

3 Mpi Dii, ń ma dↄ̃, ni ma yãkɛa e,

ni wɛ́tɛ làasoo pↄ́ mi kɛmai.

Ǹ ń gálɛ táńnↄ

lán sã pↄ́ wàlɛ gɛ́ ń kòlokpaiↄwa.

Ǹ ń dilɛ ńdoa pↄ́dɛdɛgↄↄ pↄ́ ũ.

4 Wá bùsu aↄ ku wɛ̃nannↄ e bↄɛ ni?

Sɛ̃ aↄ ku giigagaa e gↄↄ kpele ni?

Nↄ̀bↄↄ ń bãↄ mìdɛ gbɛ̃́ pↄ́ kúuↄ vãikɛa yã́iɛ.

Asa aaì mɛ Lua yã́ pↄ́ a ń le zia dↄ̃o.

Lua yã́zãsia Zelemiiwa

5 Tó n bàalɛ̀ ń kɛ̀sɛdeↄ mɛ́ aa n kɛ̃,

kpelewa ńyↄ̃ bakpaaĩ kɛ ń sↄ̃deↄi?

Tó n sↄ̃ daa doũ bùsu aafiadeuo,

kpelewa ńyↄ̃ kɛ tó Yuudɛ̃ pài?

6 Baa n gbɛ̃́ↄ ń n uadeↄ bↄ̀ n kpɛ,

aa zↄakànzi.

Baa tó aalɛ yã́ nana onɛ,

ńsu ǹ ń náaikɛo.

7 Ma pãkpà ma gbɛ̃́ yenzideↄziɛ,

ma bui pↄ́ má sɛ̀pi tò we,

ma a gbɛ̃́piↄ nà ń ibɛɛↄnɛ ń ↄzĩɛ.

8 Ma gbɛ̃́ↄ lìaamanↄ lán nↄ̀ↄmusuwa líkpɛu.

Aa pũ̀naa, ↄ̃ má zańgu.

9 Ma gbɛ̃́ↄ gↄ̃̀mɛɛ bãso bàebae ũ,

bãso pãleↄ lìai, aalɛ ãnawà.

À gɛ wàiↄ kãaa píi, aa mↄ ble.

10 Dↄaan dasideↄ ma vɛ̃ɛbuↄ ↄ̃̀ↄkpàɛ,

aa ↄ̃zↄ̃̀ ma buaↄwa,

aa tò ma pↄeã tↄↄlɛ gↄ̃̀ gbáa gii ũ.

11 Aa tò à gↄ̃̀ gugii ũ,

a da ma aɛ wɛ̃nannↄ.

Bùsupi gↄ̃̀ bɛzia ũ píi,

asa gbɛ̃e ku à laaidↄwào.

12 Bùsudɛnaↄ dɛ̀dɛ gbáa sĩ̀sĩ wáiwaiↄ musu píi,

asa Dii a gbɛ̃́ↄ dɛ̀dɛ ń fɛ̃ndao

za bùsu lɛ́la e a lɛ́leɛ.

Gbɛ̃nazĩnae a aafiaʼe gueio.

13 Aa blɛwɛna tↄ̃̀, ↄ̃ à bↄ̀lɛnɛ́ lɛ ũ,

aa taasi dà ńzĩawaɛ, aai ài'eo.

Wí mɛ́ dɛ an yãkɛa gbɛ ũ

Dii pↄkũma pãsĩ yã́i.

14 Ma Dii ma mɛ̀ ma bui vãi pↄ́ aa ku ma gbɛ̃́ Isailiↄ saɛ, aalɛ bùsu pↄ́ má kpà ma gbɛ̃́piↄwa símáↄ bↄlɛ ń bùsuuɛ, mí Yudaↄ kpoɛ ń guu lↄ. 15 An woa gbɛa mí ɛa wɛ̃nadↄ̃nɛ́, mí suńnↄ ń pá ziu ń bùsuↄ guu. 16 Buipiↄ mɛ́ lɛgbɛ̃a ń Baali tↄ́o dà ma gbɛ̃́ↄnɛ yãa. Tó aa ma gbɛ̃́ↄ ↄlɛsɛ̀ sa, mɛ́ aalɛ lɛgbɛ̃ ń ma tↄ́o, aalɛ mɛ wa sì ń Diio, má ń zɛdↄ ma gbɛ̃́ↄ guuɛ. 17 Tó an buie i ma yãma sↄ̃o, má ń kpoɛɛ, mí ń kaalɛ. Ma Dii mámɛ má ò.

<- Zelemii 11 Zelemii 13 ->